ଛତ୍ରପୁର,୨୯ା୪(ଡି.ଏନ.ଏ.)-ଗଞ୍ଜାମ ଜିଲାରେ ଦିଆଯାଉଥିବା ସ୍ବାସ୍ଥ୍ୟ ସେବାର ଏକ ସମୀକ୍ଷା ବୈଠକ ରବିବାର ଛତ୍ରପୁରସ୍ଥିତ ଜିଲାପାଳଙ୍କ ସମ୍ମିଳନୀ କକ୍ଷରେ ଅନୁଷ୍ଠିତ ହୋଇଥିଲା। ଏଥିରେ ଜିଲାପାଳ ବିଜୟ ଅମୃତା କୁଲାଙ୍ଗେ ଅଧ୍ୟକ୍ଷତା କରି ଜନସାଧାରଣଙ୍କୁ ଉତ୍ତମ ସେବା ଯୋଗାଇଦେବା ଉପରେ ଗୁରୁତ୍ୱାରୋପ କରିଥିଲେ। ଗତ ୩ ମାସ ମଧ୍ୟରେ ହସ୍ପିଟାଲରେ ମୃତ୍ୟୁ ହୋଇଥିବା ବ୍ୟକ୍ତିଙ୍କ ମଧ୍ୟରୁ ୨ ପ୍ରସୂତିିଙ୍କ ମୁତ୍ୟୁର କାରଣ ଖୋଜା ଯାଇଥିଲା। ସାନଖେମୁଣ୍ଡି ବ୍ଲକ ଆଡପଡା ଓ ଖଲ୍ଲିକୋଟ ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରରେ ମତ୍ୟୁ ହୋଇଥିବା ୨ ପ୍ରସୂତିଙ୍କ ସମ୍ପର୍କୀୟ, ମେଡିକାଲ ଅଫିସର, ଏଏନଏମଙ୍କୁ ଡାକି ଜିଲାପାଳ ମୃତ୍ୟୁର କାରଣ ପଚାରି ବୁଝିଥିଲେ। କେଉଁ ସ୍ତରରେ ଅବହେଳା ହୋଇଛି ଏବଂ କ’ଣ ପାଇଁ ମାତୃ ଓ ଶିଶୁର ମୃତ୍ୟୁ ହେଉଛି ସେ ସମ୍ପର୍କରେ ତଦନ୍ତ କରି ଏହାର ହାର କମାଇବାକୁ ଜିଲାପାଳ ନିର୍ଦ୍ଦେଶ ଦେଇଛନ୍ତିି। ଏଡ୍ସ ଉପରେ ନିୟନ୍ତ୍ରଣ ପାଇଁ ବିଭିନ୍ନ ସଚେତନତା କାର୍ଯ୍ୟକ୍ରମ କରିବା ଉପରେ ଜିଲାପାଳ ଗୁରୁତ୍ୱାରୋପ କରିଥିଲେ। ବିବାହ ପୂର୍ବରୁ ଉଭୟ ପୁରୁଷ ଓ ମହିଳା ନିଜଠାରେ ଏଚଆଇଭି ଅଛି କି ନାହିଁ ତା’ର ପରୀକ୍ଷା କଲେ ଏହା ନିୟନ୍ତ୍ରଣ ହୋଇପାରନ୍ତା ବୋଲି ଜିଲାପାଳ କହିଥିଲେ। ସେହିପରି ଅନ୍ୟ ରାଜ୍ୟରେ ଶ୍ରମିକ ଭାବେ କାମ କରୁଥିବା ବ୍ୟକ୍ତି ଘରକୁ ଫେରିଲେ ସେମାନଙ୍କର ମଧ୍ୟ ଏଚଆଇଭି ପରୀକ୍ଷା କରିବାକୁ ସ୍ତ୍ରୀମାନେ କହିବା ଆବଶ୍ୟକ। ତେବେ ଏ ସମ୍ପର୍କରେ ବ୍ୟାପକ ସଚେତନତା କାର୍ଯ୍ୟକ୍ରମ କରିବାକୁ ସ୍ଥିର ହୋଇଥିଲା। ବିଭିନ୍ନ ସମସ୍ୟାକୁ ଗଣମାଧ୍ୟମ ସମ୍ମୁଖକୁ ଆଣିବାରେ ବଡ ଭୂମିକା ନିର୍ବାହ କରୁଛନ୍ତି। ଏଣୁ ଗଣମାଧ୍ୟମରେ ପ୍ରକାଶିତ ଖବରକୁ ସକାରାମତ୍କ ଦୃଷ୍ଟିରେ ଦେଖିବା ସହ ସମସ୍ୟା ସମାଧାନ କରିବାକୁ ଅବିଳମ୍ବେ ପଦକ୍ଷେପ ନେବା ପାଇଁ ଜିଲାପାଳ ପରାମର୍ଶ ଦେଇଛନ୍ତି। ସ୍ବାସ୍ଥ୍ୟ ଓ ଶ୍ରମ ବିଭାଗ ମିଳିତ ସହାୟତାରେ କେତେକ ପଞ୍ଚାୟତକୁ ନେଇ ପରାମର୍ଶ ମେଳା ଆୟୋଜନ ହେବ। ଜନସାଧାରଣଙ୍କୁ ସ୍ବାସ୍ଥ୍ୟ ସେବାରେ ଅଂଶୀଦାର କରାଯିବ। ଗତ ବର୍ଷ ୯୦ ପ୍ରତିଶତ ଟିକାକରଣ କାର୍ଯ୍ୟକ୍ରମ ହୋଇଛି। ଚଳିତ ବର୍ଷ ମଧ୍ୟ ଥିବା ଟିକାକରଣ ଲକ୍ଷ୍ୟ ପୂରଣ କରିବାକୁ ଜିଲାପାଳ କହିଥିଲେ। ଆବଶ୍ୟକତା ଅନୁସାରେ ୧୦୨ ଆମ୍ବୁଲାନ୍ସ ବିଭିନ୍ନ ସ୍ଥାନରେ ରଖିବାକୁ କୁହାଯାଇଥିଲା। ଆଶା ଓ ଏଏନ୍ଏମମାନଙ୍କୁ ବିଭିନ୍ନ ସଚେତନା କାର୍ଯ୍ୟକ୍ରମ ପାଇଁ ତାଲିମ ଦିଆଯିବ। ଅଂଶୁଘାତର ମୁକାବିଲା ପାଇଁ ସଚେତନତା କାର୍ଯ୍ୟକ୍ରମ ସହ ପ୍ରତି ସ୍ବାସ୍ଥ୍ୟକେନ୍ଦ୍ରରେ ସ୍ବତନ୍ତ୍ର ଶଯ୍ୟା, ଓଆରଏସ୍ ପ୍ୟାକେଟ୍ ଓ ଏସି ଲଗାଇବାକୁ କୁହାଯାଇଥିଲା। ବୈଠକରେ ଜିଲା ମୁଖ୍ୟ ଚିକିତ୍ସାଧିକାରୀ ଡା. ବିଜୟ ପାଣିଗ୍ରାହୀ, ଅତିରିକ୍ତ ମୁଖ୍ୟ ଚିକିତ୍ସାଧିକାରୀ ଡା. ପି କୁର୍ମେୟା, ଡା. ସରୋଜିନୀ ଦେବୀ, ଅତିରିକ୍ତି ଏସ୍ପି ପତିତପାବନ ଚୌଧୁରୀ, ଡିପିଏମ୍ ଶ୍ୟାମ ସୁନ୍ଦର ତ୍ରିପାଠୀଙ୍କ ସମେତ ମେଡିକାଲ ଅଫିସର ପ୍ରମୁଖ ଉପସ୍ଥିତ ଥିଲେ।