ଓଡାପଡା,୨୪ା୨(ଡି.ଏନ.ଏ) ଢେଙ୍କାନାଳ ଜିଲା ଓଡାପଡା ବ୍ଲକ ସଦାଶିବପୁର ପଞ୍ଚାୟତ ତେନ୍ତୁଳିଆପଡା ଓ ରସାସିଂ ଅଞ୍ଚଳରେ ଭାରତ ପେଟ୍ରୋଲିୟମ କର୍ପୋରେଶନ ଲିମିଟେଡ (ବିପିସିଏଲ୍)ର ପ୍ରସ୍ତାବିତ ତୈଳ ଭଣ୍ଡାରକୁ ଶନିବାର ଜୋରଦାର ବିରୋଧ କରାଯାଇଛି। ସଦାଶିବପୁର, ଗୁଣଦେଇ ଓ ଗଦାଶିଳା ପଞ୍ଚାୟତର ବହୁ ଲୋକେ ପସାସିଂ ଗ୍ରାମ ନିକଟରେ ଏ ନେଇ ଏକ ପ୍ରତିବାଦ ସଭା କରିଥିଲେ।
ଜିଲା ପରିଷଦର ପୂର୍ବତନ ସଭାପତି ରେବତୀ ବେହେରାଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏହି ପ୍ରତିବାଦ ସଭାରେ ବରିଷ୍ଠ କୃଷକ ନେତା ତଥା କୃଷକ ଆନ୍ଦୋଳନର ଆବାହକ ଲିଙ୍ଗରାଜ ଯୋଗଦେଇ ଏହି ପ୍ରକଳ୍ପକୁ ବିରୋଧ କରିବା ସହ ଏହା ଚାଷୀ, ଚାଷ, ହାତୀ ଓ ଅଞ୍ଚଳବାସୀଙ୍କ ପାଇଁ ଅନେକ ଅସୁବିଧା ସୃଷ୍ଟି କରିବ ବୋଲି ମତବ୍ୟକ୍ତ କରିଥିଲେ। ସାମାଜିକ କର୍ମୀ ପ୍ରଶାନ୍ତ କୁମାର ମିଶ୍ର, ସରୋଜ କୁମାର ଶତପଥୀ, ଜୟନ୍ତ କୁମାର ଧଳ, ଶେଖରଚନ୍ଦ୍ର ସେଠି, ଅନ୍ତର୍ଯ୍ୟାମୀ ବରାଳ, ଗୋଲକ ବିହାରୀ ମହାନ୍ତି, ପ୍ରମିଳା ଜେନା, ଲକ୍ଷ୍ମଣ କବି, ସଦାଶିବପୁର ସମିତି ସଭ୍ୟା ଧରିତ୍ରୀ ମଲିକ ପ୍ରମୁଖ ସ୍ଥାନୀୟ ଅଞ୍ଚଳର ସମସ୍ୟା ପ୍ରତି ଗୁରୁତ୍ୱ ନ ଦେଇ ଜନବସତି ନିକଟରେ ଏଭଳି ଏକ ପ୍ରକଳ୍ପ ନିର୍ମାଣ ନିଷ୍ପତ୍ତିର ତୀବ୍ର ନିନ୍ଦା କରିଥିଲେ। ପ୍ରସ୍ତାବିତ ଅଞ୍ଚଳ ହାତୀ ଚଲାପଥ ହୋଇଥିବାରୁ ସେଠାରେ ପାଚେରି ନିର୍ମାଣ କଲେ ହାତୀପଲ ପଥ ହୁଡିବା ସହ ଗ୍ରାମାଭିମୁଖୀ ହୋଇ ଧନଜୀବନ ହାନି କରିବାର ସମ୍ଭାବନା ରହିଛି। ଉକ୍ତ ପ୍ରକଳ୍ପ ଏକ ଉପତ୍ାଦନମୂଳକ ପ୍ରକଳ୍ପ ହୋଇ ନ ଥିବାରୁ କମ୍ପାନୀ କର୍ତ୍ତୃପକ୍ଷ ନିଯୁକ୍ତି ପ୍ରଦାନ ନେଇ ଦେଇଥିବା ପ୍ରତିଶ୍ରୁତି ପୂରଣ ହୋଇପାରିବ ନାହିଁ ବୋଲି ସଭାରେ ମତ ପ୍ରକାଶ ପାଇଥିଲା। ଏହି ପ୍ରକଳ୍ପ ପାଇଁ ଜାନୁୟାରୀ ୩୧ରେ ରସାସିଂ ଓ ତେନ୍ତୁଳିଆପଡା ଗ୍ରାମରେ ହୋଇଥିବା ଗ୍ରାମସଭା ଜୋର ଜବରଦସ୍ତ ଓ ଏକତରଫା ଭାବେ କରାଯାଇଥିବାରୁ ତାହାକୁ ରଦ୍ଦ କରିବା ପାଇଁ ସେମାନେ ଦୃଢ଼ ଦାବି ଜଣାଇଥିଲେ। ଆଗାମୀ ଦିନରେ ଆନ୍ଦୋଳନକୁ ବ୍ୟାପକ କରାଯିବ ବୋଲି ସଭାରେ ନିଷ୍ପତ୍ତି ନିଆଯାଇଥିଲା। ନିର୍ମଳ କୁମାର ଜେନା ଧନ୍ୟବାଦ ଦେଇଥିବା ବେଳେ ବାମଦେବ ପରିଡା, ସୁଶୀଳ ପରିଡା ଓ ଅଜିତ ବେହେରା ସହଯୋଗ କରିଥିଲେ।