ନାଗପୁର,୨୦ା୫ (ପି.ଟି.)- କରୋନାଭାଇରସ ପାଇଁ ଜାତୀୟ ଲକ୍ଡାଉନ୍ ବେଳେ ଜୀବନ ବଞ୍ଚାଇବା ଲାଗି ସଂଘର୍ଷ ଚଳାଇଥିବା ଭାରତର ଡିଷ୍ଟାନ୍ସ ରନର ପ୍ରଜକ୍ତା ଗୋଡ୍ବୋଲେଙ୍କୁ ଶେଷରେ ରାଜ୍ୟ କର୍ତ୍ତୃପକ୍ଷଙ୍କଠାରୁ ସହାୟତା ମିଳିଛି। ଲକ୍ଡାଉନ୍ ବେଳେ ପ୍ରଜକ୍ତା ସ୍ଥାନୀୟ ଶୀର୍ଷାପେଠ୍ ବସ୍ତିରେ ବାସ କରୁଥିଲେ। ତାଙ୍କ ବାପା ପକ୍ଷାଘାତ ଯୋଗରେ ପୀଡ଼ିତ ଥିବାବେଳେ ମା’ ରୋଜଗାର ପନ୍ଥା ହରାଇଥିଲେ। ଏ ବିଷୟ ଗଣମାଧ୍ୟମରେ ପ୍ରକାଶ ପାଇବା ଳପରେ ମହାରାଷ୍ଟ୍ର ମୁଖ୍ୟମନ୍ତ୍ରୀ ଉଦ୍ଧବ ଠାକ୍ରେଙ୍କ ନଜରକୁ ଆସିଥିଲା। ତାଙ୍କ ନିର୍ଦ୍ଦେଶକ୍ରମେ ପ୍ରଜକ୍ତାଙ୍କୁ ତୁରନ୍ତ ୧୮,୦୦୦ ଟଙ୍କା ଏବଂ ଆବଶ୍ୟକ ରାଶନ ଯୋଗାଇ ଦିଆଯାଇଥିଲା। ତାଙ୍କୁ ଯଥାସମ୍ଭବ ସହାୟତା ଦିଆଯିବ ବୋଲି ରାଜ୍ୟ ସରକାରଙ୍କ ତରଫରୁ ପ୍ରତିଶ୍ରୁତି ଦିଆଯାଇଛି। ସୂଚନାଯୋଗ୍ୟ, ୨୦୧୯ରେ ଇଟାଲିରେ ଅନୁଷ୍ଠିତ ଓ୍ବାଲର୍ଡ ୟୁନିଭର୍ସିଟି ଗେମ୍ସରେ ପ୍ରଜକ୍ତା ଇଣ୍ଡିଆନ ୟୁନିଭର୍ସିଟିଜ୍ ପକ୍ଷରୁ ୫୦୦୦ମିଟର ଦୌଡ଼ ପ୍ରତିଯୋଗିତାରେ ଭାଗ ନେଇଥିଲେ। ସେ ୧୮:୨୩.୯୨ ଟାଇମିଂରେ ରେସ୍ କରିଥିଲେ, କିନ୍ତୁ ଫାଇନାଲ ରାଉଣ୍ଡକୁ ଯୋଗ୍ୟତା ଅର୍ଜନ କରିପାରି ନ ଥିଲେ।
