ନୂଆଦିଲ୍ଲୀ,୨୨।୧୨: ନୂଆଦିଲ୍ଲୀର ରାମଲୀଳା ମଇଦାନରେ ଶନିବାର ଆୟୋଜିତ ହୋଇଥିବା ଭାଜପାର ଧନ୍ୟବାଦ ରାଲିକୁ ସମ୍ବୋଧିତ କରିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି। ଏହି ଅବସରରେ ସଂଶୋଧିତ ନାଗରିକତ୍ୱ ଆଇନ(ସିଏଏ)କୁ ବିରୋଧ କରି ସମଗ୍ର ଦେଶରେ ହେଉଥିବା ହିଂସା ପାଇଁ ବିରୋଧୀ ଦଳ ଦାୟୀ ବୋଲି ସେ କହିଛନ୍ତି। ପ୍ରଧାନମନ୍ତ୍ରୀଙ୍କ ଏହି ମନ୍ତବ୍ୟକୁ କଡ଼ା ସମାଲୋଚନା କରିଛି କଂଗ୍ରେସ। କଂଗ୍ରେସର ବରିଷ୍ଠ ନେତା ଆନନ୍ଦ ଶର୍ମା କହିଛନ୍ତି, ”ଦେଶରେ ଯେଉଁ ଅନିଶ୍ଚିତତା ଓ ଭୟର ପରିସ୍ଥିତି ଆମ ଦ୍ୱାରା ନୁହେଁ, ପାର୍ଲାମେଣ୍ଟରେ ତାହା ସ୍ବରାଷ୍ଟ୍ର ମନ୍ତ୍ରୀଙ୍କ ମନ୍ତବ୍ୟରୁ ହିଁ ସୃଷ୍ଟି ହୋଇଛି। ତେଣୁ ସରକାର ଏଥିପାଇଁ ଦାୟୀ। ପ୍ରଧାନମନ୍ତ୍ରୀ ଯଦି ଏହି ଆନ୍ଦୋଳନକୁ ନେଇ ଚିନ୍ତିତ, ତେବେ ସମସ୍ତ ରାଜ୍ୟର ମୁଖ୍ୟମନ୍ତ୍ରୀଙ୍କୁ ଡାକି ବୈଠକ କରିବା ସହ ଏନେଇ ଆଲୋଚନା କରିବା ଆବଶ୍ୟକ“ ବୋଲି ଶର୍ମା କହିଛନ୍ତି। ସୂଚନାଯୋଗ୍ୟ, ରାମଲୀଳା ମଇଦାନରେ ସିଏଏ ହିଂସା ପାଇଁ ବିରୋଧୀ ଦଳ ଦାୟୀ। ବିରୋଧୀ ଦଳଗୁଡ଼ିକ ଭୁଲ ଭିଡିଓ ଜାରି କରି ହିଂସାକୁ ପ୍ରୋତ୍ସାହନ ଦେଉଥିବା ପ୍ରଧାନମନ୍ତ୍ରୀ କହିଥିଲେ।