କଲମ୍ବୋ, ୩ା୬ (ପି.ଟି.)-ଶ୍ରୀଲଙ୍କା କ୍ରିକେଟର ଶେଶାନ ମଦୁଶାନକା ପୁଣି ପୋଲିସ ହେପାଜତରେ ରହିବେ। ପାଖରେ ହେରୋଇନ୍ ରଖିଥିବା ଅଭିଯୋଗରେ ଏହି ୨୫ବର୍ଷୀୟ ବୋଲର ଏବଂ ତାଙ୍କର ଜଣେ ସାଙ୍ଗ ଦେଶର ଉତ୍ତର-ପୂର୍ବାଞ୍ଚଳ ପ୍ରଦେଶ ପାନ୍ନାଲାଠାରେ ଗତ ମେ ୨୩ରେ ଗିରଫ ହୋଇଥିଲେ। ପୋଲିସ ତାଙ୍କଠାରୁ ୨.୭ଗ୍ରାମ୍ ଏବଂ ତାଙ୍କ ସାଙ୍ଗଙ୍କ ନିକଟରୁ ୨.୮ ଗ୍ରାମ୍ ହେରୋଇନ୍ ଜବତ କରିଥିଲା। କୁଲିୟାପିଟିୟା ମାଜିଷ୍ଟ୍ରେଟ୍ ଉଭୟଙ୍କୁ ଜୁନ୍ ୨ ପର୍ଯ୍ୟନ୍ତ ପୋଲିସ ହେପାଜତରେ ରହିବା ଲାଗି ନିର୍ଦ୍ଦେଶ ଦେଇଥିଲେ। ଆହୁରି ତଦନ୍ତର ଆବଶ୍ୟକତା ପଡ଼ିବାରୁ ମଙ୍ଗଳବାର ସେମାନଙ୍କୁ ୯ତାରିଖ ପର୍ଯ୍ୟନ୍ତ ପୋଲିସ ହେପାଜତରେ ରହିବାକୁ ନିର୍ଦ୍ଦେଶ ହୋଇଛି। ନିଶାଦ୍ରବ୍ୟ କାରବାରରେ ଗିରଫ ହେବାରେ ମଦୁଶାନକା ଶ୍ରୀଲଙ୍କା କ୍ରିକେଟ ଇତିହାସରେ ପ୍ରଥମ ଖେଳାଳି। ଶ୍ରୀଲଙ୍କାର ଏହି ଡାହାଣହାତୀ ମିଡିୟମ ପେସ୍ ବୋଲର ୨୦୧୮ ପ୍ରଥମଭାଗରେ ବାଂଲାଦେଶ ବିପକ୍ଷରେ ତାଙ୍କ ଅନ୍ତର୍ଜାତୀୟ ପଦାର୍ପଣ ମ୍ୟାଚ ଖେଳିଥିଲେ। ଏହି ଅନ୍ତର୍ଜାତୀୟ ଦିନିକିଆ ମ୍ୟାଚରେ ସେ ହ୍ୟାଟ୍ରିକ୍ ଅର୍ଜନ କରିଥିଲେ। ଅନ୍ତର୍ଜାତୀୟ ଦିନିକିଆ ଇତିହାସରେ ପଦାର୍ପଣ ମ୍ୟାଚରେ ହ୍ୟାଟ୍ରିକ ଅର୍ଜନ କରିବାରେ ମଦୁଶାନକା ହେଉଛନ୍ତି ଚତୁର୍ଥ ଖେଳାଳି। ଶ୍ରୀଲଙ୍କା ତରଫରୁ ଏହି ଦିନିକିଆ ବ୍ୟତୀତ ସେ ବାଂଲାଦେଶ ବିପକ୍ଷରେ ଦୁଇଟି ଅନ୍ତର୍ଜାତୀୟ ଟି୨୦ ମଧ୍ୟ ଖେଳିଛନ୍ତି। ଗିରଫ ପରେ ଶ୍ରୀଲଙ୍କା କ୍ରିକେଟ (ଏସ୍ଏଲ୍ସି) ମଦୁଶାନକାଙ୍କ ସହିତ କରିଥିବା ଚୁକ୍ତିକୁ ସସ୍ପେଣ୍ଡ କରିଛନ୍ତି।