ନୂଆଦିଲ୍ଲୀ,୨-୮: ନ୍ୟାଶନାଲ ଆଲୁମିନିୟମ କମ୍ପାନୀ ଲିମିଟେଡ (ନାଲ୍କୋ), ହିନ୍ଦୁସ୍ତାନ କପର ଲିମିଟେଡ(ଏଚ୍ସିଏଲ୍) ଏବଂ ମିନେରାଲ ଏକ୍ସପ୍ଲୋରେଶନ କମ୍ପାନୀ ଲିମିଟେଡ(ଏମଇସିଏଲ୍) ଭଳି ୩ ରାଷ୍ଟ୍ରାୟତ୍ତ ସଂସ୍ଥା ମିଳିତ ହୋଇ ନୂଆ ରାଷ୍ଟ୍ରାୟତ୍ତ ଉଦ୍ୟୋଗ କାବିଲ ସ୍ଥାପନ କରିବେ। କୋଇଲା, ଖଣି ଏବଂ ସଂସଦୀୟ ବ୍ୟାପାର ମନ୍ତ୍ରୀ ପ୍ରହ୍ଲାହ ଯୋଶୀ ଏ ନେଇ ସୂଚନା ଦେଇଛନ୍ତି। ନୂଆ କମ୍ପାନୀରେ ଉକ୍ତ ୩ କମ୍ପାନୀର ସହଭାଗିତା ଅନୁପାତ ଯଥାକ୍ରମେ ୪୦:୩୦:୩୦ ରହିଛି। ଘରୋଇ ବଜାରକୁ ଗୁରୁତ୍ୱପୂର୍ଣ୍ଣ ଏବଂ ମୂଲ୍ୟବାନ ଖଣିଜ ସାମଗ୍ରୀର ନିରନ୍ତର ଯୋଗାଣକୁ ସୁନିଶ୍ଚିତ କରିବା ଲକ୍ଷ୍ୟରେ ଏଭଳି ପଦକ୍ଷେପ ଗ୍ରହଣ କରାଯାଇଛି। ଖଣିଜ ନିରାପତ୍ତାକୁ ସୁନିଶ୍ଚିତ କରିବା ଏବଂ ରପ୍ତାନି ନିର୍ଭରଶୀଳତା କମାଇବା ଲକ୍ଷ୍ୟକୁ ଏହା ବାସ୍ତବ ରୂପ ଦେବ ବୋଲି ଯୋଶୀ କହିଛନ୍ତି।
ସେ କହିଛନ୍ତି, ପରିବହନ ଏବଂ ଉତ୍ପାଦନ କ୍ଷେତ୍ର ଲାଗି ଖଣି ଏବଂ ଧାତବ ସାମଗ୍ରୀର ସ୍ଥାୟୀ ଉତ୍ସ ଅତ୍ୟନ୍ତ ଗୁରୁତ୍ୱପୂର୍ଣ୍ଣ। ୨୦୧୫ର ପ୍ୟାରିସ ଜଳବାୟୁ ପରିବର୍ତ୍ତନ ସମ୍ମିଳନୀରେ ଗ୍ରୀନ ହାଉସ ଗ୍ୟାସ ନିର୍ଗମନକୁ ହ୍ରାସ କରିବା ଲାଗି ଭାରତ ଶପଥ ନେଇଥିଲା। ଏଭଳି ଗୁରୁତ୍ୱପୂର୍ଣ୍ଣ ପ୍ରସଙ୍ଗକୁ ଆଧାର କରି ସରକାର ଦେଶ ମଧ୍ୟରେ ଇ-ଯାନ ଚଳାଚଳକୁ ଗୁରୁତ୍ୱ ଦେଉଛନ୍ତି। ଏହାକୁ ବିଚାର କଲେ ବ୍ୟାଟେରୀ ମାଧ୍ୟମରେ ଇନ୍ଧନ ସଞ୍ଚୟର ଆବଶ୍ୟକତାକୁ ଉପଲବ୍ଧି କରିବାକୁ ହେବ ବୋଲି ଯୋଶୀ ମତ ରଖିଛନ୍ତି।
ସେ କହିଲେ ଯେ, ବିମାନ ଚଳାଚଳ, ପ୍ରତିରକ୍ଷା ଏବଂ ମହାକାଶ ଗବେଷଣା କ୍ଷେତ୍ରରେ ହାଲ୍କା ଏବଂ ଉଚ୍ଚ ଯାନ୍ତ୍ରିକ ଦକ୍ଷତା ଥିବା ଖଣିଜ ଦ୍ରବ୍ୟର ଆବଶ୍ୟକତା ରହିବ। ସ୍ବଳ୍ପ ସମ୍ପଦ ଆଧାର ରହିଥିବା ୧୨ ମୂଲ୍ୟବାନ ଖଣିଜ ଦ୍ରବ୍ୟ ମଧ୍ୟରୁ ଲିଥିୟମ ଏବଂ କୋବାଲଟ ଗୁରୁତ୍ୱପୂର୍ଣ୍ଣ। ଦେଶ ମଧ୍ୟରେ ଖଣିଜ ଦ୍ରବ୍ୟର ଆବଶ୍ୟକତା ପୂରଣ, ବାଣିଜି୍ୟକ ଉପଯୋଗ ଲାଗି ବିଦେଶରେ ଖଣିଜ ସାମଗ୍ରୀ ଠାବ, ଅଧିଗ୍ରହଣ, ଉତ୍ତୋଳନ, ବିକାଶ,ଖନନ ଏବଂ ପ୍ରକ୍ରିୟାକରଣ ଭଳି ବିଭିନ୍ନ କ୍ଷେତ୍ରରେ ନୂଆ କମ୍ପାନୀ କାର୍ଯ୍ୟ କରିବ। ସେହିଭଳି ଖଣିଜ ଉତ୍ସ ଥିବା ଦେଶରେ ବାଣିଜି୍ୟକ ସୁଯୋଗ, ଜିଟୁଜି ସହଭାଗିତା, ଖଣିଜ ସମ୍ପତ୍ତିର ରଣନୈତିକ ଅଧିଗ୍ରହଣ ଏବଂ ନିବେଶ ଦ୍ୱାରା ଖଣିଜ ସଂଗ୍ରହ ଉପରେ ଏହା ଧ୍ୟାନ କେନ୍ଦ୍ରିତ କରିବ। ଅଷ୍ଟ୍ରେଲିଆ, ଆମେରିକା ଏବଂ ଦକ୍ଷିଣ ଆଫ୍ରିକା ଭଳି ଖଣି ସମୃଦ୍ଧ ରାଷ୍ଟ୍ର ସହ ସହଭାଗିତା ସ୍ଥାପନରେ ଏହି କମ୍ପାନୀ କାର୍ଯ୍ୟ କରିବ ବୋଲି ସୂଚନା ରହିଛି।