ଜୟପୁର,୨୬ା୬(ନି.ପ୍ର./ଡି.ଏନ୍.ଏ.): ଥିଓରିରେ ୮୦ ପ୍ରତିଶତ ମାର୍କ ରଖିଥିବା ଜଣେ ଛାତ୍ରୀଙ୍କୁ ଗୃହ ବିଜ୍ଞାନର ପ୍ରାକ୍ଟିକାଲରେ ମାତ୍ର ୧୨ ମାର୍କ ମିଳିଛି। ଜୟପୁର ସରକାରୀ ମହିଳା ମହାବିଦ୍ୟାଳୟରେ ଏଭଳି ବ୍ୟତିକ୍ରମ ଛାତ୍ରୀମାନଙ୍କୁ ଅସନ୍ତୁଷ୍ଟ କରିଛି। ବୁଧବାର ସେମାନେ କଲେଜ ଘେରାଉ କରି ଅଧ୍ୟକ୍ଷାଙ୍କୁ ଲିଖିତ ଅଭିଯୋଗ ଦେଇଛନ୍ତି। ଏହାର ନକଲ ଉଚ୍ଚଶିକ୍ଷା ମନ୍ତ୍ରୀ, ସଚିବ, ମାଧ୍ୟମିକ ଶିକ୍ଷା ପରିଷଦର ଅଧ୍ୟକ୍ଷଙ୍କୁ ମଧ୍ୟ ପଠାଯାଇଛି। ପିଲାଙ୍କ ଅଭିଭାବକ କଲେଜ ଅଧ୍ୟକ୍ଷାଙ୍କୁ ଭେଟି ଅଭିଯୋଗ ଜଣାଇଛନ୍ତି।
ସୂଚନା ଅନୁଯାୟୀ, ଯୁକ୍ତ ୨ କଳାରେ କଲେଜରେ ପ୍ରଥମ ହୋଇଥିବା ଛାତ୍ରୀ ରେଶମା ପାତ୍ର ୮୦ ପ୍ରତିଶତ ମାର୍କ ଆଣିଥିବା ବେଳେ ପ୍ରାକ୍ଟିକାଲରେ ମାତ୍ର ୧୨ ମାର୍କ ଆଣିଛନ୍ତି । ଯେଉଁମାନେ ଥିଓରିରେ ୩ ମାର୍କ ଆଣି ଫେଲ୍ ହୋଇଛନ୍ତି, ସେମାନଙ୍କୁ ପ୍ରାକ୍ଟିକାଲରେ ଅଧିକ ମାର୍କ ମିଳିଛି। ପ୍ରାକ୍ଟିକାଲ ଦିନ ବିନା ପ୍ରଶ୍ନପତ୍ରରେ ହୋଇଥିବା ବେଳେ ଇନଭିଜିଲେଟରଙ୍କ ଅନୁପସ୍ଥିତିରେ ପରୀକ୍ଷା କରାଯାଇଥିଲା। ଗୃହ ବିଜ୍ଞାନର ଜନୈକା ଅଧ୍ୟାପିକା ପରୀକ୍ଷା ପୂର୍ବରୁ ‘ପ୍ରାକ୍ଟିକାଲ ମାର୍କ ମୋ ହାତରେ ରହିଛି, କାହାକୁ ବି ୨୦ ମାର୍କ ଦେବିନାହିଁ’ ବୋଲି ଧମକ ଦେଉଥିବା ଛାତ୍ରୀମାନେ କହିଛନ୍ତି। ରେଗୁଲାର ଓ ଏକ୍ସ ରେଗୁଲାର ମିଶି ପ୍ରାକ୍ଟିକାଲରେ ୨୧୫ ଜଣ ଛାତ୍ରୀ ପରୀକ୍ଷା ଦେଇଥିଲେ। ଅଧିକାଂଶ ପରୀକ୍ଷାର୍ଥୀଙ୍କୁ ମାତ୍ର ୧୨, ୧୫, ୨୦ ମାର୍କ ମିଳିଛି। ଏହିପରି ଅର୍ପିତା ମହାପାତ୍ର, ମୌସୁମୀ ପାତ୍ର ଓ ଅନ୍ୟ ୧୫ରୁ ଊର୍ଦ୍ଧ୍ୱ ଛାତ୍ରୀଙ୍କ ମଧ୍ୟ ପ୍ରାକ୍ଟିକାଲରେ ମାର୍କ କମ ରହିଥିବା ସେମାନଙ୍କ ଅଭିଭାବକ ଅଭିଯୋଗ କରିଛନ୍ତି । ପିଲାଙ୍କୁ ଜାଣିଶୁଣି ହତାଶ କରାଯାଉଥିବା ବିଷୟ ଜଣେ ଛାତ୍ରୀଙ୍କ ଅଭିଭାବକ ବିଜୟ କୁମାର ମହାନ୍ତି ପ୍ରକାଶ କରିଛନ୍ତି । ଏନେଇ ଅଧ୍ୟକ୍ଷା ମନୋରମା ଦେବୀଙ୍କ ପ୍ରତିକ୍ରିୟା ମାଗିବା ପରେ ସେ କହିଥିଲେ, ଥିଓରିରେ ଜଣେ ଭଲ କଲେ ପ୍ରାକ୍ଟିକାଲରେ ମଧ୍ୟ ଭଲ କରିବେ, ସେମିତି କିଛି ମାନେ ନାହିଁ। ଯାହା ମାର୍କ ଦିଆଯାଇଛି, ପରୀକ୍ଷା ଯୋଗ୍ୟତା ଅନୁଯାୟୀ ଦିଆଯାଇଛି । ମାର୍କ ଉପରେ ଅଧ୍ୟକ୍ଷାଙ୍କର କୌଣସି କର୍ତ୍ତୃତ୍ୱ ନଥାଏ। ସେମାନଙ୍କ ସନ୍ଦେହ ହେଲେ ଉଚ୍ଚ କର୍ତ୍ତୃପକ୍ଷଙ୍କ ନିକଟରେ ଅଭିଯୋଗ କରିପାରିବେ ବୋଲି ଅଧ୍ୟକ୍ଷା କହିଛନ୍ତି।