ଛତ୍ରପୁର,୨୯ା୫(ଡି.ଏନ.ଏ)- ଗଞ୍ଜାମ ଜିଲାକୁ ଏକ ଲକ୍ଷରୁ ଉର୍ଦ୍ଧ୍ୱ ପ୍ରବାସୀ ଫେରିଲେଣି। ରୋଜଗାର ବାଟ ମିଳିଲେ ଏମାନେ ଆଉ ଅନ୍ୟ ରାଜ୍ୟକୁ ଯିବେନି। ତେଣୁ ଚାଷଠାରୁ ଆରମ୍ଭ କରି କ୍ଷୁଦ୍ରଶିଳ୍ପ ଆଦି କ୍ଷେତ୍ରରେ ଋଣ ଦେବାକୁ ପଡିବ। ଗୁରୁବାର ଗଞ୍ଜାମ ଜିଲା ବ୍ୟାଙ୍କ ପରାମର୍ଶଦାତା କମିଟି ବୈଠକରେ ଅଧ୍ୟକ୍ଷତା କରି ଜିଲାପାଳ ବିଜୟ ଅମୃତା କୁଲାଙ୍ଗେ ଏହା କହଛନ୍ତି।
ଲକ୍ଡାଉନରେ ଲୋକଙ୍କ ଜୀବନ ଜୀବିକା ପ୍ରଭାବିତ ହୋଇଛି। ପ୍ରତି ପଞ୍ଚାୟତକୁ ଯାଇ ଲୋକଙ୍କୁ ଭେଟି ସେମାନେ କ’ଣ କରି ଅର୍ଥ ଉପାର୍ଜନ କରିବେ ତାହା ବୁଝି ସେହି ଅନୁଯାୟୀ ଋଣ ଯୋଗାଇଦେବାକୁ ବ୍ୟାଙ୍କ କର୍ତ୍ତୃପକ୍ଷମାନଙ୍କୁ ଜିଲାପାଳ ନିର୍ଦ୍ଦେଶ ଦେଇଛନ୍ତି। ଋଣ ସମ୍ପର୍କୀୟ ଏକ ପ୍ଲାନ୍ ପ୍ରସ୍ତୁତ କରିବାକୁ ପଡିବ। କୃଷି, ଉଦ୍ୟାନ୍, ପ୍ରାଣୀ ସମ୍ପଦ ବିଭାଗ ଏବଂ ବ୍ୟାଙ୍କ କର୍ତ୍ତୃପକ୍ଷ ମିଳିତ ଭାବେ କ୍ୟାମ୍ପ କରି ଲୋକଙ୍କ ଆବଶ୍ୟକ ଅନୁଯାୟୀ ଋଣ ଦେବାକୁ ଜିଲାପାଳ ନିର୍ଦ୍ଦେଶ ଦେଇଛନ୍ତି। ଚାଷୀ କିଭଳି ଚାଷ କରି ଭଲ ଉପାର୍ଜନ କରିବେ ଏବଂ କ୍ଷୁଦ୍ରଶିଳ୍ପ ଓ ମଧ୍ୟମ ଶିଳ୍ପ ଦ୍ୱାରା ଲୋକେ ରୋଜଗାରକ୍ଷମ ହେବେ ସେ ଉପରେ ଗୁରୁତ୍ୱ ଦେବାକୁ କୁହାଯାଇଛି। ବୈଠକରେ ୨୦୨୦-୨୧ ବର୍ଷର ବାର୍ଷିକ ଋଣ ଯୋଜନାର ପୁସ୍ତିକା ଉନ୍ମୋଚନ ହୋଇଥିଲା। ଚଳିତବର୍ଷ ଜିଲାରେ ୬୩୧୨.୯୮ କୋଟି ଋଣ ପ୍ରଦାନ ଲକ୍ଷ୍ୟଧାର୍ଯ୍ୟ ହୋଇଛି। ସେଥିମଧ୍ୟରେ କୃଷି କ୍ଷେତ୍ରରେ ୨୯୯୫.୦୭ କୋଟି ଏବଂ କ୍ଷୁଦ୍ର ଓ ମଧ୍ୟମ ଶିଳ୍ପ କ୍ଷେତ୍ରରେ ୨୧୫୧.୭୩ କୋଟି ରହିଛି। ବୈଠକରେ ଆନ୍ଧ୍ର ବ୍ୟାଙ୍କ ଡିଜିଏମ୍ ତଥା ଆବାହକ ଭୁବନେଶ୍ୱର ନାୟକ, ଏଲଡିଏମ୍ ଅଶୋକ କୁମାର ପଣ୍ଡା ଓ ନାବାର୍ଡ ଏଜିଏମ ସୁମନ ସାହୁଙ୍କ ସମେତ ବିଭିନ୍ନ ବିଭାଗୀୟ ଅଧିକାରୀ ଓ ବ୍ୟାଙ୍କ କର୍ତ୍ତୃପକ୍ଷ ଉପସ୍ଥିତ ଥିଲେ।