ଲକ୍ଷ୍ନୌ,୧।୬: ଖେଳ ପ୍ରତିଯୋଗିତାରେ ବିଜେତାଙ୍କୁ ବିଭିନ୍ନ ପୁରସ୍କାର ପ୍ରଦାନ କରାଯାଇଥାଏ। ତେବେ ପାରା ଏଭଳି ପ୍ରତିଯାଗିତାରେ ଅଂଶଗ୍ରହଣ କରି କାର ଓ ବାଇକ୍ ଜିଣିବା ଶୁଣିଲେ ଯେ କେହି ଚକିତ ହେବା ନିଶ୍ଚିତ। ଉତ୍ତରପ୍ରଦେଶ ମୁଜାଫରନଗର ଜିଲାରେ ଘଟିଛି ଏଭଳି ଏକ ରୋଚକ ଘଟଣା। ଏଠାରେ ମୋରନା ଥାନା ଅନ୍ତର୍ଗତ ଓ୍ବଜିରାବାଦ୍-ଛଛରୋଲି ଗାଁରେ ଏକ ପାରା ଉଡ଼ାଣ ପ୍ରତିଯୋଗିତାରେ ପ୍ରଥମ ସ୍ଥାନ ହାସଲ କରିଥିବା ପାରାକୁ କାର୍ ଏବଂ ଦ୍ୱିତୀୟସ୍ଥାନ ଅଧିକାର କରିଥିବା ପାରାକୁ ବାଇକ୍ ଉପହାର ଭାବେ ପ୍ରଦାନ କରାଯାଇଛି। ପ୍ରଥମ ସ୍ଥାନ ଅଧିକାର କରିଥିବା ହୈଦରନଗର ଗାଁର ରାକେଶଙ୍କ ପାରାକୁ ବିଜେତା ଟ୍ରଫି ମଧ୍ୟ ପ୍ରଦାନ କରାଯାଇଛି। ସେହିପରି ଭୁମ୍ମାଖେଡି ଗାଁର ଅଙ୍କିତ ପ୍ରଧାନଙ୍କ ପାରାକୁ ରନର୍ସ ଅପ୍ ଟ୍ରଫି ପ୍ରଦାନ କରାଯାଇଛି। ଏହି ପ୍ରତିଯୋଗିତା ପ୍ରଥମ ଥର ପାଇଁ ଆୟୋଜିତ ହୋଇଥିବାବେଳେ ଏହାକୁ ବ୍ଲକ୍ ମୁଖ୍ୟ ଅନୀଲ ରାଠି ଆୟୋଜନ କରିଥିଲେ। ଏହାକୁ ନେଇ ସୋସିଆଲ୍ ମିଡ଼ିଆରେ ଏବେ ଚର୍ଚ୍ଚା ଜାରି ରହିଛି।