ବର୍ଲିନ୍,୧୬ା୪: କରୋନା ଭାଇରସ୍ ସଂକ୍ରମଣ ଯୋଗୁ ପୃଥିବୀରେ ଅଚଳାବସ୍ଥା ସୃଷ୍ଟି ହୋଇଛି। ସୁରକ୍ଷା ଦୃଷ୍ଟିରୁ ୯୦ରୁ ଅଧିକ ଦେଶରେ ଲକ୍ଡାଉନ୍ ଜାରି ହୋଇଛି। ଏପରିସ୍ଥଳେ ପରିବହନ ବ୍ୟବସ୍ଥା ବ୍ୟାହତ ହେବାରୁ ମଣିଷଠାରୁ ଆରମ୍ଭ କରି ପ୍ରାଣୀଜଗତ ପର୍ଯ୍ୟନ୍ତ ସଭିଙ୍କ ପାଇଁ ଖାଦ୍ୟର ଅଭାବ ଦେଖାଦେଇଛି। ତେବେ ଜର୍ମାନୀ ପ୍ରାଣୀ ଉଦ୍ୟାନରେ ଥିବା ପ୍ରାଣୀଙ୍କ ଲାଗି ଖାଦ୍ୟର ଘୋର ଅଭାବ ସୃଷ୍ଟି ହୋଇଛି। ଇଷ୍ଟରରେ ପ୍ରତିବର୍ଷ ଏଠାରେ ଥିବା ବିଭିନ୍ନ ପ୍ରାଣୀ ଉଦ୍ୟାନରେ ପର୍ଯ୍ୟଟକଙ୍କ ଗହଳି ହୋଇଥାଏ। ତେବେ ଚଳିତବର୍ଷ କରୋନା ସଂକ୍ରମଣ ଯୋଗୁ ସମସ୍ତ ପ୍ରାଣୀ ଉଦ୍ୟାନ ବନ୍ଦ ରହିଛି। ତେଣୁ କିଛି ପ୍ରାଣୀଙ୍କୁ ହତ୍ୟା କରାଯିବାର ନିଷ୍ପତ୍ତି ଗ୍ରହଣ କରାଯାଇଛି। ସେମାନଙ୍କ ମାଂସକୁ ଅନ୍ୟ ପ୍ରାଣୀଙ୍କୁ ଖାଇବାକୁ ଦିଆଯିବ ବୋଲି ଉତ୍ତର ଜର୍ମାନୀର ଏକ ପ୍ରାଣୀ ଉଦ୍ୟାନ ନିର୍ଦ୍ଦେଶକ ସୂଚନା ଦେଇଛନ୍ତି। ଅନ୍ୟ ପ୍ରାଣୀ ଉଦ୍ୟାନରେ ମଧ୍ୟ ଏଭଳି କରାଯିବାର ଯୋଜନା ରହିଛି। ନେମୁନଷ୍ଟର ପ୍ରାଣୀ ଉଦ୍ୟାନର ଅଧିକାରୀ କାସପାରି କହିଛନ୍ତି ଯେ, ଏଭଳି କରିବା ଦ୍ୱାରା କିଛି ପ୍ରାଣୀ ଏହି ସଙ୍କଟ ଜନକ ସ୍ଥିତିରେ ବଞ୍ଚି ରହିବାକୁ ସକ୍ଷମ ହୋଇପାରିବେ। ସୂଚନାଯୋଗ୍ୟ, ପ୍ରତି ସପ୍ତାହରେ ଜର୍ମାନୀରେ ଥିବା ପ୍ରାଣୀ ଉଦ୍ୟାନ ପାଇଁ ପ୍ରାୟ ୫୦୦,୦୦୦ ୟୁରୋ ଖର୍ଚ୍ଚ ହୋଇଥାଏ।