ବରଗଡ଼ ଅଫିସ୍,୯।୫: କରୋନା (କୋଭିଡ୍-୧୯) ଭୂତାଣୁ ସଂକ୍ରମଣକୁ ପ୍ରତିହତ ପାଇଁ ପ୍ରାୟ ଦେଢ଼ମାସ ହେଲା ଲକ୍ଡାଉନ କଟକଣା ଯୋଗୁ ଲୋକଙ୍କ ଜୀବନ ଜୀବିକା ଉଜୁଡ଼ି ଯାଇଛି। ଏଥିରେ ପ୍ରବାସୀ ଶ୍ରମିକଙ୍କ ଦୁଃଖ ବଢ଼ି ଯାଇଛି। ଶନିବାର ଆନ୍ଧ୍ରପ୍ରଦେଶର ବିଶାଖାପାଟଣାରୁ ୧୩ ଜଣ ଶ୍ରମିକ ଚାଲି ଚାଲି ଝାଡ଼ଖଣ୍ଡ ଅଭିମୁଖେ ଫେରଥିବା ଦେଖିବାକୁ ମିଳିଥିଲା। ବାଟରେ ସେମାନେ ବରଗଡ଼ ସହର ଉପକଣ୍ଠ ସରସରା ଛକ ନିକଟ ଏକ ଗଛମୂଳେ ଆଶ୍ରୟ ନେଇଥିଲେ। ଏହି ଶ୍ରମିକମାନେ ବିଶାଖାପାଟଣାରେ ରହି ସେଠାରେ ପାଣି ଟ୍ୟାଙ୍କର କାରଖାନାରେ କାମ କରୁଥିଲେ। ଲକ୍ଡାଉନ୍ ପରେ ସେଠାରେ କାମ ବନ୍ଦ ହୋଇ ଯାଇଥିଲା। ଅନ୍ୟପକ୍ଷେ କାରଖାନା କର୍ତ୍ତୃପକ୍ଷ ମଧ୍ୟ ସେଠାରେ ସେମାନଙ୍କ ରହିବା, ଖାଇବା ବ୍ୟବସ୍ଥା କରି ନ ଥିଲେ । ଫଳରେ ସେମାନେ ୯ଦିନ ତଳୁ ସେଠାରୁ ଚାଲି ଚାଲି ଆସୁଛନ୍ତି ଏବଂ କ୍ଲାନ୍ତ ଅନୁଭବ କରିବାରୁ ସେହି ଗଛମୂଳେ ଆଶ୍ରୟ ନେଇଥିବା କହିଥିଲେ। ସ୍ଥାନୀୟ ସ୍ବେଚ୍ଛାସେବୀ ରାଜେଶ ପ୍ରଧାନଙ୍କ ନଜରରେ ସେମାନେ ଆସିବାରୁ ସେ ନିଜ ସାଙ୍ଗସାଥୀଙ୍କ ସହିତ ସେମାନଙ୍କ ଖାଇବା ବ୍ୟବସ୍ଥା କରିଥିଲେ।
ଏଭଳି ପଥଚାରୀ ପ୍ରବାସୀ ଶ୍ରମିକଙ୍କ ପ୍ରତି କେତେକ ପ୍ରଶାସନିକ ଅଧିକାରୀ ମଧ୍ୟ ଚେଇଁ ଶୋଇ ରହିଥିବା ପରିଲକ୍ଷିତ ହୋଇଛି। ସେମାନଙ୍କ ଉପରେ ସୂଚନା ଦେଲେ ସୁଦ୍ଧା ସମ୍ପୃକ୍ତ ବିଭାଗୀୟ ଅଧିକାରୀଙ୍କ କ୍ଷେତ୍ରରେ ଆଶାନୁରୂପ ତତ୍ପରତା ପ୍ରକାଶ ପାଉନାହିଁ। ଅପରପକ୍ଷେ ବିଭିନ୍ନ ସ୍ଥାନରେ ପ୍ରଶାସନିକ ଅଧିକାରୀମାନେ ପ୍ରବାସୀ ଶ୍ରମିକଙ୍କ ପ୍ରତି ସେମାନଙ୍କ କର୍ତ୍ତବ୍ୟ ସମ୍ପାଦନ କରୁଥିବା ମଧ୍ୟ ଦେଖିବାକୁ ମିଳିଛି। ଶୁକ୍ରବାର ବିଜେପୁର ଅଞ୍ଚଳରେ ଜିଲାର ପାଇକମାଳ ଅଞ୍ଚଳକୁ ଚାଲିଚାଲି ଯାଉଥିବା ଶ୍ରମିକଙ୍କୁ ସେଠାକାର ବିଡ଼ିଓ ଏକ ସରକାରୀ ବସ୍ରେ ପଠାଇଥିଲେ । ସେହିପରି ଗାଇସିଲେଟ ବ୍ଲକ ତାଲପାଲି ଅଞ୍ଚଳରୁ ମଧ୍ୟ ଗାଡ଼ି ଯୋଗେ ଅନ୍ୟ କିଛି ଶ୍ରମିକଙ୍କୁ ଛତିଶଗଡ଼ ପଠାଯାଇଥିଲା। ହେଲେ ଢ଼େଙ୍କାନାଳରୁ ଛତିଶଗଡ଼ ଚାଲି ଚାଲି ଯାଉଥିବା ୧୩ ଶ୍ରମିକ ବରଗଡ଼ ଜିଲା ହେଡ଼କ୍ବାର୍ଟର୍ସ ଦେଇ ଯାଇଥିଲେ ସୁଦ୍ଧା ସେମାନଙ୍କ ପାଇଁ କେହି ଗାଡ଼ି ବ୍ୟବସ୍ଥା କରି ନ ଥିଲେ। ଶେଷରେ ଭଟଲିରେ ସେଠାକାର ସ୍ବେଚ୍ଛାସେବୀମାନେ ସେମାନଙ୍କ ପାଇଁ ଗାଡ଼ି ବ୍ୟବସ୍ଥା କରିଥିଲେ।