ଭୁବନେଶ୍ୱର,୨ା୯(ବ୍ୟୁରୋ) : ସାରା ଦେଶରେ ନୂଆ ମୋଟର ଆଇନ ରବିବାରଠାରୁ ଲାଗୁ ହୋଇଛି। ଏହି ଆଇନ ଅନୁସାରେ ଟ୍ରାଫିକ ନିୟମ ଉଲ୍ଲଂଘନକାରୀଙ୍କଠାରୁ ୧୦ ଗୁଣା ଜରିମାନା ଆଦାୟ କରାଯାଉଛି। ପ୍ରଥମ ଦିନରେ ରାଜ୍ୟର ବିଭିନ୍ନ ଜିଲାର ଯାଞ୍ଚକୁ କଡ଼ାକଡ଼ି କରାଯାଇଛି। ବିଶେଷକରି କଟକ, ଭୁବନେଶ୍ୱର, ରାଉରକେଲା, ପୁରୀ ଓ ଅନ୍ୟ ସହରଗୁଡ଼ିକରେ ମଧ୍ୟ ପ୍ରଥମ ଦିନରେ ଯାଞ୍ଚକୁ କଡ଼ାକଡ଼ି କରାଯାଇଥିଲା। ଯେଉଁମାନେ ଟ୍ରାଫିକ ନିୟମ ଉଲ୍ଲଂଘନ କରିଥିଲେ ସେମାନଙ୍କଠାରୁ ପୋଲିସ ମୋଟା ରକମର ଜରିମାନା ଆଦାୟ କରିଛି। ଏପରିକି ପ୍ରଥମ ଦିନରେ ମଧ୍ୟ ବିନା ଲାଇସେନ୍ସରେ ଗାଡ଼ି ଚଲାଉଥିବା ସ୍କୁଲ ପିଲାଙ୍କୁ ପୋଲିସ ଧରି ଜରିମାନା ଆଦାୟ କରିଥିଲା।
ରାଜଧାନୀରେ ଟ୍ରାଫିକ୍ ପୋଲିସ ପକ୍ଷରୁ ରବିବାର ଯାଞ୍ଚକୁ କଡ଼ାକଡ଼ି କରାଯାଇଛି। ବିଭିନ୍ନ ଛକର ଦୁଇ ପାର୍ଶ୍ୱରେ ଟ୍ରାଫିକ୍ ପୋଲିସ ଛକି ରହୁଥିଲେ। ବିନା ହେଲମେଟ୍ କିମ୍ବା ସିଟ୍ବେଲ୍ଟ ବାନ୍ଧି ନ ଥିବା କାର ଚାଳକଙ୍କୁ ପୋଲିସ ମାଡ଼ି ବସୁଥିଲା। ଏପରିକି ଅନେକେ ନୂଆ ନିୟମ ବିଷୟରେ ଜାଣି ନ ଥିବା, ପରବର୍ତ୍ତୀ ସମୟରେ ଏଭଳି ଭୁଲ କରିବେ ନାହିଁ ବୋଲି କହିଥିଲେ ମଧ୍ୟ ପୋଲିସ ସେମାନଙ୍କୁ ଛାଡ଼ି ନ ଥିଲା। ବିଶେଷ କରି ଭୁବନେଶ୍ୱରର ଏଜି ଛକ, ନାଲ୍କୋ ଛକ, ରାଜମହଲ, ପଟିଆ, ରାମମନ୍ଦିର, ସିଆରପି, ଆଚାର୍ଯ୍ୟବିହାର, ଜୟଦେବବିହାର ଛକ ଆଦି ସ୍ଥାନରେ ବଡ଼ଧରଣର ଯାଞ୍ଚ ୧୦ ଗୁଣା…କରାଯାଉଥିଲା। ଏପରି କି ଜେବ୍ରା କ୍ରସିଂ ଉପରେ ଗାଡ଼ି ରଖିବା, ଫୁଟ୍ପାଥ୍ରେ ଗାଡ଼ି ଚଲାଇବା ମାତ୍ରେ ପୋଲିସ ଏକ ହଜାର ଟଙ୍କା ଜରିମାନା ଆଦାୟ କରିଥିଲା। ଅନେକ ଲୋକ ଜରିମାନା ପ୍ରତି ସତର୍କ ହୋଇପଡ଼ିଥିବା ମଧ୍ୟ ଦେଖିବାକୁ ମିଳିଥିଲା। କାରଣ ବାଇକ୍ ପଛରେ ବସିଥିବା ଲୋକ ମଧ୍ୟ ହେଲମେଟ୍ ପିନ୍ଧିଥିଲେ।
