ଆନନ୍ଦପୁର,୨୧।୯(ସ୍ବ.ପ୍ର.): କେନ୍ଦୁଝର ଜିଲା ଆନନ୍ଦପୁର ଉପଖଣ୍ଡ ପ୍ରଶାସନର ହସ୍ତକ୍ଷେପ ପରେ ବୃଦ୍ଧ ଦମ୍ପତିଙ୍କୁ ନ୍ୟାୟ ମିଳିଛି। ଆନନ୍ଦପୁର ଥାନା ଅଧୀନ ବଞ୍ଚୋ ପଞ୍ଚାୟତ ଶିବନାରାୟଣପୁର ଗ୍ରାମର ପରୀକ୍ଷିତ ବେହେରା(୭୮) ଏବଂ ସ୍ତ୍ରୀ ଶାନ୍ତିଲତାଙ୍କର ତିନି ଝିଅ ଓ ଗୋଟିଏ ପୁଅ। ଝିଅମାନଙ୍କର ବିବାହ ପରେ ପୁଅର ବିବାହ କରାଇଥିଲେ। ପୁଅ ରତିକାନ୍ତ ବିବାହ କରିବା ପରେ ସ୍ତ୍ରୀଙ୍କୁ ଧରି ଅଲଗା ରହୁଥିଲେ। ଫଳରେ ବୃଦ୍ଧ ମା’ବାପା ଅସହାୟ ଅବସ୍ଥାରେ ଦିନ କାଟୁଥିଲେ। ଏପରିକି ପୁଅ ରତିକାନ୍ତ ଭତ୍ତା କରାଇଦେବା ବାହାନାରେ ମା’ବାପାଙ୍କ ଦସ୍ତଖତ ନେଇ ସେମାନଙ୍କର ଭିଟାମାଟିକୁ ବିକ୍ରି କରିଦେଇଥିଲେ। ଅସହାୟ ମା’ ବାପା ଭିଟାମାଟି ଛାଡ଼ି ଏଣେତେଣେ ବୁଲିବା ସହିତ ଭିକ୍ଷାବୃତ୍ତିକୁ ଆପଣାଇଥିଲେ। ପରେ ଦୁଇ ବର୍ଷ ହେବ ଅସହାୟ ମା’ ବାପା ଫକୀରପୁର ଠାରେ ଥିବା ଏକ ମଠରେ ଜୀବନ ଅତିବାହିତ କରିଆସୁଥିଲେ। ଘଟଣା ଜଣାପଡ଼ିବା ପରେ ଉପଖଣ୍ଡ ପ୍ରଶାସନ ହସ୍ତକ୍ଷେପ କରିଥିଲା। ଉପଜିଲାପାଳ ରବୀନ୍ଦ୍ର କୁମାର ସାହୁ ଓ ସାମାଜିକ ସୁରକ୍ଷା ଅଧିକାରୀ ଡ.ଶମ୍ଭୁନାଥ ରାଉତ ସରକାରୀସ୍ତରରେ ବୃଦ୍ଧଦମ୍ପତିଙ୍କ ପାଇଁ ଭତ୍ତା ଏବଂ ରାଶନକାର୍ଡ ମାଧ୍ୟମରେ ଆବଶ୍ୟକ ଚାଉଳ ଯୋଗାଇ ଦେବାକୁ ଉଦ୍ୟମ କରିଥିଲେ। ଏହା ସହିତ ଶିବନାରାୟଣପୁର ଗ୍ରାମବାସୀ ଉଭୟ ଅସହାୟ ବୃଦ୍ଧା ଓ ବୃଦ୍ଧଙ୍କୁ ଧରି ଉପଜିଲାପାଳଙ୍କ କାର୍ଯ୍ୟାଳୟରେ ପହଞ୍ଚିଥିଲେ। ସେମାନଙ୍କର ଝିଅ, ଜ୍ୱାଇଁ, ପୁଅ ମଧ୍ୟ ଉପସ୍ଥିତ ଥିଲେ। ସେଠାରେ ଏକ ବୈଠକରେ ଆଲୋଚନା କରାଯାଇ ପୁଅ ରତିକାନ୍ତ ବୃଦ୍ଧ ମା’ ବାପାଙ୍କ ଭରଣପୋଷଣ ନିମନ୍ତେ ମାସିକ ୨ ହଜାର ଟଙ୍କା ଦେବାକୁ ସହମତି ପ୍ରକାଶ କରିଥିଲେ। ଅବଶିଷ୍ଟ ଜୀବନ ଉଭୟ ବୃଦ୍ଧା ଦମ୍ପତି ସାନ ଜ୍ୱାଇଁଙ୍କ ନିକଟରେ ରହିବେ ବୋଲି ନିଷ୍ପତ୍ତି ହୋଇଥିଲା। ଉପଜିଲାପାଳ ସାହୁ ସମସ୍ତଙ୍କୁ ବୁଝାସୁଝା କରିବା ସହିତ ନିଷ୍ପତ୍ତି ଅନୁଯାୟୀ କାର୍ଯ୍ୟ କରିବାକୁ ପରାମର୍ଶ ଦେଇଥିଲେ।