ପୁରୀ ଅଫିସ, ୧୯। ୭:ବାତ୍ୟା ଫନୀକୁ ଇତିମଧ୍ୟରେ ଅଢେଇ ମାସ ବିତିଲାଣି। ହେଲେ ପୁରୀ ସହର ଉପକଣ୍ଠ କେତେକ ଗଁାରେ ଏବେ ବି ବାତ୍ୟାର ଚିହ୍ନ ସ୍ପଷ୍ଟ ବାରି ହୋଇପଡୁଛି। ବହୁ ଗଛରୁ ଡାଳ ଭାଙ୍ଗିଥିଲେ ମଧ୍ୟ ତାହାକୁ କଟାଯାଇନାହିଁ। ଅଧାଭଙ୍ଗା ଡାଳ ଏବେ ବି ଗଛରେ ଝୁଲି ରହିଛି। ସେହିପରି ଗଁା ଗହଳିରେ ଅଳିଆ ଆବର୍ଜନା ସମ୍ପୂର୍ଣ୍ଣ ଭାବେ ସଫା ହୋଇପାରିନାହିଁ। ପ୍ରଶାସନ ଦୃଷ୍ଟି ଆଢୁଆଳରେ ରହିଯାଇଥିବା ଏଭଳି ଗଁା ଉପରେ ଏବେ ପୁରୀ ଜିଲା କିନ୍ନର ସଂଘର ନଜର ପଡ଼ିଛି। ଶୁକ୍ରବାର ସଂଘର ପ୍ରାୟ ୨୨ଜଣ କିନ୍ନର ମଙ୍ଗଳାଘାଟ ପାଇକ ସାହିରେ ପହଞ୍ଚତ୍ ସଫେଇ କରିଛନ୍ତି। ବାତ୍ୟାରେ ଭାଙ୍ଗିପଡ଼ିିଥିବା ଗଛପତ୍ର ସମେତ ଗଁା ମଝି ଫାଙ୍କା ଜାଗାରେ ମାଡ଼ିଯାଇଥିବା ଅନାବନା ଘାସପତ୍ର ମଧ୍ୟ କାଟି ସଫା କରିଛନ୍ତି। ସଂଘର ମା’ ଦେବକୀ କିନ୍ନର କହିଛନ୍ତି, ସହରରେ ମ୍ୟୁନିସିପାଲିଟି ସଫା କରୁଛି। ହେଲେ ଗଁାକୁ କେହି ଆସୁନାହାନ୍ତି। ତେଣୁ ସହର ଉପକଣ୍ଠ ବିଭିନ୍ନ ଗଁାକୁ ଯାଇ ସଫେଇ କରିବା ଲାଗି ନିଷ୍ପତ୍ତି ନେଇଛୁ। ଏହାଦ୍ୱାରା ଗ୍ରାମବାସୀ ଏବଂ ଆମ ଭିତରେ ଏକ ସମ୍ପର୍କ ସୃଷ୍ଟି ହୋଇପାରିବ। କିନ୍ନରମାନଙ୍କୁ ଲୋକେ ଯେଉଁ ଦୃଷ୍ଟିରେ ଦେଖୁଛନ୍ତି ତାହା ମଧ୍ୟ ପରିବର୍ତ୍ତନ ହୋଇପାରିବ। ବାତ୍ୟା ପରେ ଅନେକ ଗଁା ଏବେ ବି ଅବହେଳିତ ହୋଇରହିଛି। ବାତ୍ୟାରେ ପାଇକ ସାହିରେ ଅନେକଙ୍କ ଘର ଭାଙ୍ଗିଯାଇଥିବା ବେଳେ ବହୁ ଗଛ ଭାଙ୍ଗିଛି। ଗଁା ବ୍ୟତୀତ ସହରରେ ମ୍ୟୁନିସିପାଲିଟି ଆଢୁଆଳରେ ରହିଯାଇଥିବା ବିଭିନ୍ନ ସ୍ଥାନକୁ ସଫା କରିବୁ ବୋଲି ସେ କହିଛନ୍ତି। ସେହିପରି ସଂଘର ସଭାପତି ପ୍ରିୟାଂଶୀ ଦାସ କହିଛନ୍ତି, ବିଭିନ୍ନ ଗଁା ବୁଲି ସଫେଇ କରିବାକୁ ନିଷ୍ପତ୍ତି ନେଇଛୁ। ପାଇକ ସାହିରେ ସଫେଇ କାମରେ ଗଁା ଲୋକେ ଆମକୁ ସହଯୋଗ କରିଥିଲେ। ଏହାଦ୍ୱାରା ଆମେ ଅଧିକ ଉତ୍ସାହିତ ହୋଇଥିଲୁ।