ବରଗଡ଼ ଅଫିସ୍,୭।୫- କରୋନା ସଂକ୍ରମଣରେ ବରଗଡ଼ ଜିଲା ବର୍ତ୍ତମାନ ଗ୍ରୀନ୍ ଜୋନ୍ରେ ରହିଛି । ଅନ୍ୟପକ୍ଷେ ବରଗଡ଼ ଜିଲା ସୀମାନ୍ତ ଛତିଶଗଡ଼ ପଟୁ ପ୍ରତିଦିନ ବହୁସଂଖ୍ୟାରେ ପ୍ରବାସୀ ଶ୍ରମିକ ପ୍ରବେଶ କରି ଅନ୍ୟରାଜ୍ୟ ତଥା ପଶ୍ଚିମବଙ୍ଗ, ବିହାର, ଝାରଖଣ୍ଡକୁ ଯାଉଛନ୍ତି । ସେମାନେ ବରଗଡ଼ ଜିଲା ଦେଇ ଯାଉଥିବା ଯୋଗୁ ଏଠାକାର ଢ଼ାବା, ଦୋକାନ, ପୋଖରୀ ଆଦି ବ୍ୟବହାର କରୁଛନ୍ତି । ଏହାସତ୍ତ୍ବେ ଏଥିପ୍ରତି ପ୍ରଶାସନ ପକ୍ଷରୁ କୌଣସି ପଦକ୍ଷେପ ନିଆଯାଉ ନଥିବା ଭାଜପା ଅଭିଯୋଗ କରିଛି । ସମ୍ପୃକ୍ତ ପ୍ରବାସୀ ଶ୍ରମିକଙ୍କ ଉପରେ ନଜର ରଖି ସେମାନଙ୍କୁ ସଙ୍ଗରୋଧ ବ୍ୟବସ୍ଥାରେ ରଖିବା ସହିତ ଖାଦ୍ୟପେୟ, ପରିବହନ ବ୍ୟବସ୍ଥା କରିବାକୁ ଭାଜପା ଦାବି କରିଛି । ଏହି ପରିପ୍ରେକ୍ଷୀରେ ବୁଧବାର ଭାଜପା ପକ୍ଷରୁ ବରଗଡ଼ ଜିଲାପାଳଙ୍କୁ ଏକ ସ୍ମାରକପତ୍ର ପ୍ରଦାନ କରାଯାଇଛି । ଜିଲାପାଳ ଜ୍ୟୋତିରଞ୍ଜନ ପ୍ରଧାନଙ୍କ ଅନୁପସ୍ଥିତିରେ ଅତିରିକ୍ତ ଜିଲାପାଳ ମିର୍ଧା ଟପ୍ପୋଙ୍କୁ ସ୍ମାରକପତ୍ର ପ୍ରଦାନ କରାଯାଇଥିଲା । ଭାଜପା ଜିଲା ସଭାପତି ଅଶ୍ୱିନୀ ଷଡ଼ଙ୍ଗୀ, ସୁରେଶ୍ୱର ଶତପଥୀ ପ୍ରମୁଖ ସ୍ମାରକପତ୍ର ପ୍ରଦାନ କରିବାକୁ ଯାଇଥିଲେ।