ନୂଆଦିଲ୍ଲୀ,୭ା୮(ପି.ଟି. ) : ଜମ୍ମୁ-କଶ୍ମୀର ପୁନର୍ଗଠନ ବିଲ୍ ଲୋକ ସଭାରେ ଆଗତ ବେଳେ କଂଗ୍ରେସ ନେତା ଅଧୀର ରଞ୍ଜନ ଚୌଧୁରୀ ଅଜବ ପ୍ରଶ୍ନ ଉଠାଇ ଅଡ଼ୁଆରେ ଫସିଛନ୍ତି। ସ୍ବରାଷ୍ଟ୍ରମନ୍ତ୍ରୀ ଅମିତ୍ ଶାହ ଲୋକ ସଭାରେ ବିଲ୍ ଆଗତ କରିବା ପରେ ଅଧୀର କହିଥିଲେ, ଆପଣ କହୁଛନ୍ତି ଏହା ଏକ ଆଭ୍ୟନ୍ତରୀଣ ବ୍ୟାପାର। ହେଲେ ଜାତିସଂଘ ଏହା ଉପରେ ୧୯୪୮ରୁ ଅନୁଧ୍ୟାନ କରିଆସୁଛି। ସେହିପରି ସିମ୍ଲା ଚୁକ୍ତିନାମା ଓ ଲାହୋର ଘୋଷଣାନାମା ମଧ୍ୟ ରହିଛି। ତେଣୁ ଜମ୍ମୁ-କଶ୍ମୀର ଭାରତର ଆଭ୍ୟନ୍ତରୀଣ ନା ଏହା ଏକ ଦ୍ୱିପାକ୍ଷିକ ପ୍ରସଙ୍ଗ ବୋଲି ଅଧୀର ଏହା ଉପରେ ଶାସକ ପକ୍ଷର ସ୍ପଷ୍ଟୀକରଣ ଲୋଡ଼ିଥଲେ, ଯାହାକୁ ନେଇ ବିବାଦ ସୃଷ୍ଟି ହୋଇଥିଲା। ସଂଖ୍ୟାଲଘୁ ବ୍ୟାପାର ମନ୍ତ୍ରୀ ମୁଖ୍ତାର ଅବ୍ବାସ ନକଭୀ ଏହାର ଜବାବରେ କହିଛନ୍ତି, ମୁଣ୍ଡବିହୀନ କଂଗ୍ରେସ ଏବେ ମସ୍ତିଷ୍କବିହୀନ ହୋଇଯାଇଛି। କଶ୍ମୀର ଆମର ଅବିଚ୍ଛେଦ୍ୟ ଅଙ୍ଗ ଏବଂ ଆଭ୍ୟନ୍ତରୀଣ ପ୍ରସଙ୍ଗ ନୁହେଁ ବୋଲି କଂଗ୍ରେସ କିପରି କହୁଛି। ଏହା କଂଗ୍ରେସର ମାନସିକ ଦେବାଳିଆପଣକୁ ଦର୍ଶାଉଛି। ଗୃହରେ କଂଗ୍ରେସ ନେତା ସୋନିଆ ଗାନ୍ଧୀ ଓ ରାହୁଲ ଗାନ୍ଧୀ ଉପସ୍ଥିତ ଥାଇ ଅଧୀରଙ୍କୁ ଏଭଳି ମନ୍ତବ୍ୟ ଦେବାରୁ କ୍ଷାନ୍ତ ରହିବାକୁ କାହିଁକି ଦାଗିଦ କଲେନାହିଁ ବୋଲି ନକଭୀ ପ୍ରଶ୍ନ କରିଛନ୍ତି।