ଲକ୍ଷ୍ନୌ,୬।୮:ଉତ୍ତର ପ୍ରଦେଶର ମୁରାଦାବାଦ୍ରେ ଏକ ଅଭାବନୀୟ ଘଟଣା ଘଟିଛି। ବିବାହ ପରେ ନୂଆବୋହୂର ହାତରନ୍ଧା ପ୍ରଥମଥର ଖାଇ ଡାକ୍ତରଖାନାରେ ପହଞ୍ଚିଛନ୍ତି ପୂରା ପରିବାର। ଖାଦ୍ୟରେ ନିଶା ଔଷଧ ଦେଇ ସମସ୍ତଙ୍କୁ ବେହୋସ୍ କରିବା ପରେ ସବୁ ସୁନାଗହଣା, ଟଙ୍କା ନେଇ ଫେରାର୍ ହୋଇଯାଇଛନ୍ତି ବୋହୂ। ପୋଲିସ୍ରେ ଅଭିଯୋଗ ପରେ ତଦନ୍ତ ଆରମ୍ଭ ହୋଇଛି। ସୂଚନାଯୋଗ୍ୟ, ସିଭିଲ୍ ଲାଇନ୍ସ ଥାନା ଅନ୍ତର୍ଗତ ଝାଝନପୁର ନିବାସୀ ସଞ୍ଜୟ ସଇନି(୩୨) ହୋଟେଲରେ କାମ କରନ୍ତି। ଅଗଷ୍ଟ ୨ରେ ମନ୍ଦିରରେ ସେ ବରେଲିର ପୂଜା ନାମକ ଜଣେ ଯୁବତୀଙ୍କୁ ବିବାହ କରିଥିଲେ। ବିବାହ ପରେ ଘରେ ଖୁସିର ମାହୋଲ ଥିଲା। ସଞ୍ଜୟଙ୍କ ବନ୍ଧୁ ପରିବାର ମଧ୍ୟ ଘରେ ଥିଲେ। ନୂଆବୋହୂ ସମସ୍ତଙ୍କ ପାଇଁ ଖାଦ୍ୟ ପ୍ରସ୍ତୁତ କରିଥିଲେ। ଖାଇବା ପରେ ଜଣଙ୍କ ପରେ ଜଣେ ବେହୋସ ହେବାକୁ ଲାଗିଥିଲେ। ତୁରନ୍ତ ସେମାନଙ୍କୁ ଡାକ୍ତରଖାନାରେ ଭର୍ତ୍ତି କରାଯାଇଥିଲା। ଏହି ସୁଯୋଗରେ ବୋହୂ ସୁନାଗହଣା ଓ ଟଙ୍କା ନେଇ ଫେରାର୍ ହୋଇଯାଇଥିଲେ।