କୋଝିକୋଡ: ସମୁଦ୍ରର ଅଥଳ ଜଳରାଶିଠାରୁ ଆରମ୍ଭ କରି ଏଭେରଷ୍ଟ, ଆମାଜନର ଘଞ୍ଚ ଜଙ୍ଗଲରୁ ସାହାରାର ବିସ୍ତୀର୍ଣ୍ଣ ମରୁପ୍ରାନ୍ତ ଯାଏ ସବୁଠି ମନୁଷ୍ୟକୃତ ଆବର୍ଜନାର ପାହାଡ଼। ଜାଣତ କିମ୍ବା ଅଜାଣତରେ ପ୍ରାକୃତିକ ପରିବେଶରେ ଏପରି ହସ୍ତକ୍ଷେପ ଏବେ ମଣିଷ ଜାତି ପାଇଁ ବୁମେରାଂ ପାଲଟିଛି। ଏହାଦ୍ୱାରା ଯେ କେବଳ ମାନବ ସଭ୍ୟତା ଧ୍ୱଂସ ପାଇବା ଆଶଙ୍କା ରହିଛି ତାହା ନୁହେଁ, ବରଂ ଏହା ଅନ୍ୟ ପ୍ରାଣୀଙ୍କୁ ମଧ୍ୟ ବିଲୁପ୍ତ ଅବସ୍ଥାକୁ ଟାଣିନେଲାଣି। ବଢୁଥିବା କଂକ୍ରିଟ ଜଙ୍ଗଲ ଏବଂ କମୁଥିବା ସବୁଜ ବନାନୀ ପାଇଁ ଅନେକ ଜୀବଜନ୍ତୁ ବଞ୍ଚତ୍ବାକୁ ସଂଘର୍ଷ କରୁଛନ୍ତି। ଏପରି ସ୍ଥିତିରେ ଲୋକଙ୍କ ମଧ୍ୟରେ ଜାଗରଣ ସୃଷ୍ଟି କରିବାକୁ କେରଳର କୋଝିକୋଡ଼ରେ ନିର୍ମାଣ କରାଯାଉଛି ପୃଥିବୀର ପ୍ରଥମ ସାମୁଦ୍ରିକ କବରଖାନା। ବିଲୁପ୍ତ ହୋଇସାରିଥିବା ମାଛମାନଙ୍କ ପାଇଁ ଏହାକୁ ଉତ୍ସର୍ଗ କରାଯାଇଛି।
ବିଷାକ୍ତ ହେବାରେ ଲାଗିଛି ପରିବେଶ। ଜଳ, ବାୟୁ ଭଳି ପ୍ରାକୃତିକ ତତ୍ତ୍ୱ ଉପରେ ମନୁଷ୍ୟର ଅଯଥା ହସ୍ତକ୍ଷେପ ଜୀବନଚକ୍ରକୁ ପ୍ରଭାବିତ କରୁଛି। ଏଥିରେ ସର୍ବାଧିକ ପ୍ରଭାବିତ ହେଉଛି ସମୁଦ୍ର। ସବୁଜଗ୍ରହ ପୃଥିବୀର ଅନ୍ୟତମ ଗୁରୁତ୍ୱପୂର୍ଣ୍ଣ ଅଙ୍ଗ ସମୁଦ୍ର ଏବେ ଆବର୍ଜନାକୁଣ୍ଡରେ ପରିଣତ ହେଲାଣି। ଏହାଦ୍ୱାରା କେତେ ଯେ ସାମୁଦ୍ରିକ ଜୀବ ବିଲୁପ୍ତ ହୋଇସାରିଲେଣି ତାହା କଳିବା ଅସମ୍ଭବ। ଖାସ୍ ଏହି କଥାକୁ ଜନମାନସରେ ପ୍ରଚାର କରିବାକୁ ସେଠାକାର ଜିଲା ପ୍ରଶାସନ ଆରମ୍ଭ କରିଛି ‘କ୍ଲିନ ବିଚ୍ ମିଶନ’। ଏଥିସହ ପ୍ରଶାସନ, ବେପୋର ପୋର୍ଟ ଏବଂ ଜେଲିଫିସ୍ ଓ୍ବାଟରସ୍ପୋଟର୍ସର ମିଳିତ ସହଯୋଗରେ ନିର୍ମାଣ କରାଯାଉଛି ଏହି ସାମୁଦ୍ରିକ କବରସ୍ଥାନ। ସବୁଠାରୁ ମଜାକଥା ହେଉଛି, ଏହାର ଢାଞ୍ଚା ତିଆରି ହେଉଛି ସିଙ୍ଗଲ ୟୁଜଡ ପ୍ଲାଷ୍ଟିକ୍ରେ। ଏହାକୁ ବିଲୁପ୍ତ ହୋଇସାରିଥିବା ୮ ପ୍ରଜାତିର ସାମୁଦ୍ରିକ ମାଛଙ୍କ ଉଦ୍ଦେଶ୍ୟରେ ସମର୍ପତ କରାଯାଇଛି। ଏଥିରେ ରହିଛି ସି-ହର୍ସ, ପ୍ୟାରଟ ଫିସ, ଇଗଲରେସ୍, କଇଁଛ, ଜେବ୍ରା ସାର୍କ, ହାମରହେଡ୍ ଭଳି ବିଲୁପ୍ତ ପ୍ରଜାତିର ସାମୁଦ୍ରିକ ଜୀବ। କେବଳ ଏତିକି ନୁହେଁ, ସ୍ଥାନୀୟ ମଧୁର ଜଳ ମାଛ ‘ମିସ୍ କେରଳ’ର ସ୍ମାରକୀ ମଧ୍ୟ ଏଠାରେ ସ୍ଥାନ ପାଇଛି।
ମିଶନ ସମ୍ପର୍କରେ ପୋର୍ଟ ଅଫିସର କ୍ୟାପ୍ଟେନ୍ ଅଶ୍ୱିନୀ ପ୍ରତାପ କୁହନ୍ତି, ସିଙ୍ଗଲ ୟୁଜ୍ଡ ପ୍ଲାଷ୍ଟିକରୁ ବଢୁଥିବା ପ୍ରଦୂଷଣ ବିଷୟରେ ଲୋକଙ୍କୁ ସଚେତନ କରାଇବା ଉଦ୍ଦେଶ୍ୟରେ ଏହା ହେଉଛି ଏକ ପ୍ରତୀକାତ୍ମକ ସ୍ମାରକ। ମଣିଷ ସବୁବେଳେ ଅନ୍ୟ ଜୀବଙ୍କ ଆବାସସ୍ଥଳୀରେ ହସ୍ତକ୍ଷେପ କରୁଛି। ସମୁଦ୍ର, ନଦୀରେ ପ୍ଲାଷ୍ଟିକ ଭଳି ବିପଜ୍ଜନକ ଆବର୍ଜନା ଫିଙ୍ଗିବା ଫଳରେ ଅନେକ ଜୀବ ବିଲୁପ୍ତ ଅବସ୍ଥାକୁ ଆସିଗଲେଣି। ଏହି ସ୍ମାରକ ଲୋକଙ୍କୁ ପ୍ଲାଷ୍ଟିକ ବ୍ୟବହାରର ସାଂଘାତିକ ପରିଣାମ ବିଷୟରେ ଅବଗତ କରାଇବ। ଏକ ରିପୋର୍ଟ ଅନୁଯାୟୀ ପାଣି ଓ ପବନରେ ବଢୁଥିବା ପ୍ରଦୂଷଣ ଯୋଗୁ ପୃଥିବୀର ୭୦୦ ପ୍ରଜାତିର ଜୀବ ଅସ୍ତିତ୍ୱ ବଞ୍ଚାଇବାକୁ ସଂଘର୍ଷ
କରୁଛନ୍ତି।