ପୁଣେ,୨ା୬(ଆଇଏଏନ୍ଏସ୍): ଭାରତର ପୂର୍ବତନ ରାଷ୍ଟ୍ରପତି ପ୍ରତିଭା ପାଟିଲଙ୍କୁ ଶନିବାର ମେକ୍ସିକୋର ସର୍ବୋଚ୍ଚ ବେସାମରିକ ସମ୍ମାନ ‘ଅର୍ଡନ୍ ମେକ୍ସିକାନା ଡେଲ୍ ଆଗୁଇଲା ଆଜ୍ଟେକା’ରେ ସମ୍ମାନିତ କରାଯାଇଛି। ବିଦେଶୀମାନଙ୍କୁ ମେକ୍ସିକୋ ସରକାର ଏହି ପୁରସ୍କାର ପ୍ରଦାନ କରିଥାନ୍ତି। ପୁଣେର ଏମ୍ସିସିଆଇଏ ଭବନରେ ଅନୁଷ୍ଠିତ ଏକ ସ୍ବତନ୍ତ୍ର ଉତ୍ସବରେ ଦେଶର ପ୍ରଥମ ମହିଳା ରାଷ୍ଟ୍ରପତି ପ୍ରତିଭାଙ୍କୁ ମେକ୍ସିକୋ ରାଷ୍ଟ୍ରଦୂତ ମେଲବା ପ୍ରିଆ ଏହି ସମ୍ମାନ ପ୍ରଦାନ କରିଥିଲେ। ଏଭଳି ପୁରସ୍କାର ପାଇବାରେ ପ୍ରତିଭା ହେଉଛନ୍ତି ଦେଶର ଦ୍ୱିତୀୟ ରାଷ୍ଟ୍ରପତି। ଏହା ପୂର୍ବରୁ ଦିବଂଗତ ରାଷ୍ଟ୍ରପତି ଏସ୍. ରାଧାକ୍ରିଷ୍ଣନଙ୍କୁ ମେକ୍ସିକୋର ସର୍ବୋଚ୍ଚ ବେସାମରିକ ସମ୍ମାନ ପ୍ରଦାନ କରାଯାଇଥିଲା। ଏହାବ୍ୟତୀତ ନୋବେଲ ବିଜେତା ଅମର୍ତ୍ତ୍ୟ ସେନ୍, ଖ୍ୟାତନାମା ଚିିତ୍ରକର ସତୀଶ ଗୁଜରାଲ, ଶିଳ୍ପପତି ରଘୁପତି ସିଂଘାଣିଆ ପ୍ରମୁଖ ଏହି ପୁରସ୍କାର ପାଇଛନ୍ତି।
