ମେଲବୋର୍ନ, ୧୯।୬ (ପି.ଟି.)- କ୍ରିକେଟ୍ ଅଷ୍ଟ୍ରେଲିଆ (ସିଏ) ପ୍ରଥମଥର ଲାଗି ଏହାର ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ (ସିଇଓ) ପଦରେ ଜଣେ ମହିଳାଙ୍କୁ ନିଯୁକ୍ତ କରିବାକୁ ପ୍ରସ୍ତୁତ ରହିଛି। ଏହି ସମ୍ମାନଜନକ ପଦ ଲାଗି ଅନେକ ଯୋଗ୍ୟ ମହିଳା ପ୍ରାର୍ଥୀ ରହିଛନ୍ତି ବୋଲି ଅଷ୍ଟ୍ରେଲିଆ ମହିଳା କ୍ରିକେଟ୍ ଦଳର ଷ୍ଟାର୍ ଅଲ୍ରାଉଣ୍ଡର ଏଲିସ୍ ପେରୀ ଶୁକ୍ରବାର କହିଛନ୍ତି। ଚଳିତ ସପ୍ତାହ ପ୍ରାରମ୍ଭରେ କେଭିନ ପିଟରସନ ସିଇଓ ପଦରୁ ଇସ୍ତଫା ଦେବାପରେ ଏହି ପଦ ଖାଲି ପଡ଼ିଛି। ଟି୨୦ ବିଶ୍ୱକପ୍ର ମୁଖ୍ୟ କାର୍ଯ୍ୟନିର୍ବାହୀ ନିକ୍ ହକ୍ଲୀଙ୍କୁ ବର୍ତ୍ତମାନ ସିଏର ଅନ୍ତରୀଣ ସିଇଓ ଭାବେ ନିଯୁକ୍ତ କରାଯାଇଛି।
ବର୍ଷୀୟା ପେରୀ କହିଛନ୍ତି, ସିଏର ସ୍ଥାୟୀ ସିଇଓ ଲାଗି ପଶ୍ଚିମ ଅଷ୍ଟ୍ରେଲିଆର ମୁଖ୍ୟ କ୍ରିଷ୍ଟିନା ମାଥ୍ୟୁ ଭଲ ବିକଳ୍ପ ହୋଇପାରନ୍ତି। ‘ମୋତେ ଲାଗୁଛି କ୍ରିକେଟ୍ ଅଷ୍ଟ୍ରେଲିଆ ଲମ୍ବା ସମୟ ପର୍ଯ୍ୟନ୍ତ ଏହାର ସିଇଓ ପଦରେ ଜଣେ ମହିଳାଙ୍କୁ ନିଯୁକ୍ତ ଦେବାକୁ ପ୍ରସ୍ତୁତ ହେଉଛି। ସିଇଓ ପଦ ଲାଗି ହୋଇଥିବା ଅନ୍ତିମ ପର୍ଯ୍ୟାୟ ଆଲୋଚନାରେ କ୍ରିଷ୍ଟିନାଙ୍କ ନାମକୁ ନେଇ ମଧ୍ୟ ଚର୍ଚ୍ଚା ହୋଇଥିଲା। ଏହା କୌଣସି ନୂଆ କଥା ନୁହେଁ। କ୍ରିକେଟ୍ ଅଷ୍ଟ୍ରେଲିଆର କିଛି ଉଚ୍ଚ ପଦରେ ମହିଳା ନିଯୁକ୍ତ ହୋଇସାରିଛନ୍ତି, ଯେଉଁମାନେ କି ବୋର୍ଡକୁ ଚଳାଇବାରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରୁଛନ୍ତି। ସେମାନଙ୍କ ମଧ୍ୟରେ ବେଲିଣ୍ଡା କ୍ଲାର୍କ, ଷ୍ଟିଫ୍ ବେଲ୍ଟ୍ରମ ପ୍ରମୁଖ ରହିଛନ୍ତି ବୋଲି ପେରୀ ଏହି ଅବସରରେ କହିଛନ୍ତି। ଏଠାରେ ଉଲ୍ଲେଖଯୋଗ୍ୟ, କରୋନା ଭାଇରସ୍ ଲାଗି ଆର୍ଥିକ ସଙ୍କଟ ଦେଇ ଗତି କରୁଥିବା କ୍ରିକେଟ୍ ଅଷ୍ଟ୍ରେଲିଆ ପୂର୍ବରୁ ବ୍ୟାଟିଂ କୋଚ୍ ଗ୍ରାଏମ ହିକ୍ଙ୍କ ସମେତ ଏହାର ୪୦ ଜଣ କର୍ମଚାରୀଙ୍କୁ ଛଟେଇ କରିଥିଲା।
