ପାରାଦୀପ,୯ା୩(ସ୍ବ.ପ୍ର.): ପାରାଦୀପ ଲକ୍ ଥାନା ଅନ୍ତର୍ଗତ ବାଲିଡିଆ ଗ୍ରାମରେ ସୋମବାର ଜଣେ ମହିଳା ନିଜର ହକ୍ ପାଇଁ ସ୍ବାମୀଙ୍କ ଘର ଆଗରେ ଧାରଣା ଦେଇଥିଲେ। ଅପରାହ୍ନରେ ପୋଲିସ ହସ୍ତକ୍ଷେପ କରି ସମ୍ପୃକ୍ତ ମହିଳାଙ୍କୁ ଥାନାକୁ ଡାକି ଆଲୋଚନା କରିଥିଲା। ଅନ୍ୟପକ୍ଷେ ସ୍ବାମୀ ଓ ତାଙ୍କ ପରିବାର ଲୋକେ ଘରେ ତାଲା ପକାଇ ଫେରାର ହୋଇଯାଇଛନ୍ତି। ସୂଚନା ଅନୁସାରେ ବାଲିଡିଆ ଗ୍ରାମର ନିରଞ୍ଜନ ରାଉତଙ୍କ ପୁଅ ଚନ୍ଦନଙ୍କ ସହ ସେହି ଥାନା ବଗଦିଆ ଗ୍ରାମର ସନ୍ତୋଷ ପ୍ରଧାନଙ୍କ ଝିଅ ମାନିନୀଙ୍କ ୨୦୧୬ ଜୁଲାଇ ୭ରେ ପ୍ରସ୍ତାବିତ ବିବାହ ହୋଇଥିଲା। ବିବାହର କିଛିଦିନ ପରେ ଅଧିକ ଯୌତୁକ ଦାବିରେ ସ୍ବାମୀ ଓ ତାଙ୍କ ପରିବାର ନିର୍ଯାତନା ଦେବାରୁ ମାନିନୀ ୨୦୧୭ ଫେବୃୟାରୀ ୭ରେ ବାପଘରକୁ ପଳାଇ ଯାଇଥିଲେ। ଏହି ଘଟଣାରେ ଯୌତୁକ ନିର୍ଯାତନା ମାମଲା କୋର୍ଟରେ ବିଚାରାଧୀନ ରହିଛି। ଏପରିସ୍ଥଳେ ଚନ୍ଦନ ୨ବର୍ଷ ହେଲା ଦ୍ୱିତୀୟ ବିବାହ କରି ଅଲଗା ଜାଗାରେ ରହୁଥିଲେ। ଏବେ ଦ୍ୱିତୀୟ ପତ୍ନୀଙ୍କର ଏକ ବର୍ଷକର ଶିଶୁକନ୍ୟା ଅଛି। ସୋମବାର ଦ୍ୱିତୀୟ ପତ୍ନୀ ଚନ୍ଦନଙ୍କ ଘରକୁ ଯାଇଥିବା ଖବର ପାଇ ପ୍ରଥମ ପତ୍ନୀ ମାନିନୀ ତାଙ୍କ ଘର ଆଗରେ ଧାରଣା ଦେଇଥିଲେ।