ମୁମ୍ବାଇ,୧୦।୭: କର୍ନାଟକରେ ରାଜନୈତିକ ସଙ୍କଟ ଥମିବାର ନାଁ ଧରୁନି। ବିଦ୍ରୋହୀ ବିଧାୟକଙ୍କୁ ମନାଇବାକୁ ମୁମ୍ବାଇରେ ପହଞ୍ଚିଥିବା ମନ୍ତ୍ରୀ ତଥା କଂଗ୍ରେସର ବରିଷ୍ଠ ନେତା ଡି.କେ. ଶିବକୁମାରଙ୍କୁ ପୋଲିସ ହେପାଜତକୁ ନେଇଛି। ସୂଚନାଯୋଗ୍ୟ, ମେଣ୍ଟ ସରକାରରୁ ଇସ୍ତଫା ଦେଇଥିବା କଂଗ୍ରେସ ଓ ଜେଡି(ଏସ୍) ବିଧାୟକମାନେ ରେନିସନ୍ସ ମୁମ୍ବାଇ କନ୍ଭେନଶନ ସେଣ୍ଟର ହୋଟେଲରେ ରହୁଥିବାବେଳେ ବୁଧବାର ତାଙ୍କୁ ମନାଇବାକୁ ଶିବକୁମାର ସେଠାରେ ପହଞ୍ଚିଥିଲେ। ହେଲେ ତାଙ୍କୁ ପୋଲିସ ହୋଟେଲ ଆଗରେ ଅଟକାଇ ଦେଇଥିଲା। ଅସନ୍ତୁଷ୍ଟ ବିଧାୟକମାନଙ୍କୁ ଭେଟିବା ପାଇଁ ସୁଯୋଗ ଦେଇ ନ ଥିଲା। ଅପରପକ୍ଷରେ ଅସନ୍ତୁଷ୍ଟ ବିଧାୟକମାନେ ସେମାନଙ୍କ ପ୍ରତି କର୍ନାଟକ ମୁଖ୍ୟମନ୍ତ୍ରୀ ଓ ଶିବକୁମାରଙ୍କଠାରୁ ବିପଦ ରହିଛି ବୋଲି ଏକ ଚିଠି ଲେଖି ପୋଲିସକୁ ଜଣାଇଥିଲେ। ଯାହାଫଳରେ ପୋଲିସ ଏଭଳି ପଦକ୍ଷେପ ନେଇଛି।