ଭୁବନେଶ୍ୱର, ୫।୫ (ବ୍ୟୁରୋ): ରାଜ୍ୟ ବାହାରେ ଫସି ରହିଥିବା ଶ୍ରମିକମାନଙ୍କୁ ଫେରାଇ ଆଣିବା ଲାଗି ଯାତ୍ରା ଖର୍ଚ୍ଚ ବହନ କରିବା ପାଇଁ କଂଗ୍ରେସ ପକ୍ଷରୁ ଘୋଷଣା କରାଯାଇଛି। ଏନେଇ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ପ୍ରଦେଶ କଂଗ୍ରେସ କମିଟି(ପିସିସି) ସଭାପତି ନିରଞ୍ଜନ ପଟ୍ଟନାୟକ ସୋମବାର ଚିଠି ଲେଖି କହିଛନ୍ତି ଯେ, ଭାରତୀୟ ଜାତୀୟ କଂଗ୍ରେସ ଉଭୟ କେନ୍ଦ୍ର ଏବଂ ରାଜ୍ୟ ସରକାରଙ୍କୁ ସହଯୋଗକରି ବାହାରେ ଫସିଥିବା ଶ୍ରମିକଙ୍କୁ ଫେରାଇ ଆଣିବାକୁ ଚାହୁଁଛି। ରାଜ୍ୟର ଶ୍ରମିକ ଏବଂ କାର୍ଯ୍ୟକର୍ତ୍ତା ହେଉଛନ୍ତି ଅର୍ଥନୀତିର ମେରୁଦଣ୍ଡ। ସେମାନଙ୍କ କଠିନ ପରିଶ୍ରମ ଦେଶର ମୂଳଦୁଆ ପକାଇଥାଏ। ଏଭଳି ସମୟରେ ପ୍ରବାସୀ ଶ୍ରମିକମାନଙ୍କୁ ଫେରିବା ଲାଗି ଟଙ୍କା ମିଳୁନାହିଁ, ଯେଉଁଥିପାଇଁ ସେମାନେ ନିଜ ଘଣ୍ଟା ଏବଂ ମୋବାଇଲ ବିକ୍ରି କରିଦେଉଛନ୍ତି। ଏହି ଅର୍ଥରେ ସେମାନେ ବସ୍ ଏବଂ ରେଳ ଟିକେଟ କରୁଛନ୍ତି। ଏଭଳି ସମୟରେ ସେହି ପ୍ରବାସୀ ଶ୍ରମିକଙ୍କ ଟ୍ରେନ୍ ଓ ବସ୍ ଟିକେଟ ଖର୍ଚ୍ଚ କଂଗ୍ରେସ ପକ୍ଷରୁ ବହନ କରିବାକୁ ସୁଯୋଗ ଦିଆଯାଉ। ତେଣୁ ସରକାରଙ୍କ ନିକଟରେ ବାହାରେ ଫସିଥିବା ଶ୍ରମିକଙ୍କ ଯେଉଁ ତାଲିକା ରହିଛି ତାହା ଦେବାକୁ ନିରଞ୍ଜନ ମୁଖ୍ୟମନ୍ତ୍ରୀଙ୍କୁ ଅନୁରୋଧ କରିଛନ୍ତି। ଅନ୍ୟପଟେ ଟ୍ରେନ୍ ଟିକେଟ କିଣିବାକୁ ଅକ୍ଷମ ଥିବା ପ୍ରବାସୀ ଶ୍ରମିକଙ୍କ ସାହାଯ୍ୟ ଲାଗି ପ୍ରଦେଶ କଂଗ୍ରେସ ପକ୍ଷରୁ ହେଲ୍ପଲାଇନ ନମ୍ବର ଜାରି କରାଯାଇଛି। ୯୯୩୮୬୧୪୩୯୯, ୯୨୩୮୫୭୦୮୩୪ ନମ୍ବର ଯୋଗେ ଯୋଗାଯୋଗକରି ପ୍ରବାସୀ ଶ୍ରମିକମାନେ ସାହାଯ୍ୟ ପାଇପାରିବେ ବୋଲି ନିରଞ୍ଜନ ଟୁଇଟ୍ ଯୋଗେ ସୂଚନା ଦେଇଛନ୍ତି।