କେନ୍ଦ୍ରାପଡା ଅଫିସ, ୧୮ା୩: କରୋନା ସମ୍ପର୍କରେ ଗୁଜବ ସୃଷ୍ଟି ନ କରିବା ପାଇଁ ରାଜ୍ୟ ଓ କେନ୍ଦ୍ର ସରକାର ଆଡଭାଇଜରି ଜାରି କରିଛନ୍ତି। ତେବେ ଏହାକୁ ଅମାନ୍ୟ କରି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି କରୋନା ଭୂତାଣୁରେ ସଂକ୍ରମିତ ହୋଇଛନ୍ତି ବୋଲି ସାମାଜିକ ଗଣମାଧ୍ୟମ ହ୍ବାଟସ୍ଆପ୍ରେ ପୋଷ୍ଟ କରିବା ପରେ କେନ୍ଦ୍ରାପଡ଼ା ଜିଲାର ୪ ଜଣ ମଙ୍ଗଳବାର ଗିରଫ ହୋଇଛନ୍ତି। କେନ୍ଦ୍ରାପଡ଼ା ଟାଉନ ଥାନାର ଏସ୍ଆଇ ଅନ୍ତର୍ଯ୍ୟାମୀ ବିଶ୍ୱାଳ ଅଭିଯୁକ୍ତମାନଙ୍କ ବିରୋଧରେ ୪୩/୨୦ ନମ୍ବରରେ ମାମଲା ରୁଜୁ କରିଛନ୍ତି। ଏଥିସହିତ ଏହି ପୋଷ୍ଟକୁ ହ୍ବାଟସ୍ଆପ୍ରେ ଶେୟାର କରିଥିବା ୧୦ରୁ ଊର୍ଦ୍ଧ୍ୱ ବ୍ୟକ୍ତିଙ୍କ ସମ୍ପର୍କରେ ତନାଘନା ଚାଲିଛି। ଗିରଫ ବ୍ୟକ୍ତିମାନେ ହେଲେ ଏକ ୱେବ ମିଡିଆର ଖବରଦାତା ପ୍ରଫୁଲ୍ଲ ଦାସ, ହ୍ବାଟସ୍ ଆପ୍ ଗ୍ରୁପ୍ରେ ଆଡମିନ୍ ଶିବାଶିଷ ମହାନ୍ତି, ଧୃତିରଞ୍ଜନ ବାରିକ ଓ ଗୁଜବକୁ ଅନ୍ୟ ଗ୍ରୁପ୍କୁ ଶେୟାର କରିଥିବା କଂସାର ଗ୍ରାମର ନିରଞ୍ଜନ ପରିଡା। ଏମାନଙ୍କ ବିରୋଧରେ ଆଇପିସି ଦଫା ୧୮୮, ୫୦୦, ୫୦୧, ୩୪ ଏବଂ ଆଇଟି ଆକ୍ଟ ୨୦୦୦ର ୬୬ ଏଫ୍(ଏ) ଲାଗୁ ହୋଇଛି। ସୋମବାର ବିଳମ୍ବିତ ରାତିରେ ଦୁଇଟି ହ୍ବାଟସ୍ଆପ୍ ଗ୍ରୁପ୍ରେ ପ୍ରଧାନମନ୍ତ୍ରୀଙ୍କ ସମ୍ପର୍କରେ ଉପରୋକ୍ତ ଗୁଜବ ପୋଷ୍ଟ ହୋଇଥିଲା। ଏହା ଲୋକଲୋଚନକୁ ଆସିବାର ପ୍ରାୟ ୮ ଘଣ୍ଟା ପରେ ତାହାକୁ ଡିଲିଟ କରାଯାଇଛି। ତେବେ ପୋଷ୍ଟଟି ଲୋକଲୋଚନକୁ ଆସିବା ପରେ ଜିଲା ଭାଜପା ପକ୍ଷରୁ ସମ୍ପୃକ୍ତ ଗୁଜବ ସୃଷ୍ଟିକାରୀଙ୍କ ପ୍ରତି ତୁରନ୍ତ କାର୍ଯ୍ୟାନୁଷ୍ଠାନ ନେବା ପାଇଁ ଜିଲା ପୋଲିସକୁ ଫୋନଯୋଗେ ଅନୁରୋଧ ଆସିଥିଲା। ଘଟଣାର ଗୁରୁତ୍ୱ ଦୃଷ୍ଟିରୁ ଅଭିଯୁକ୍ତମାନଙ୍କୁ ଗିରଫ କରାଯାଇଥିଲା। ୪ ଅଭିଯୁକ୍ତଙ୍କ ଜାମିନ ଆବେଦନକୁ ଏସ୍ଡିଜେଏମ୍ ନାକଚ କରିବା ପରେ ସେମାନଙ୍କୁ ବାରିମୂଳ ଉପକାରାଗାରକୁ ପଠାଯାଇଛି।