ଛତ୍ରପୁର,୨୫।୬(ଡି.ଏନ.ଏ) – ଗଞ୍ଜାାମ ଜିଲାର କେତେକ ଅଞ୍ଚଳରେ ଖଳ ପ୍ରକୃତିର ଲୋକ ପ୍ରଧାନମନ୍ତ୍ରୀ ଫସଲ ବୀମା ନାମରେ ଦଲାଲଗିରି କରି ଚାଷୀ ମାନଙ୍କୁ ମିଥ୍ୟା ବୀମା ପରିଚୟପତ୍ର ପ୍ରଦାନ କରି ଅର୍ଥ ଆଦାୟ କରୁଥିବା ନେଇ ପ୍ରଶାସନ ଦୃଷ୍ଟିକୁ ଆସିଛି। ଏପରି ବ୍ୟକ୍ତିଙ୍କୁ ଚିହ୍ନଟ କରି ସେମାନଙ୍କ ନଁାରେ ସ୍ଥାନୀୟ ଥାନାରେ ଏତଲା ଦେଇ ଗିରଫ କରାଇବାକୁ ଅତିରିକ୍ତ ଜିଲାପାଳ (ରାଜସ୍ବ) ଲକ୍ଷ୍ମୀକାନ୍ତ ସେଠୀ ନିର୍ଦ୍ଦେଶ ଦେଇଛନ୍ତି। ସୋମବାର ଛତ୍ରପୁରସ୍ଥିତ ଜିଲାପାଳଙ୍କ ସମ୍ମିଳନୀ ଗୃହରେ ଅନୁଷ୍ଠିତ ଖରିଫ କୃଷି ନିର୍ଦ୍ଧାରଣ କମିଟି ବୈଠକରୁ ସୂଚନା ମିଳିଛି। ପ୍ରଧାନମନ୍ତ୍ରୀ ଫସଲବୀମା ସମ୍ପର୍କରେ ଗଁା ଗହଳିରେ ବ୍ୟାପକ ପ୍ରଚାର କରାଯିବ। ପ୍ରତ୍ୟେକ ଚାଷୀଙ୍କୁ ଏଥିରେ ସାମିଲ କରିବାକୁ କୁହାଯାଇଛିା ବୀମା କମ୍ପାନୀ ଏଜେଣ୍ଟମାନେ ପଞ୍ଚାୟିତିରାଜ ପ୍ରତିନିଧିମାନଙ୍କ ସହାୟତାରେ ଚାଷୀଙ୍କୁ ସଚେତନ କରାଇବେ। ଧାନ ସହ କପା, ଚିନାବାଦାମ, ମକା, ଧାନ, ମାଣ୍ଡିଆ ଓ ହରଡ ଫସଲ ଉପରେ ଚାଷୀମାନେ ବୀମା କରାଇପାରିବେ। ଜୁଲାଇ ୩୧ ତାରିଖ ବୀମା ପଞ୍ଜୀକରଣ ଶେଷ ଦିବସ ଧାର୍ଯ୍ୟ ହୋଇଛି। ଜିଲାରେ ଚଳିତ ବର୍ଷ ୩୯ ହଜାର ମେଟ୍ରିକ୍ ଟନ୍ ୟୁରିଆ ସାରର ଆବଶ୍ୟକତା ରହିଛି। ଏହାକୁ ତୁରନ୍ତ ମହଜୁଦ ରଖିବାକୁ ବୈଠକରେ କୃଷି ଅଧିକାରୀଙ୍କୁ ନିର୍ଦ୍ଦେଶ ଦିଆଯାଇଛି। ସାର ଦୋକାନୀମାନଙ୍କର ଲାଇସେନ୍ସ ଯାଞ୍ଚ ହେବ। ପ୍ରତ୍ୟେକ ଦୋକାନରେ ସାରର ନିର୍ଦ୍ଧାରିତ ମୂଲ୍ୟ ତାଲିକା ଓ ଗଚ୍ଛିତ ପରିମାଣ ସ୍ବତନ୍ତ୍ର ବୋର୍ଡରେ ଲିପିବଦ୍ଧ ରହିବା ବାଧ୍ୟତାମୂଳକ। ଜିଲାରେ କେଉଁ କେଉଁ ଅଞ୍ଚଳର ମୃତ୍ତିକା ଧାନ ଚାଷ ଓ ଉଦ୍ୟାନ କୃଷି ପାଇଁ ଅନୁକୂଳ ତା’ର ବିଧିବଦ୍ଧ ଚିଠା ପ୍ରସ୍ତୁତ ହୋଇ ଜିଲା ପ୍ରଶାସନ ପାଖରେ ରହିବ। ଚାଷୀମାନଙ୍କୁ ଆବଶ୍ୟକ ଧାନ ବିହନ ଯୋଗାଇ ଦେବାକୁ ନିର୍ଦ୍ଦେଶ ଦିଆଯାଇଛିା ଶ୍ରୀ ପ୍ରଣାଳୀ ଧାନ ଚାଷକୁ ବ୍ୟାପକ କରିବା ପାଇଁ କୁହାଯାଇଛି। ଧାନ ଚାଷରେ ଜଳ ପରିଚାଳନା ବାବଦରେ ଚାଷୀଙ୍କୁ ସଚେତନ କରାଯିବ। ଜିଲାରେ ଚଳିତ ବର୍ଷ ୪୬୫ ସୌର ଜଳନିଧି ପ୍ରକଳ୍ପ ମଞ୍ଜୁର ହୋଇଛି। ଖରିଫ ଫସଲ ପାଇଁ ଜିଲାରେ ୪୬୩ କୋଟି ଟଙ୍କା ସମବାୟ କୃଷି ଋଣ ପ୍ରଦାନ ପାଇଁ ଲକ୍ଷ୍ୟ ରଖାଯାଇଛି। ଏଥିମଧ୍ୟରୁ ବର୍ତ୍ତମାନ ସୁଦ୍ଧା ୪୦ ହଜାର ୩୮୬ ଚାଷୀଙ୍କୁ ୧୩୫ କୋଟି ଟଙ୍କା ପ୍ରଦାନ କରାଯାଇଛି। ନିର୍ଦ୍ଧାରିତ ସମୟ ମଧ୍ୟରେ ଅବଶିଷ୍ଟ ଅର୍ଥ ଋଣ ଆକାରରେ ଆବଣ୍ଟନ କରିବା ପାଇଁ ନିର୍ଦ୍ଦେଶ ଦିଆଯାଇଛି। ଏହି ବୈଠକରେ କୃଷି ଉପନିର୍ଦ୍ଦେଶକ ମନୋଜ କୁମାର ବେହେରା, ଲିଡ୍ ବ୍ୟାଙ୍କ ମ୍ୟାନେଜର ସୁରେନ୍ଦ୍ର କୁମାର ଚୌଧୁରୀ, ସମବାୟ ଉପନିବନ୍ଧକ ସୁଶାନ୍ତ ପଣ୍ଡା, ଉଦ୍ୟାନ କୃଷି ଉପ ନିର୍ଦ୍ଦେଶକ ଦିଗମ୍ବର ପଣ୍ଡାଙ୍କ ସମେତ ବିଭିନ୍ନ ବିଭାଗର ଅଧିକାରୀମାନେ ଉପସ୍ଥିତ ଥିଲେ।