ପୁନେ,୩୧।୫: ଦେଶରେ ଲକ୍ଡାଉନ୍ ଯୋଗୁ ପ୍ରବାସୀ ଶ୍ରମିକମାନଙ୍କୁ ନାନା ଅସୁବିଧାର ସାମ୍ନା କରିବାକୁ ପଡୁଛି। ସେମାନଙ୍କୁ ଖାଦ୍ୟ ଯୋଗାଇ ଦେବା ପାଇଁ ବହୁ ଲୋକ ଆଗେଇ ଆସୁଛନ୍ତି। ଏଥିରେ ସାମିଲ ହୋଇଛନ୍ତି ମହାରାଷ୍ଟ୍ରର ଜଣେ ୯୯ ବର୍ଷୀୟା ବୃଦ୍ଧା। ସେ ଶ୍ରମିକଙ୍କ ପାଇଁ ଖାଦ୍ୟ ପ୍ୟାକେଟ୍ ପ୍ରସ୍ତୁତ କରୁଛନ୍ତି। ନିଜ ହାତରେ ରୁଟି ପ୍ୟାକେଟ ଭିତରେ ପୂରାଇ ଶ୍ରମିକଙ୍କୁ ବାଣ୍ଟୁଛନ୍ତି। ଏଭଳି ମହତ କାର୍ଯ୍ୟ କରି ସେ ସମସ୍ତଙ୍କ ହୃଦୟ ଜିତିଛନ୍ତି। ବୃଦ୍ଧା ପ୍ୟାକେଟ୍ କରୁଥିବା ଏକ ଭିଡିଓ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି। ଏପର୍ଯ୍ୟନ୍ତ ଏହି ଭିଡିଓକୁ ଦେଢ ଲକ୍ଷରୁ ଅଧିକ ଲୋକ ଦେଖିସାରିଥିବାବେଳେ ୧୦ ହଜାରରୁ ଅଧିକ ଲାଇକ୍ କରିସାରିଲେଣି।
