ପୁରୀ ଅଫିସ, ୧୬ା୧୧: ଖବରଦାତାମାନେ ହେଉଛନ୍ତି ସମାଜର ଦର୍ପଣ। ପ୍ରତିକୂଳ ପରିସ୍ଥିତିରେ ଏମାନେ ସତ୍ୟକୁ ସାମ୍ନାକୁ ଆଣିଥାନ୍ତି। ଗଣତାନ୍ତ୍ରିକ ମୂଳଦୁଆକୁ ମଜଭୁତ କରିବାରେ ଖବରଦାତାଙ୍କ ଭୂମିକା ଗୁରୁତ୍ୱପୂର୍ଣ୍ଣ। ଅନେକ କ୍ଷେତ୍ରରେ ଏମାନଙ୍କୁ ପ୍ରତିବନ୍ଧକର ସାମ୍ନା କରିବାକୁ ପଡ଼ିଥାଏ। ତେବେ ଠିକଣା ଢଙ୍ଗରେ ଆଗେଇ ଲକ୍ଷ୍ୟସ୍ଥଳରେ ପହଞ୍ଚତ୍ବା ହେଉଛି ଖବରଦାତାଙ୍କ ଧର୍ମ ବୋଲି ଶନିବାର ସଦ୍ଭାବନା ସଭାଗୃହରେ ପୁରୀ ଜିଲାସ୍ତରୀୟ ଜାତୀୟ ପ୍ରେସ୍ ଦିବସ ପାଳନରେ ମତ ପ୍ରକାଶ ପାଇଛି। ଜିଲା ସୂଚନା ଓ ଲୋକ ସମ୍ପର୍କ କାର୍ଯ୍ୟାଳୟ ପକ୍ଷରୁ ଆୟୋଜିତ ଏହି କାର୍ଯ୍ୟକ୍ରମରେ ଜିଲାପାଳ ବଲୱନ୍ତ ସିଂ ମୁଖ୍ୟଅତିଥି ଭାବେ ଯୋଗଦେଇ ନିରପେକ୍ଷ ଖବର ପ୍ରସାରଣ ଓ ତଥ୍ୟ ଭିତ୍ତିକ ଉପସ୍ଥାପନା ହିଁ ସାମ୍ବାଦିକତାର ମୂଳମନ୍ତ୍ର ବୋଲି କହିଥିଲେ। ସିଭିଲ ସର୍ଭିସ ପାଇଁ ପ୍ରସ୍ତୁତ ପୂର୍ବରୁ ସେ ସାମ୍ବାଦିକତାକୁ ଆପଣାଇ ଥିଲେ। ଏହା ନିଶ୍ଚିତ ଏକ କଷ୍ଟକର ବୃତ୍ତି, ଅନ୍ୟ ଅଧିକାରୀ ନ ଜାଣିଲେ ବି ସେ ଏହାକୁ ଭଲ ଭାବେ ବୁଝିଛନ୍ତି ବୋଲି ଜିଲାପାଳ କହିଥିଲେ। ସମ୍ମାନିତ ଅତିଥି ଭାବେ ଏସ୍ପି ଡ. ଉମାଶଙ୍କର ଦାଶ ଯୋଗଦେଇ କହିଥିଲେ, ଖବରଦାତାଙ୍କ ହାତରେ ସବୁକିଛି ରହିଛି। କିନ୍ତୁ ସେମାନଙ୍କୁ ଖବର ପରିବେଷଣ ସମୟରେ ସବୁ ଦିଗ ପ୍ରତି ଧ୍ୟାନ ଦେବାକୁ ହେବ। କାରଣ କୌଣସି ସଂସ୍ଥାରେ ଜଣଙ୍କ ଭୁଲ୍ ପାଇଁ ବେଳେ ବେଳେ ଗୋଟିଏ ବିଭାଗକୁ ସମ୍ପୂର୍ଣ୍ଣ ଭାବେ ବଦ୍ନାମ ହେବାକୁ ପଡୁଛି। ଏପରି ହେଲେ ସମ୍ପୃକ୍ତ ବିଭାଗ କିମ୍ବା ସଂସ୍ଥା ଉପରୁ ଲୋକଙ୍କ ବିଶ୍ୱାସ କମିଯିବ। ବିଶ୍ଲେଷଣାତ୍ମକ ତଥ୍ୟକୁ ଆଧାର କରି ଖବର ପରିବେଷଣ କରାଗଲେ ଅନେକ ଲୁକ୍କାୟିତ ଖବର ସମସ୍ତଙ୍କ ନିକଟରେ ପହଞ୍ଚତ୍ ପାରିବ। ଏହି ଅବସରରେ ଖବରଦାତା ମଧୁସୂଦନ ମିଶ୍ର, ଲକ୍ଷ୍ମୀନାରାୟଣ ପଟ୍ଟନାୟକ, ସଞ୍ଜୟ ମହାପାତ୍ର, ସୀମାଞ୍ଚଳ ପାଢୀ, ରୁଦ୍ରନାରାୟଣ ସିଂ, ସରୋଜ କୁମାର ମିଶ୍ର, ପ୍ରଭାତ ପାଣିଗ୍ରାହୀ, ନିରଞ୍ଜନ ମିଶ୍ର ବକ୍ତବ୍ୟ ରଖିଥିଲେ। ବକ୍ତୃତା ପ୍ରତିଯୋଗିତାରେ ଗୋପବନ୍ଧୁ ଆୟୁର୍ବେଦ ମହାବିଦ୍ୟାଳୟର ଅମ୍ରିତା କୁମାର ଅଗ୍ରୱାଲ ପ୍ରଥମ ଓ ସୁମିତ୍ରା ପାଣିଗ୍ରାହୀ ତୃତୀୟ ଏବଂ ଶ୍ରୀଜଗନ୍ନାଥ ସଂସ୍କୃତ ବିଶ୍ୱବିଦ୍ୟାଳୟର ବିଶ୍ୱବନ୍ଦିତା ପ୍ରଧାନ ଦ୍ୱିତୀୟଙ୍କୁ ପୁରସ୍କୃତ କରାଯାଇଥିଲା। ଜିଲା ସୂଚନା ଓ ଲୋକ ସମ୍ପର୍କ ଅଧିକାରୀ ଗୁରୁବୀର ସିଂ ସଭା କାର୍ଯ୍ୟ ପରିଚାଳନା କରିଥିଲେ।