ଅନ୍ୟପକ୍ଷରେ ରବିବାର ସକାଳେ ଏକ ଘରୋଇ ଅନୁଷ୍ଠାନ ପକ୍ଷରୁ ଏଜି ଛକରେ ଲିଫଲେଟ୍ ବାଣ୍ଟି ଯାତ୍ରୀଙ୍କୁ ନୂଆ ଆଇନ ବିଷୟରେ ସଚେତନ କରିଥିଲେ। ଟ୍ରାଫିକ ନିୟମ ଉଲ୍ଲଂଘନ କରି ୧୦ ଗୁଣା ଜରିମାନା ଗଣିଥିବା ଅଧିକାଂଶ ଲୋକ ନୂଆ ମୋଟର ଆଇନ ବିଷୟରେ ଅବଗତ ନଥିବା କହିଛନ୍ତି। ଏଥିପାଇଁ ସଚେତନ କରିବା ଆବଶ୍ୟକ ବୋଲି ସେମାନେ କହିଥିଲେ। ଅନେକ ଯାତ୍ରୀଙ୍କଠାରୁ ଏଭଳି ଶୁଣିବା ପରେ ଶେଷରେ ପୋଲିସ ଡାକବାଜି ଯନ୍ତ୍ରରେ ରବିବାର ଏକାଧିକ ଛକରେ ଆଇନ ସମ୍ପର୍କରେ ସଚେତନ କରିଥିଲା। ଯେଉଁମାନେ ଟ୍ରାଫିକ ନିୟମ ଉଲ୍ଲଂଘନ କରି ଧରାପଡିଥିଲେ, ସେମାନେ ହଠାତ୍ ଏତେ ଗୁଡ଼ାଏ ଟଙ୍କା ଦେବାକୁ କୁଣ୍ଠାବୋଧ କରିଥିଲେ। ହେଲେ ପୋଲିସ ସେମାଙ୍କୁ ଛାଡିବା ପରିସ୍ଥିତିରେ ନଥିଲା। ଜରିମାନା ଯେଉଁମାନେ ଦେଉ ନ ଥିଲେ, ସେମାନଙ୍କ ଡ୍ରାଇଭିଂ ଲାଇସେନ୍ସ ରଖିବା ସହ ଗାଡ଼ି ଜବତ କରି ଟ୍ରାଫିକ୍ ଥାନାକୁ ନେଉଥିଲା। ପ୍ରଥମ ଦିନରେ ହେଲମେଟ୍ ପିନ୍ଧି ନ ଥିବା ବ୍ୟକ୍ତିଙ୍କଠାରୁ ଅଧିକ ଫାଇନ ଅସୁଲ ହୋଇଥିଲା। ଯେଉଁମାନେ ଧରାପଡୁଥିଲେ ସେମାନଙ୍କ ଗାଡିର ଡ୍ରାଇଭିଂ ଲାଇସେନ୍ସ ଏବଂ ଇନ୍ସ୍ୟୁରାନ୍ସ ଯାଞ୍ଚ କରିବା ପରେ ପ୍ରାୟତଃ ଇନ୍ସୁରାନ୍ସ ନ ଥିବା ଜଣାପଡିଛି।
ଆଗାମୀ ଦିନରେ ପୋଲିସ ପକ୍ଷରୁ ସରପ୍ରାଇଜ୍ ଯାଞ୍ଚ କରାଯିବ। ଯେଉଁ ସ୍ଥାନରେ ଯାଞ୍ଚ ହେବ ନାହିଁ ବୋଲି ଯାତ୍ରୀ ଭାବୁଥିବେ, ସେହି ସ୍ଥାନରେ ଚଢାଉ କରାଯାଇ ଯାଞ୍ଚ କରାଯିବ ବୋଲି କଟକ-ଭୁବନେଶ୍ୱର ଅତିରିକ୍ତ ଟ୍ରାଫିକ ଡିସିପି ଅମରେଶ ପଣ୍ଡା କହିଛନ୍ତି। ଡିସିପି ଅନୁପ ସାହୁ ଯାଞ୍ଚ ଚାଲିଥିବା ଅନେକ ଛକକୁ ଯାଇ ବୁଲି ଦେଖିଥିଲେ। ଏନେଇ ଡିସିପି ସାହୁ କହିଛନ୍ତି, ଆମେ ଲୋକଙ୍କୁ ସଚେତନ ହେବାକୁ କହୁଛୁ, ମୋଟା ରକମର ଜରିମାନା ଆଦାୟ କରିବା ଆମର ଉଦ୍ଦେଶ୍ୟ ନୁହେଁ।