ରସୁଲପୁର,୩।୧(ଡି.ଏନ୍.ଏ.)- ଯାଜପୁର ଜିଲାର ରସୁଲପୁର ବ୍ଲକରେ ପ୍ରଧାନମନ୍ତ୍ରୀ ଆବାସ ପାଇଁ ଅଗ୍ରାଧିକାର ତାଲିକା ଦ୍ୱନ୍ଦ୍ୱ ସରୁନି। ବିଡିଓ ଉମାକାନ୍ତ ପରିଡ଼ାଙ୍କ ତତ୍ତ୍ୱାବଧାନରେ ଏକାଧିକ ଦଳ ତଦନ୍ତରେ ସାମିଲ ହୋଇ ପଞ୍ଚାୟତରୁ ପଞ୍ଚାୟତବୁଲି ସ୍ଥିତି ସମୀକ୍ଷା କରିବା ସହ ଯୋଗ୍ୟ ହିତାଧିକାରୀ ବାଛୁଛନ୍ତି। ପଞ୍ଚାୟତ ଦାୟିତ୍ୱରେ ଥିବା ଅଧିକାଂଶ ନିର୍ବାହୀ ଅଧିକାରୀ ଅଗ୍ରାଧିକାର ତାଲିକା ପ୍ରସ୍ତୁତ କରିବାରେ ବିଫଳତା ପ୍ରକାଶ କରୁଛନ୍ତି। ତେଣୁ ପିଇଓଙ୍କ ଅନୁରୋଧ କ୍ରମେ ବିଡିଓଙ୍କ ପକ୍ଷରୁ ସମ୍ପୃକ୍ତ ପଞ୍ଚାୟତରେ ତଦନ୍ତ କରାଯାଉଛି। ବୁଧବାର ବିଡିଓ ପରିଡ଼ାଙ୍କ ନେତୃତ୍ୱରେ ୧୦ଗୋଟି ଦଳ କଲଣ ପଞ୍ଚାୟତରେ ଘରକୁ ଘର ବୁଲି ତଦନ୍ତ କରିବା ଘଟଣାରୁ ଏହା ସ୍ପଷ୍ଟ ହୋଇଯାଇଛି। ଇତିମଧ୍ୟରେ ବିଡିଓ ଓ ତାଙ୍କ ଦ୍ୱାରା ଗଠନ କରାଯାଇଥିବା ତଦନ୍ତକାରୀ ଦଳଗୁଡ଼ିକ ବ୍ଲକର ଟିକରପଡ଼ା, ପହଁଗା, ଲକ୍ଷ୍ମୀନଗର, ବାରବାଟୀ, ଶ୍ରୀବନ୍ତପୁର ପ୍ରଭୃତି ପଞ୍ଚାୟତରେ ତଦନ୍ତ କାର୍ଯ୍ୟ ସାରିଥିବା ଜଣାପଡ଼ିଛି।
ପ୍ରାପ୍ତ ସୂଚନାରୁ ଜଣାଯାଏ ପ୍ରଧାନମନ୍ତ୍ରୀ ଆବସରୁ ବଞ୍ଚତ୍ତ ଯୋଗ୍ୟ ହିତାଧିକାରୀ ବାଛି ଅଗ୍ରାଧିକାର ତାଲିକା ପ୍ରସ୍ତୁତ କରିବା ପାଇଁ ନିର୍ଦ୍ଦେଶ ରହିଛି। ଏହି ସରକାରୀ ସୁବିଧା ପାଇଁ ପ୍ରତ୍ୟେକ ପଞ୍ଚାୟତରେ ଶତାଧିକ ପରିବାର କ’ ଫର୍ମରେ ଆବେଦନ କରିଥିଲେ। ପଞ୍ଚାୟତ ନିର୍ବାହୀ ଅଧିକାରୀଗଣ ଆବେଦନ ଫର୍ମ ଗୁଡ଼ିକୁ ତାଲିକାଭୂକ୍ତ କରିଥିଲେ। ଏଥିରେ ବହୁ ଅଯୋଗ୍ୟ ହିତାଧିକାରୀଙ୍କ ନାମ ଥିବା ନେଇ ଜଣାପଡ଼ିଥିଲା। ଏହି ତାଲିକାକୁ ସଂଶୋଧନ କରିବା ଦିଗରେ ନିର୍ବାହୀ ଅଧିକାରୀଙ୍କୁ ବହୁ ଅସୁବିଧାର ସମ୍ମୁଖୀନ ହେବାକୁ ପଡ଼ିଥିଲା। ଅଯୋଗ୍ୟଙ୍କ ନାମକୁ ତାଲିକାରେ ସ୍ଥାନ ଦେବାକୁ ପଞ୍ଚାୟତସ୍ତରୀୟ ନେତା ଓ ପ୍ରଭାବଶାଳୀ ବ୍ୟକ୍ତିଙ୍କ ଚାପରେ ଅଧିକାରୀମାନେ ଏକପ୍ରକାର ବ୍ୟତିବ୍ୟସ୍ତ ହୋଇଥିବା ଜଣାପଡ଼ିଛି। ଏପରି କି କେତେକ ପଞ୍ଚାୟତରେ ଆବାସ ତାଲିକା ଦ୍ୱନ୍ଦ୍ୱ ନ ଛିଡ଼ିବାରୁ ତଦନ୍ତ ଅଧିକାରୀମାନେ ବିଡିଓଙ୍କୁ ଅବଗତ କରାଇବା ସହ ଏଦିଗରେ ସ୍ବତନ୍ତ୍ର ତଦନ୍ତ କରାଇବାକୁ ଅନୁରୋଧ କରାଯାଇଥିଲା। ସେହି ମୁତାବକ ବିଡିଓଙ୍କ ନେତୃତ୍ୱରେ ୫୦ଜଣ ବ୍ଲକ କର୍ମଚାରୀଙ୍କୁ ନେଇ ତଦନ୍ତକାରୀ ଦଳ ଗଠନ କରାଯାଇ ଘରଘର ବୁଲି ଯୋଗ୍ୟ ହିତାଧିକାରୀଙ୍କୁ ଖୋଜାଯାଇଛି। ଆସନ୍ତା ସପ୍ତାହ ସୁଦ୍ଧା ରିପୋର୍ଟ ଆସିବା ପରେ ଚୁଡ଼ାନ୍ତ ତାଲିକା ପ୍ରସ୍ତୁତ ହେବ ବୋଲି ବିଡିଓ ପରିଡ଼ା ପ୍ରକାଶ କରିଛନ୍ତି। ତଦନ୍ତରେ ଏବିଡିଓ ଉପେନ୍ଦ୍ର ଜେନା, ସହକାରୀ ନିର୍ବାହୀ ଯନ୍ତ୍ରୀ ନମିତା ହାଁସଦା, ବ୍ଲକ ସମାଜ ମଙ୍ଗଳ ଅଧିକାରୀ ବିବେକାନନ୍ଦ ସାମଲ, କନିଷ୍ଠ ଯନ୍ତ୍ରୀ, ନିର୍ବାହୀ ଅଧିକାରୀ,ଗ୍ରାମ୍ୟ ରୋଜଗାର ସେବିକାସେବକଙ୍କ ସମେତ ବ୍ଲକର ଅନ୍ୟାନ୍ୟ ପଦାଧିକାରୀମାନେ ସାମିଲ ହୋଇଥିଲେ।