ଚମ୍ପୁଆ,୨ା୬(ଡି.ଏନ.ଏ.)- କରୋନା ମହାମାରୀରେ ପ୍ରଭାବିତ ହୋଇଛନ୍ତି ଶ୍ରମିକ। ଶ୍ରମ ହରାଇବା ସହିତ ବହୁ କଷ୍ଟରେ ନିଜ ପୈତୃକ ଘରକୁ ଫେରୁଛନ୍ତି। କେତେକ ଶହ ଶହ କି.ମି ଚାଲି ଚାଲି ଫେରୁଛନ୍ତି ତ କେତେକ ସାଇକେଲ ଯୋଗେ ମଧ୍ୟ ନିଜ ଘରକୁ ଫେରୁଥିବା ଦେଖିବାକୁ ମିଳିଛି। ଏହି ଫେରନ୍ତା ପ୍ରବାସୀ ଶ୍ରମିକମାନଙ୍କୁ ସହାୟତା ପ୍ରଦାନ ନିମନ୍ତେ ରାଜ୍ୟ ସରକାର ନିର୍ଦ୍ଦେଶ ଦେଇଛନ୍ତି। ଓଡିଶା ସରକାରଙ୍କ ନିର୍ଦ୍ଦେଶକ୍ରମେ ଚମ୍ପୁଆ ଯୋଗାଣ ବିଭାଗ ପକ୍ଷରୁ ପ୍ରବାସୀ ଶ୍ରମିକମାନଙ୍କୁ ସହାୟତା ପୂର୍ବକ ଚାଉଳ ବଣ୍ଟନ କରାଯାଇଛି। ଓଡିଶା ଓ ଝାଡ଼ଖଣ୍ଡର ସୀମାନ୍ତ ବର୍ତ୍ତୀ ଅଞ୍ଚଳ ଚମ୍ପୁଆ ସୀମାନ୍ତଠାରେ ଏହି ବଣ୍ଟନ କାଯର୍ୟ କରାଯାଇଛି। ଯୋଗାଣ ନିରୀକ୍ଷକ ତାରିଣୀ ମିଶ୍ରଙ୍କ ପ୍ରତ୍ୟେକ୍ଷ ତତ୍ତ୍ୱାବଧାନରେ ନାରାୟଣ ବାରିକ, ସହଦେବ ମହାନ୍ତ, ଅନାମ ଦାସ, ଭୋଳାନାଥ ସେଠୀ, ମକୁରୁ ମହାନ୍ତ ଓ ଶ୍ରୀଧର ସାହୁ ପ୍ରମୁଖ ଏହି ବଣ୍ଟନ କାର୍ଯ୍ୟ କରିଛନ୍ତି। ମେ’ ଓ ଜୁନ ଦୁଇ ମାସର ୧୦ କେଜି ଚାଉଳ ପ୍ରଦାନ କରାଯାଇଛି। ଆଗାମୀ ଦିନରେ ଏହି ପ୍ରବାସୀ ଶ୍ରମିକ ମାନଙ୍କୁ ଦୁଇ ମାସର ଦୁଇ କେଜି ଚଣା ଯୋଗାଇ ଦିଆଯିବ ବୋଲି ବିଭାଗ ପ୍ରକାଶ କରିଛି।