ଅନୁଗୋଳ ଅଫିସ, ୨୫।୩- ଲକ୍ଡାଉନ ଘୋଷଣା ପରଠାରୁ ବିଭିନ୍ନ ଅତ୍ୟାବଶ୍ୟକ ସାମଗ୍ରୀ କିଣିବାକୁ ଅନୁଗୋଳ ସହରର ବିଭିନ୍ନ ଦୋକାନରେ ଭିଡ଼ ବଢ଼ୁଛି। ବୁଧବାର ଉତ୍ତର କେନ୍ଦ୍ରାଞ୍ଚଳ ଆଇଜି ନରସିଂହ ଭୋଳ ସହର ପରିଦର୍ଶନ କରି ଏପରି ଭିଡ଼ ନ ଲଗାଇବାକୁ କହିଥିଲେ। ସେହିପରି ଜିଲାପାଳ ମନୋଜ କୁମାର ମହାନ୍ତି ଓ ଏସ୍ପି ଜଗମୋହନ ମୀନା ମଧ୍ୟ ଭିଡ଼ ହ୍ରାସ ପାଇଁ ଡାକବାଜି ଯନ୍ତ୍ର ମାଧ୍ୟମରେ ଲୋକଙ୍କୁ ସଚେତନ କରିଥିଲେ। ଏଥିସହ ସମସ୍ତ ପାଇକାରୀ ଓ ଖୁଚୁରା ରାଶନ, ପରିବା ଦୋକାନ ସମ୍ମୁଖରେ ୧ରୁ ୨ ମିଟର ଦୂରତାର ଧଳା ଗୋଲେଇ ଚିହ୍ନ ଲଗାଇ ତା ମଧ୍ୟରେ ଧାଡ଼ିରେ ଠିଆ ହୋଇ ସାମଗ୍ରୀ କିଣିବାକୁ ଲୋକଙ୍କୁ ପରାମର୍ଶ ଦେଇଥିଲେ। ଲକ୍ଷ୍ମଣ ରେଖା ବୋଲି କୁହାଯାଉଥିବା ଏହି ଚିହ୍ନ ବାହାରେ ଜମା ହୋଇଥିବା ଗ୍ରାହକମାନଙ୍କୁ ସାମଗ୍ରୀ ନ ଦେବାକୁ ବ୍ୟବସାୟୀଙ୍କୁ କହିଥିଲେ। ଏଥିସହ ଦୋକାନ ସମ୍ମୁଖରେ ରୁଣ୍ଡ ହେଲେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଜିଲାପାଳ ଚେତାଇ ଦେଇଥିଲେ। ମାଲ ପରିବହନ ଉପରେ କୌଣସି କଟକଣା ନ ଥିବାରୁ ନିୟମିତ ଭାବେ ଜିଲାକୁ ଆବଶ୍ୟକ ରାଶନ ସାମଗ୍ରୀ ଓ ପନିପରିବା ଆସି ପହଞ୍ଚତ୍ପାରୁଛି। ସେଥିପାଇଁ ସମସ୍ତେ ଘରେ ରୁହନ୍ତୁ। ଆବଶ୍ୟକତା ଅନୁଯାୟୀ ସାମଗ୍ରୀ କ୍ରୟ କରିବା ସହ ଭିଡ଼ ନ କରିବାକୁ ଜିଲାପାଳ ଓ ଏସ୍ପି ଗ୍ରାହକମାନଙ୍କୁ ନିବେଦନ କରିଥିଲେ। ସେହିପରି ବନ୍ତଳା ପୋଲିସ ପକ୍ଷରୁ ମଧ୍ୟ ବିଭିନ୍ନ ଦୋକାନ ସମ୍ମୁଖରେ ଧଳା ରଙ୍ଗର ଛକି ଚିହ୍ନ ଦିଆଯାଇଛି। ଥାନା ଦାୟିତ୍ୱରେ ଥିବା ସୌରବ ଓତା, ଆଇଆଇସି ଗୀତା ସାହୁ, ଏସ୍ଆଇ ନିରଞ୍ଜନ ନାୟକ ପ୍ରମୁଖ ବନ୍ତଳା, ବଡ଼କେରା, ପୁରୁଣାଗଡ଼, ବେଡାଶାସନ, କରତପଟା, ପୋକତୁଙ୍ଗା, ଖିଣ୍ଡା, ଗଡ଼ତରାସ ଆଦି ଅଞ୍ଚଳର ଦୋକାନ ସମ୍ମୁଖରେ ଛକି ଚିହ୍ନ ପକାଇଛନ୍ତି।