ଭୁବନେଶ୍ୱର,୭ା୮(ବ୍ୟୁରୋ): ଓଡ଼ିଶା ରାଜ୍ୟ ସମବାୟ କୃଷି ଓ ଗ୍ରାମ୍ୟ ଉନ୍ନୟନ ବ୍ୟାଙ୍କର କର୍ମଚାରୀମାନେ ପ୍ରାୟ ଆଠ ବର୍ଷ ହେବ ଦରମା ପାଇ ନାହାନ୍ତି। ଏମାନେ ଦୀର୍ଘ ବର୍ଷ ଧରି ରାଜ୍ୟ ସରକାରଙ୍କ ଅଧୀନରେ କାର୍ଯ୍ୟ କରିଆସୁଥିଲେ ମଧ୍ୟ ସରକାର ସେମାନଙ୍କ ଦରମା ରୋକି ଦେଇଥିବା ଅଭିଯୋଗ ହୋଇଛି। ଏ ନେଇ ମଙ୍ଗଳବାରଠାରୁ ଓଡ଼ିଶା କାର୍ଡ ବ୍ୟାଙ୍କ କର୍ମଚାରୀ ସଂଘ ବିଭାଗୀୟ ମୁଖ୍ୟ କାର୍ଯ୍ୟାଳୟରେ ଥିବା ସମବାୟ ସମିତି ନିବନ୍ଧକଙ୍କ କାର୍ଯ୍ୟାଳୟ ସମ୍ମୁଖରେ ଧାରଣା ଦେଇଛନ୍ତି। ସୂଚନାଯୋଗ୍ୟ, ଏହି ବ୍ୟାଙ୍କଗୁଡିକୁ ନାବାର୍ଡ ଆର୍ଥତ୍କ ଯୋଗାଉଥିବାବେଳେ ୨୦୦୩ ପରଠାରୁ ନେଣଦେଣ ଏକରକମ ବନ୍ଦ କରିଦେଇଥିଲା। ଯାହାଫଳରେ ବ୍ୟାଙ୍କଗୁଡିକ ଧୀରେ ଧୀରେ ଦେବାଳିଆ ହୋଇ ପଡିଥିଲା। ପରେ ଏହି ସଂସ୍ଥାଗୁଡିକୁ ସକ୍ରିୟ କରିବା ଲାଗି କାର୍ଡ ବ୍ୟାଙ୍କ ପରିଷଦ ଗଠନ ହୋଇଥିଲା। ହେଲେ ପରିଷଦ ଗଠନ ହେବାର ୪ ବର୍ଷ ବିତିଗଲାଣି କିନ୍ତୁ ଗୋଟିଏ ବି ବ୍ୟାଙ୍କ ସଚଳକ୍ଷମ ହୋଇନି ବୋଲି ସଂଘ ଅଭିଯୋଗ କରିଛି। ଏଭଳି ଅବସ୍ଥାରେ ବ୍ୟାଙ୍କ ଦେବାଳିଆ ହୋଇଥିବାବେଳେ ସରକାର ଆଠ ବର୍ଷ ହେବ କର୍ମଚାରୀମାନଙ୍କୁ ବି ଦରମା ଦେଉ ନାହାନ୍ତି। କେତେକ କର୍ମଚାରୀଙ୍କୁ ପୂର୍ବରୁ ଦରମା ମିଳି ଆସୁଥିଲେ ବି ଗତ ଦୁଇ ବର୍ଷ ହେବ ଅବୈତନିକ ଭାବେ ଖଟୁଛନ୍ତି। ଏନେଇ ସଂଘ ବାରମ୍ବାର ବିଭାଗୀୟ ସଚିବଙ୍କୁ ଗୁହାରି କରିଥିଲେ ସୁଦ୍ଧା କୌଣସି ସୁଫଳ ମିଳିନି। ଏବେ ସମୂହ ସ୍ବେଚ୍ଛାକୃତ ଅବସର ନେବା ଲାଗି ସଂଘ ନିଷ୍ପତ୍ତି ନେଇଛି। ମଙ୍ଗଳବାର ନିବନ୍ଧକଙ୍କ ସହ ସଂଘର ଆଲୋଚନା ବେଳେ ନିବନ୍ଧକ କହିଛନ୍ତି ଯେ, ଏହା ତାଙ୍କ ପରିସର ଭୁକ୍ତ ନୁହେଁ। ସମୂହ ଅବସର ଲାଗି ମନ୍ତ୍ରୀ ଓ ସଚିବ ସ୍ତରୀୟ ବୈଠକର ଆବଶ୍ୟକତା ଅଛି। ଏ ବିଷୟରେ ନିବନ୍ଧକ ବିଭାଗକୁ ଚିଠି ଲେଖି ଜଣାଇଛନ୍ତି। ବିଭାଗ ପକ୍ଷରୁ ବୈଠକ ପାଇଁ ସୂଚନା ଆସିଲେ ସଂଘକୁ ଜଣାଇବେ।