ପାଟନା,୧୮।୨: ଦିଲ୍ଲୀରେ ଅରବିନ୍ଦ କେଜରିଓ୍ବାଙ୍କ ନେତୃତ୍ୱାଧିନ ଆମ ଆଦମୀ ପାର୍ଟି(ଏଏପି)ର ବିପୁଳ ବିଜୟ ପରେ ଶ୍ରେୟ ନେଇଛନ୍ତି ରାଜନୀତିର ଚାଣକ୍ୟ କୁହାଯାଉଥିବା ପ୍ରଶାନ୍ତ କିଶୋର। ମଙ୍ଗଳବାର ବିହାରର ପାଟନାରେ ସେ ଏକ ଖବରଦାତା ସମ୍ମିଳନୀର ଆୟୋଜନ କରିଛନ୍ତି। ଏହି ସମ୍ମିଳନୀରେ ପ୍ରଶାନ୍ତ କହିଛନ୍ତି ଫେବୃୟାରୀ ୨୦ରୁ ସେ ଆରମ୍ଭ କରିବେ ‘ବାତ୍ ବିହାର କି’ ନାମକ ଏକ କାର୍ଯ୍ୟକ୍ରମ। ଏହି କାର୍ଯ୍ୟକ୍ରମ ମାଧ୍ୟମରେ ସେ ବିହାର ପାଇଁ କାର୍ଯ୍ୟ କରିବେ ଓ ବିହାରକୁ ଟପ୍ ୧୦ ରାଜ୍ୟ ମଧ୍ୟରେ ସେ ସାମିଲ କରିବେ ବୋଲି କହିଛନ୍ତି। ଏହି ସମୟରେ ବିହାର ମୁଖ୍ୟମନ୍ତ୍ରୀ ନୀତୀଶ କୁମାରଙ୍କ ସହ ଥିବା ତାଙ୍କର ସମ୍ପର୍କକୁ ନେଇ ସେ କଥା ହୋଇଥିଲେ। ପ୍ରଶାନ୍ତ କହିଥିଲେ ନୀତୀଶ ମୋ ପିତା ସମାନ ବ୍ୟକ୍ତି। ତାଙ୍କସହ ମୋର ରାଜନୈତିକ ସମ୍ପର୍କ ନାହିଁ। ସେ ମୋତେ ପୁଅ ଭଳି ଦେଖନ୍ତି। କେବଳ ବିଚାରଧାରାରେ ଆମେ ଅଲଗା।
