ସାଧାରଣତଃ ଯେକୌଣସି ପଶୁପକ୍ଷୀଙ୍କୁ ଶିକାର କରି ବାଘ ଖାଇଥାଏ ବୋଲି ଜାଣିଛେ। ମାତ୍ର ଗୋଟିଏ ଚିତାବାଘ ସବୁଦିନ ରାତିରେ ଗୋଟିଏ ଗାଈ ନିକଟକୁ ଆସିଥାଏ। କିନ୍ତୁ ଶିକାର ନ କରି ଚାଲିଯାଏ। ଜାଣନ୍ତି କାହିଁକି? କେବଳ ମା’ର ସ୍ନେହମମତା ଟିକେ ପାଇବା ପାଇଁ। ଏହାର ଏକ ଫଟୋ ଏବେ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି। ଫଟୋରେ ଏକ ଚିତାବାଘଟି ଗାଈ ପାଖରେ ଏମିତି ବସିଛି, ସତେ ଯେମିତି ତା’ର ବାଛୁରୀ।
ଆଇଏଫ୍ଏସ୍ ଅଫିସର ସୁଶାନ୍ତ ନନ୍ଦାଙ୍କ ଟୁଇଟର ଆକାଉଣ୍ଟରେ ଏହି ଫଟୋ ଶେୟାର କରାଯାଇଛି। ଯେଉଁଥିରେ ଗାଈ ଏବଂ ଚିତାବାଘ ଗୋଟିଏ ଜାଗାରେ ବସିଛନ୍ତି। ଏହି ଫଟୋ ଶେୟାର କରି ସୁଶାନ୍ତ ଲେଖିଛନ୍ତି, ଶିକାର ଏବଂ ଶିକାରୀ ଏକାସାଥୀରେ। ଦୁହେଁ ଦୁହିଁଙ୍କୁ ବେଶ୍ ସ୍ନେହ କରୁଛନ୍ତି। ଚିତାବାଘଟି ନିୟମିତ ଭାବେ ଗାଈ ନିକଟକୁ ଆସି ଛୁଆଟିଏ ପରି ଗେଲ ହୋଇ ଚାଲିଯାଏ। ବାଛୁରୀଟି ଯେମିତି ମା’ ଗାଈର ଗାଲ କାନ ଆଦି ଚାଟିଥାଏ ଠିକ୍ ସେହିପରି ଚିତାବାଘଟି ଗାଈକୁ ଚାଟିଥାଏ। ଆଜି ପର୍ଯ୍ୟନ୍ତ ସେ ଗାଈର କୌଣସି କ୍ଷତି କରିନାହିଁ। ଗାଈ ମଧ୍ୟ ତାକୁ ବାଛୁରୀ ପରି ସ୍ନେହ କରିଥାଏ। କିଛି ସମୟ ରହିବା ପରେ ଚିତାଟି ଜଙ୍ଗଲକୁ ଚାଲିଯାଏ।