ମୁମ୍ବାଇ: ହ୍ରିତିକ ରୋଶନ୍ଙ୍କ ଅଭିନୀତ ‘ସୁପର ୩୦’ ରିଲିଜ ଦିବସରେ ୧୧କୋଟି ଅର୍ଜନ କରିଥିବା ଟ୍ରେଡ୍ ରିପୋର୍ଟ୍ସ ପକ୍ଷରୁ ସୂଚନା ମିଳିଛି। ଉକ୍ତ ଫିଲ୍ମ ଗତ ଶୁକ୍ରବାର ଦେଶର ବିଭିନ୍ନ ମେଟ୍ରୋ ତଥା ସହରାଞ୍ଚଳର ପ୍ରେକ୍ଷାଳୟଗୁଡିକ (ବିଶେଷକରି ମୁମ୍ବାଇ ଓ ଦକ୍ଷିଣ ଭାରତର ବିଭିନ୍ନ ପ୍ରେକ୍ଷାଳୟ)ରେ ରିଲିଜ ହୋଇଥିବାବେଳେ ସଂଧ୍ୟା ପର୍ଯ୍ୟନ୍ତ ଭିଡ ପରିଲକ୍ଷିତ ହୋଇଥିଲା। ତେବେ ଆଗାମୀ ଦିନଗୁଡ଼ିକରେ ଏହି ଫିଲ୍ମ ଆଶାତୀତ ଲାଭ ଅର୍ଜନ କରିବା ଆଶା କରାଯାଉଛି। ଶୁକ୍ରବାର ଏହି ଫିଲ୍ମ ୧୧.୮୩କୋଟି ଟଙ୍କା ଅର୍ଜନ କରିଥିବା ଟ୍ରେଡ ଆନାଲିଷ୍ଟ ତରନ୍ ଆଦର୍ଶ ଶନିବାର ଟୁଇଟ୍ କରିଛନ୍ତି। ଚଳିତ ସପ୍ତାହରେ ଏକମାତ୍ର ଏହି ହିନ୍ଦୀ ଫିଲ୍ମ ରିଲିଜ ହୋଇଥିବାରୁ ଏହା ଆରମ୍ଭ ଦିନରୁ ହିଁ ହିଟ୍ ହେବା ଆଶା କରାଯାଉଥିଲା। ୨୦୧୭ ଜାନୁୟାରୀରେ ‘କାବିଲ୍’ ପରଠାରୁ ସୁପରଷ୍ଟାର ହ୍ରିତିକ୍ଙ୍କ ଅଭିନୀତ ଫିଲ୍ମର ଏହା ପ୍ରଥମ ରିଲିଜ୍। ଉକ୍ତ ଫିଲ୍ମ ପାଟ୍ନାର ଶିକ୍ଷାବିତ୍ ତଥା ‘ସୁପର-୩୦’ ପ୍ରୋଗ୍ରାମ୍ର ପ୍ରତିଷ୍ଠାତା ଆନନ୍ଦ କୁମାରଙ୍କ ଜୀବନ କାହାଣୀକୁ ଭିତ୍ତିକରି ଗଢ଼ି ଉଠିଛି।
