ବ୍ରହ୍ମପୁର ଅଫିସ ,୨ା୩: ବ୍ରହ୍ମପୁର ସହରରେ ରବିବାରରୁ ଯାନବାହନ ଯାଞ୍ଚ କଡାକଡି କରାଯାଇଛି। ସହରର ବିଭିନ୍ନ ଏଣ୍ଟ୍ରି ପଏଣ୍ଟରେ ଟ୍ରାଫିକ ପୋଲିସ ପକ୍ଷରୁ ଯାଞ୍ଚ କରାଯାଇଥିଲା। ରାତି ୧୦ଟା ସୁଦ୍ଧା ଟ୍ରାଫିକ ନିୟମ ଉଲ୍ଲଂଘନକାରୀଙ୍କୁ ୨ ଲକ୍ଷ ଟଙ୍କା ଜରିମାନା ଦେବାକୁ ଧାର୍ଯ୍ୟ କରାଯାଇଛି। ସଂଶୋଧିତ ମୋଟରଯାନ ଆଇନ ଅନୁସାରେ ପୋଲିସ ଆଇନ ଉଲ୍ଲଂଘନକାରୀଙ୍କୁ ଠାବ କରି ଜରିମାନା ଧାର୍ଯ୍ୟ କରିଛି। ସହରର ବିଭିନ୍ନ ଛକରେ ଲାଗିଥିବା ଆଇଟିଏମ୍ଏସ୍ (ଇଣ୍ଟିଗ୍ରେଟେଡ୍ ଟ୍ରାଫିକ୍ ମ୍ୟାନେଜମେଣ୍ଟ ସିଷ୍ଟମ) ମାଧ୍ୟମରେ ନିୟମ ଉଲ୍ଲଂଘନକାରୀଙ୍କୁ ଠାବ କରାଯାଇଛି। ଗୋଟିଏ ଦିନରେ ବିଭିନ୍ନ ଟ୍ରାଫିକ ନିୟମ ଉଲ୍ଲଂଘନକାରୀଙ୍କ ପାଖକୁ ୨ ଲକ୍ଷ ଟଙ୍କାର ଇ- ଚାଲାଣ ପଠାଯାଇଛି। ସେହିପରି ୩ ଜଣ ନିଶାସକ୍ତ ଗାଡି ଚାଳକଙ୍କୁ ଜରିମାନା ଧାର୍ଯ୍ୟ କରାଯାଇଥିବା ବେଳେ ସିଟ୍ବେଲ୍ଟ ବାନ୍ଧି ନ ଥିବା ୬ ଜଣ, ନୋ ପାର୍କିଂ ପାଇଁ ୬, ଟ୍ରିପଲ ରାଇଡିଂ ପାଇଁ ୫ ଜଣଙ୍କ ଉପରେ ଜରିମାନା ଧାର୍ଯ୍ୟ କରାଯାଇଛି। ୨୦୧୯ ସେପ୍ଟେମ୍ବରରୁ ୨୦୨୦ ମାର୍ଚ୍ଚ ପହିଲା ମଧ୍ୟରେ ବିଭିନ୍ନ ଟ୍ରାଫିକ ଉଲ୍ଲଂଘନକାରୀଙ୍କୁ କୋଟିଏ ଟଙ୍କାର ଜରିମାନା ଧାର୍ଯ୍ୟ କରାଯାଇଛି ବୋଲି ଟ୍ରାଫିକ ଡ଼ିଏସ୍ପି ସାର୍ଥକ ରାୟ ସୂଚନା ଦେଇଛନ୍ତି। ସେହିପରି ଆଗାମୀ ଦିନରେ ମଧ୍ୟ ଏଭଳି ଧରପଗଡ ଜାରି ରହିବ ବୋଲି ସେ କହିଛନ୍ତି।