ସେଣ୍ଟ ଜୋନ୍ସ (ଆଣ୍ଟିଗୁଆ), ୯।୭(ପି.ଟି.)- ବିଶ୍ୱକପ୍ ସେମିଫାଇନାଲରେ ପ୍ରବେଶ କରିବାରେ ବିଫଳ ହୋଇଥିବା ଓ୍ବେଷ୍ଟଇଣ୍ଡିଜ କ୍ରିକେଟ୍ ପକ୍ଷରୁ ମଙ୍ଗଳବାର ନୂତନ କେନ୍ଦ୍ରୀୟ ଖେଳାଳି ଚୁକ୍ତି ତାଲିକା ପ୍ରକାଶ ପାଇଛି। ଯେଉଁଥିରେ ବିଶ୍ୱକପ୍ରେ ପ୍ରଭାବୀ ପ୍ରଦର୍ଶନ କରିଥିବା ଫାବିଆନ୍ ଆଲେନ, ନିକୋଲାସ ପୁରାନ ଓ ଓଶାନେ ଥୋମାସଙ୍କୁ ପ୍ରଥମଥର ଲାଗି କେନ୍ଦ୍ରୀୟ ଚୁକ୍ତିରେ ସ୍ଥାନ ମିଳିଛି। ସେହିଭଳି ୭ ଜଣ ଖେଳାଳିଙ୍କୁ ସମସ୍ତ ଫର୍ମାଟ୍ (ଟେଷ୍ଟ, ଦିନିକିଆ ଓ ଟି୨୦)ଲାଗି ଚୁକ୍ତିରେ ସାମିଲ କରାଯାଇଛି। ଏହି ୭ଜଣ ଖେଳାଳିଙ୍କ ମଧ୍ୟରେ ଡାରେନ ବ୍ରାଭୋ, ଶିମରନ ହେଟ୍ମେୟର, କେମୋ ପଲ୍, ଅଧିନାୟକ ଜାସନ ହୋଲ୍ଡର, ଶାଇ ହୋପ୍, ଅଲଜାରୀ ଜୋସେଫ୍ ଓ କେମାର ରୋଚ୍ ରହିଛନ୍ତି। ପୂର୍ବରୁ ମାତ୍ର ୪ ଜଣ ଖେଳାଳି ସମସ୍ତ ଫର୍ମାଟ୍ ଲାଗି କେନ୍ଦ୍ରୀୟ ଚୁକ୍ତିରେ ସ୍ଥାନ ପାଇଥିଲେ। ଏବେ କିନ୍ତୁ ଏଥିରେ ବ୍ରାଭୋ, ହେଟମେୟର ଓ ପଲ୍ଙ୍କୁ ସାମିଲ କରାଯାଇଛି। ମୋଟ୍ ଉପରେ ୧୯ ଜଣ ଖେଳାଳି ଆସନ୍ତା ଏକ ବର୍ଷ ଲାଗି ଏହି ଚୁକ୍ତିରେ ରହିଛନ୍ତି। ଏହାର ଅବଧି ଚଳିତ ଜୁଲାଇ ୧ରୁ ଆସନ୍ତାବର୍ଷ ଜୁନ୍ ୩୦ ପର୍ଯ୍ୟନ୍ତ ରହିଛି।
କ୍ରିକେଟ୍ ଓ୍ବେଷ୍ଟଇଣ୍ଡିଜ କେନ୍ଦ୍ରୀୟ ଚୁକ୍ତି ତାଲିକା (ପୁରୁଷ)- ଡାରେନ ବ୍ରାଭୋ, ଶିମରନ ହେଟ୍ମେୟର, ଜାସନ ହୋଲ୍ଡର, ଶାଇ ହୋପ୍, ଅଲ୍ଜାରୀ ଜୋସେଫ୍, କେମୋ ପଲ୍, କେମାର ରୋଚ୍ (ସମସ୍ତ ଫର୍ମାଟ୍ ଲାଗି), କ୍ରେଗ୍ ବାର୍ଥଓ୍ବେଟ୍, ଜନ୍ କ୍ୟାମ୍ପବେଲ, ରୋଷ୍ଟନ ଚେଜ୍, ଶାନେ ଡାର୍ଓ୍ବିଚ୍, ଶାନନ ଗ୍ରାବିଏଲ୍ ଓ ଜୋମେଲ ଓ୍ବାରିକାନ୍ (କେବଳ ଟେଷ୍ଟ ଲାଗି), ଫାବିଆନ ଆଲେନ, କାର୍ଲୋସ ବାର୍ଥଓ୍ବେଟ୍, ଶେଶଡନ କୋଟ୍ରେଲ, ନିକୋଲାସ ପୁରାନ, ରୋଭମାନ ପାଓ୍ବଲେ ଓ ଓଶାନେ ଥୋମାସ (କେବଳ ଦିନିକିଆ ପାଇ:)।