ଖୋର୍ଦ୍ଧା ଅଫିସ,୨୯ା୧୨: ଖୋର୍ଦ୍ଧା ଜିଲାରେ ପ୍ରଧାନମନ୍ତ୍ରୀ ଆବାସ ଯୋଜନାରେ ଦୁର୍ନୀତି ବଢ଼ିବାରେ ଲାଗିଛି। ବେଗୁନିଆ ବ୍ଲକର ଗଡମାଣତୀର, ପୋଡାଡିହ ପଞ୍ଚାୟତରେ ଆବାସ ଦୁର୍ନୀତି ପର୍ଦ୍ଦାଫାଶ ହେବା ପରେ ମଧ୍ୟ ପୂର୍ବବତ କାର୍ଯ୍ୟାଦେଶ ପ୍ରଦାନ ବେଳେ ସବୁ ନିୟମକୁ ଅଣଦେଖା କରାଯାଉଛି। ସ୍ବଚ୍ଛଳଙ୍କୁ ଆବାସ ମିଳୁଥିବା ବେଳେ ଗୃହହୀନଙ୍କୁ ମିଳୁନାହିଁ। ଏପରିକି କାର୍ଯ୍ୟାଦେଶ ପ୍ରଦାନରେ ହେଉଥିବା ଦୁର୍ନୀତିରେ କେତେଜଣ ସରକାରୀ କର୍ମଚାରୀ ଓ ଅଧିକାରୀ, ଲୋକ ପ୍ରତିନିଧି ଓ ଦଲାଲଙ୍କ ସମ୍ପୃକ୍ତି ରହିଥିବା ଅଞ୍ଚଳରେ ଆଲୋଚନା ହେଉଛି।
ଗଡ଼ମାଣତ୍ରୀର ଆବାସ ଦୁର୍ନୀତିରେ କଲେଜରେ କାର୍ଯ୍ୟରତ ଜଣେ ୪ର୍ଥ ଶ୍ରେଣୀ କର୍ମଚାରୀ ଦଲାଲି କରି ଲକ୍ଷାଧିକ ଟଙ୍କା ରୋଜଗାର କରୁଥିଲେ। କିଛିଦିନ ପୂର୍ବେ ପ୍ରଶାସନ ପକ୍ଷରୁ ସମ୍ପୃକ୍ତ ଦଲାଲଙ୍କୁ ଧରି ପୋଲିସ ଜିମା ଦିଆଯାଇଥିଲା। ଏହି କେଳେଙ୍କାରୀରେ ୨ଜଣ ଦଲାଲ ଫେରାର ଅଛନ୍ତି। ସେମାନଙ୍କୁ କେତେଜଣ ରାଜନେତା ଘଣ୍ଟଘୋଡ଼ାଇ ରଖିଥିବା କୁହାଯାଉଛି। ଦୁର୍ନୀତି ଅଭିଯୋଗ ଆସିବା ପରେ ଜଣେ ପଞ୍ଚାୟତ କାର୍ଯ୍ୟନିର୍ବାହୀ ଅଧିକାରୀ(ପିଇଓ)ଙ୍କୁ ମଧ୍ୟ ନିଲମ୍ବନ କରାଯାଇଛି। ସେହିଭଳି ପୋଡ଼ାଡ଼ିହ ପଞ୍ଚାୟତର ଆବାସ ଦୁର୍ନୀତିରେ ୨ଜଣ ପିଇଓ ନିଲମ୍ବିତ ହୋଇଥିବାବେଳେ ଜଣେ ବିଡିଓ, ଏବିଡିଓଙ୍କ ବିରୋଧରେ ଶୃଙ୍ଖଳାଗତ କାର୍ଯ୍ୟାନୁଷ୍ଠାନ ପାଇଁ ରାଜ୍ୟ ସରକାରଙ୍କୁ ଖୋର୍ଦ୍ଧା ଜିଲାପାଳ ସୁପାରିସ କରିଛନ୍ତି। ଏସବୁ ସତ୍ତ୍ୱେ ବେଗୁନିଆ ବ୍ଲକରେ ଆବାସ ଯୋଜନାରେ ଦୁର୍ନୀତି ପୂର୍ବବତ୍ ଚାଲିଛି।
ତଥ୍ୟ ସଂଗ୍ରହ କରୁଛନ୍ତି ଏମ୍ପି
ପ୍ରଧାନମନ୍ତ୍ରୀ ଆବାସ ଯୋଜନାରେ ଦୁର୍ନୀତି ଅଭିଯୋଗ ଆସିବା ପରେ ଭାଜପା ସକ୍ରିୟ ହୋଇଯାଇଛି। ଦଳ ପକ୍ଷରୁ ଦୁର୍ନୀତି ସମ୍ପର୍କରେ ତଥ୍ୟ ସଂଗ୍ରହ କରାଯାଉଛି। ଏମ୍ପି ଅପରାଜିତା ଷଡଙ୍ଗୀ ମଧ୍ୟ ତଥ୍ୟ ଯୋଗାଡ଼ କରୁଛନ୍ତି। ଏମ୍ପି ଷଡ଼ଙ୍ଗୀଙ୍କ କହିବାନୁଯାୟୀ, ପ୍ରଧାନମନ୍ତ୍ରୀ ଆବାସ ଯୋଜନାରେ ବେଗୁନିଆ ନିର୍ବାଚନମଣ୍ଡଳୀର ବେଗୁନିଆ ଓ ବୋଲଗଡ଼ ଅଞ୍ଚଳରେ ଦୁର୍ନୀତି ହୋଇଥିବା ଜଣାପଡ଼ିଛି। ଏନେଇ ପଞ୍ଚାୟତିରାଜ ମନ୍ତ୍ରୀଙ୍କୁ ଅବଗତ କରାଇଯାଇଛି। ଦୁର୍ନୀତି ସମ୍ପର୍କରେ ସଂସଦରେ ପ୍ରସଙ୍ଗ ଉଠାଇଛି। ରାଜ୍ୟ ସରକାର ତଦନ୍ତ କରି କାର୍ଯ୍ୟାନୁଷ୍ଠାନ ନେଇଛନ୍ତି। ଖୋର୍ଦ୍ଧା ଜିଲାର ବାଲିଅନ୍ତା, ବାଲିପାଟଣା ବ୍ଲକରୁ ଆବାସ ଯୋଜନାରେ ଅଧିକ ଅଭିଯୋଗ ଆସୁଛି। ହିତାଧିକାରୀ ଚୟନରେ ଅସନ୍ତୋଷ ରହିଛି। କିସ୍ତିରେ ଟଙ୍କା ଦେବାବେଳେ ଦୁର୍ନୀତି ଅଭିଯୋଗ ଆସୁଛି। ଖୁବ୍ଶୀଘ୍ର ସବୁ ତଥ୍ୟକୁ ନେଇ ଜିଲା ପ୍ରଶାସନ, ବିଭାଗୀୟ ମନ୍ତ୍ରୀ, ମୁଖ୍ୟମନ୍ତ୍ରୀଙ୍କୁ ଅବଗତ କରାଇବି। ଦୁର୍ନୀତିର ତଦନ୍ତ କରି କାର୍ଯ୍ୟାନୁଷ୍ଠାନ ନେବାକୁ ଅନୁରୋଧ କରାଯିବ ବୋଲି କହିଛନ୍ତି।