ମିରଠ,୨୭।୬: ଉତ୍ତର ପ୍ରଦେଶର ମିରଠ ଏବେ ଅଶାନ୍ତ ହୋଇପଡିଛି। ଏଠାରେ ଥିବା ପ୍ରହ୍ଲାଦ ନଗରରେ ନିତିଦିନ ଅସାମାଜିକ କାର୍ଯ୍ୟକଳାପ ବଢି ଚାଲିଥିବା ବେଳେ ଲୋକେ ଏଠାରୁ ଘରଛାଡି ଯିବାକୁ ବାଧ୍ୟ ହେଉଛନ୍ତି। ଏଠାରେ ଗୁଳି ଫୁଟିବା ଏକ ସାଧାରଣ ଘଟଣାରେ ପରିଣତ ହୋଇଗଲାଣି। ସୂଚନାଯୋଗ୍ୟ, ଏଠାରେ ଅଧିକାଂଶ ହେଉଛନ୍ତି ସଂଖ୍ୟାଲଘୁ ସମ୍ପ୍ରଦାୟର। ଦେଶ ବିଭାଜନ ହେବା ପରେ ପାକିସ୍ତାନରୁ ଆସିଥିବା ଲୋକଙ୍କୁ ଏଠାରେ ଥଇଥାନ କରାଯାଇଥିଲା। ତେଣୁ ଏହାକୁ ରିଫ୍ୟୁଜି କଲୋନି ବୋଲି ମଧ୍ୟ କୁହାଯାଏ। ଏଠାରେ ଅଧିକାଂଶ ପଞ୍ଜାବୀ ପରିବାର ବସବାସ କରନ୍ତି। ପ୍ରହ୍ଲାଦ ନଗର ସୀମାରେ ଇସଲାମାବାଦ, ପିଲ୍ଲୋଖଡି, ଶ୍ୟାମନଗର, ଗୋଲାକୁଆଁ ଆଦି ରହିଥିବାରୁ ଏପରି ପରିସ୍ଥିତି ଉପୁଜୁଥିବା କୁହାଯାଉଛି।