ଯାଜପୁର ରୋଡ, ୭|୯(ନି.ପ୍ର.)- ବ୍ୟାସନଗର ପୌରାଞ୍ଚଳରେ ମଶାଙ୍କ ଉପଦ୍ରବ ବଢିବାରେ ଲାଗିଛି। ଏହାର ନିରାକରଣ ଦିଗରେ ପୌର ପରିଷଦ ପକ୍ଷରୁ ଆଖିଦୃଶିଆ ପଦକ୍ଷେପ ଗ୍ରହଣ କରାଯାଉ ନାହିଁ । ଏଭଳି ସ୍ଥିତିରେ ମ୍ୟାଲେରିଆ, ଡେଙ୍ଗୁ, ଚିକୁନ୍ଗୁନିଆ ଭଳି ମାରାତ୍ମକ ରୋଗ ବ୍ୟାପିବା ନେଇ ଆଶଙ୍କା ଦେଖାଦେଇଛି। ଅପରପକ୍ଷେ ଡେଙ୍ଗୁ ସଚେତନତା ନେଇ ମଧ୍ୟ କୌଣସି କାର୍ଯ୍ୟକ୍ରମ ଗ୍ରହଣ କରାଯାଉ ନାହିଁ । କିଛିଦିନ ତଳେ ଅଞ୍ଚଳରୁ ଜଣେ ଡେଙ୍ଗୁ ରୋଗରେ ଆକ୍ରାନ୍ତ ହୋଇ ଚିକିତ୍ସିତ ଥିବା ଜଣାପଡିଛି। ଏହାକୁ ନେଇ ଅଞ୍ଚଳବାସୀଙ୍କ ମଧ୍ୟରେ ଅସନ୍ତୋଷ ବୃଦ୍ଧି ପାଇବାରେ ଲାଗିଛି।
ପୌର ପରିଷଦ ଅଧୀନ ବିଭିନ୍ନ ଅଞ୍ଚଳରେ ଡ୍ରେନେଜ୍ ବ୍ୟବସ୍ଥାଠାରୁ ଆରମ୍ଭ କରି ବର୍ଜ୍ୟବସ୍ତୁ ପରିଚାଳନା ଠିକ୍ ଭାବେ କରାଯାଉ ନ ଥିବାରୁ ଲୋକେ ନାହିଁ ନ ଥିବା ଅସୁବିଧାର ସମ୍ମୁଖୀନ ହେଉଛନ୍ତି। ବିଶେଷକରି ମଶାଙ୍କ ଉପଦ୍ରବରେ ସହରବାସୀ ଅତିଷ୍ଠ ହୋଇ ପଡିଲେଣି। ଏ ନେଇ ଅଭିଯୋଗ କରିଲେ କେବଳ ପ୍ରତିଶ୍ରୁତି ମିଳୁଥିବା ସ୍ଥାନୀୟ ଅଞ୍ଚଳବାସୀ କହିଛନ୍ତି। ପୌର ପରିଷଦର ପ୍ରଶାସକ ଦାୟିତ୍ୱରେ ଥିବା କଳିଙ୍ଗନଗର ଏଡିଏମ୍ଙ୍କ କାର୍ଯ୍ୟାଳୟ ନିକଟ ଡ୍ରେନ୍ରେ ଦୋକାନୀଙ୍କ ବର୍ଜ୍ୟବସ୍ତୁ ପଡିରହିବା ଫଳରେ ବର୍ଷାଜଳ ନିଷ୍କାସନରେ ବାଧକ ସାଜୁଛି। ଏହିପରି ଗୋପବନ୍ଧୁ ଛକଠାରୁ ଚୋରଦା ବାଇପାସ ଡ୍ରେନ୍ ଜଳ ନିଷ୍କାସନ ହୋଇପାରୁ ନାହିଁ। ବ୍ୟାସନଗର ପୌରାଞ୍ଚଳରେ ମଧ୍ୟ ସମରୂପ ପରିସ୍ଥିତି ଦେଖାଦେଉଛି। ଏଠାରେ ଡ୍ରେନ୍ଗୁଡିକ ସଫା କରାଯାଉ ନ ଥିବାରୁ ବର୍ଷାଜଳ ନିଷ୍କାସନ ନ ହୋଇ ଜମୁଛି। ଷ୍ଟେଶନ୍ ବଜାରଠାରୁ ପୌରପରିଷଦ ମଧ୍ୟ ଦେଇ ଯାଇଥିବା ପୋଷ୍ଟ ଅଫିସ ପର୍ଯ୍ୟନ୍ତ ଡ୍ରେନ୍ ନିର୍ମାଣ ଅସମ୍ପୂର୍ଣ୍ଣ ହୋଇ ପଡିଛି। ଅଧିକାଂଶ ସ୍ଥାନରେ ବର୍ଷାଜଳ ଓ ଡ୍ରେନ୍ ପାଣି ନିଷ୍କାସନ ହୋଇ ନ ପାରି ରାସ୍ତା ଉପରେ ଢେଉ ଭାଙ୍ଗୁଛି। ଦୀର୍ଘଦିନ ଧରି ପାଣି ନିଷ୍କାସନ ନ ହୋଇ ଜମି ରହିବାରୁ ମଶା, ମାଛି ସହ ବିଭିନ୍ନ ଜୀବାଣୁ କୀଟାଣୁଙ୍କ ଉତ୍ପତ୍ତି ସ୍ଥଳ ପାଲଟିଛି। ଏମାନଙ୍କ ବଂଶ ବୃଦ୍ଧି ରୋକିବାରେ ପୌର ପରିଷଦ ପକ୍ଷରୁ ପଦକ୍ଷେପ ଗ୍ରହଣ କରା ନ ଯିବାରୁ ବିଭିନ୍ନ ରୋଗ ବ୍ୟାପିବାରେ ଲଗିଛି। ବିଶେଷକରି ମଶାଙ୍କୁ ନିପାତ୍ ପାଇଁ ମଶା ତେଲ୍ ଓ ଧୂଆଁ ଦିଆଯାଉନାହିଁ । ପୌରପରିଷଦରେ ମଶା ଧୂଆଁ ପାଇଁ ଟିପା ମିଶିନିଗୁଡିକ ପଡି ରହିଛି। ଏ ସମ୍ପର୍କରେ ପୌର ନିର୍ବାହୀ ଅଧିକାରୀ ସପନ କୁମାର ନନ୍ଦଙ୍କୁ ପଚାରିବାରୁ, ପୌର ପରିଷଦ ପକ୍ଷରୁ ଡ୍ରେନ୍ଗୁଡିକ ସଫା କରାଯାଉଛି। କିନ୍ତୁ ପୂର୍ତ୍ତ ବିଭାଗ ଦ୍ୱାରା ଉନ୍ନତି ଯୋଜନାରେ ନିର୍ମାଣ ହୋଇଥିବା ଡ୍ରେନ୍ଗୁଡିକ ଅସମ୍ପୂର୍ଣ୍ଣ ହୋଇପଡିଥିବାରୁ ଜଳ ନିଷ୍କାସନରେ ବାଧକ ସାଜୁଛି। ଏ ଦିଗରେ ପଦକ୍ଷେପ ପାଇଁ ପୂର୍ତ୍ତ ବିଭାଗକୁ ଚିଠି କରିଥିବା ସେ କହିଛନ୍ତି। ଅଞ୍ଚଳବାସୀଙ୍କ ସ୍ବାର୍ଥ ଦୃଷ୍ଟିରୁ ପୌରପରିଷଦ କର୍ତ୍ତୃପକ୍ଷ ଓ ଜିଲା ପ୍ରଶାସନ ଦୃଷ୍ଟି ଦେବା ପାଇଁ ଶ୍ରମିକ ନେତା ବିଦ୍ୟାଧର ମହାନ୍ତି ଏବଂ ସହରବାସୀ ଦାବି କରିଛନ୍ତି।