ବନ୍ତଳା,୨୯ା୯(ଡି.ଏନ.ଏ.) – ଅନୁଗୋଳ ଜିଲା ବନ୍ତଳା ଅଞ୍ଚଳର ପ୍ରସ୍ତାବିତ ହିଡିସିଙ୍ଗ ମଧ୍ୟମ ଜଳ ସେଚନ ପ୍ରକଳ୍ପ କାର୍ଯ୍ୟରେ ପ୍ରଶାସନିକ ମନ୍ଥରତା ଦେଖାଦେଇଥିବା ଅଭିଯୋଗ କରିଛି ହିଡିସିଙ୍ଗ କୃଷକ ମହାସଂଘ। ଶୁକ୍ରବାର ଅନୁଗୋଳ ଗସ୍ତରେ ଥିବା ରାଜ୍ୟ ସରକାରଙ୍କ ଜଳ ସମ୍ପଦ ମନ୍ତ୍ରୀ ରଘୁ ନନ୍ଦନ ଦାସଙ୍କୁ ମହାସଂଘ ସଦସ୍ୟମାନେ ଭେଟି ଏ ନେଇ ଏକ ସ୍ମାରକପତ୍ର ପ୍ରଦାନ କରିଥିବା ଜଣାପଡ଼ିଛି।
ଅନୁଗୋଳ ବିଧାୟକ ରଜନୀକାନ୍ତ ସିଂହଙ୍କ ନିର୍ଦ୍ଦେଶ କ୍ରମେ ରାଜ୍ୟ ଗ୍ରାମ୍ୟ ଗୃହ ନିର୍ମାଣ ନିଗମ ଅଧ୍ୟକ୍ଷ ମୀନକେତନ ଅମାନ୍ତ, ବ୍ଲକ ବିଜେଡି ସଭାପତି ତଥା ବିଧାୟକଙ୍କ ପ୍ରତିନିଧି ଦୁର୍ଗା ଚରଣ ପ୍ରଧାନ, ଜିଲା ଯୁବ ବିଜେଡି ସଭାପତି ତଥା ଛେଣ୍ଡିପଦା ବିଧାୟକଙ୍କ ପ୍ରତିନିଧି ଦିନେଶ ପ୍ରଧାନଙ୍କ ଉପସ୍ଥିତରେ ହିଡିସିଙ୍ଗ କୃଷକ ମହାସଂଘ ସଭାପତି ଦିନେଶ ଦେହୁରୀ, ସମ୍ପାଦକ ତ୍ରିନାଥ ସାହୁ, ଉପ ସଭାପତି ଦୁର୍ଗାଚରଣ ପ୍ରଧାନ, ଉପଦେଷ୍ଟା ଇଂ ତ୍ରିନାଥ ସାହୁ ପ୍ରମୁଖ ସର୍କିଟ ହାଉସରେ ମନ୍ତ୍ରୀଙ୍କୁ ଭେଟି ଏହି ସ୍ମାରକପତ୍ର ପ୍ରଦାନ କରିଛନ୍ତି। ଏଥିରେ ଉଲ୍ଲେଖ କରାଯାଇଛି ଯେ, ଦୀର୍ଘ ୩୦ ବର୍ଷ ଧରି ଚାଷୀ ଆନ୍ଦୋଳନ ପରେ ୨୦୦୦ ମସିହାରେ ରାଜ୍ୟ ସରକାର କଟକ ଅନୁସନ୍ଧାନ ବିଭାଗ ଦ୍ୱାରା ଏହି ପ୍ରକଳ୍ପ ପାଇଁ ସର୍ଭେ କାର୍ଯ୍ୟ କରି ଆସୁଛନ୍ତି। ଏହି ପ୍ରକଳ୍ପ କାର୍ଯ୍ୟକ୍ଷମ ହେଲେ ୧୨ଟି ପଞ୍ଚାୟତ ସିଧାସଳଖ ଓ ୮ଟି ପଞ୍ଚାୟତର ମୋଟ୍ ୨୯୫୮ ହେକ୍ଟର ଚାଷଜମି ଜଳସେଚିତ ହୋଇପାରିବ। ଏଥିସହିତ ଦୀର୍ଘ ବର୍ଷ ଧରି ଅନୁଗୋଳ ସହର ଯେଉଁ ପାଣି ସମସ୍ୟା ଭୋଗୁଛି ତାହା ମଧ୍ୟ ଦୂରହେବ। ୨୦୦୭ରେ ଏହାକୁ କେନ୍ଦ୍ର ସରକାରଙ୍କ ସିଡବ୍ଲ୍ୟୁସି ଆପ୍ରୁଭାଲ ମିଳିଥିବା ବେଳେ ୫୦ ହଜାର ଚାଷୀ ଉପକୃତ ହେବେ। ଏହି ପ୍ରକଳ୍ପ ପାଇଁ ବିଭିନ୍ନ ସର୍ଭେ ଓ ତଥ୍ୟ ସଂଗ୍ରହ କରି ସରକାରଙ୍କ ଅନୁସନ୍ଧାନ ବିଭାଗକୁ ଦେବା ଦାୟିତ୍ୱ ବେସରକାରୀ ସଂସ୍ଥା ଭିଜନ ଟେକ ନେଇଛି। କିନ୍ତୁ ସଂସ୍ଥା କାର୍ଯ୍ୟ ମନ୍ଥର ଗତିରେ କରୁଥିବା ଯୋଗୁ ପ୍ରକଳ୍ପ ବିଳମ୍ବିତ ହେଉଥିବା ମହାସଂଘ ଦର୍ଶାଇଛି। ଏହି ସ୍ମାରକପତ୍ର ଗ୍ରହଣ କରିବା ସହ ମନ୍ତ୍ରୀ ମହାସଂଘକୁ ଆଶ୍ୱାସନା ଦେଇଛନ୍ତି। ପ୍ରକଳ୍ପ ସମ୍ପର୍କରେ ମୁଖ୍ୟମନ୍ତ୍ରୀଙ୍କୁ ଅବଗତ କରାଇବା ସହିତ ବିଭିନ୍ନ ପଦକ୍ଷେପ ନିଆଯିବ ବୋଲି ମନ୍ତ୍ରୀ ପ୍ରତିଶ୍ରୁତି ଦେଇଥିବା ମହାସଂଘ ପକ୍ଷରୁ କୁହାଯାଇଛି।