ନୂଆଦିଲ୍ଲୀ,୨୭।୧୧(ପି.ଟି.)- ପ୍ରିମିୟମ ବ୍ୟାଡମିଣ୍ଟନ ଲିଗ୍ (ପିବିଏଲ) ପଞ୍ଚମ ସସ୍କରଣ ପାଇଁ ଏଠାରେ ଖେଳାଳି ନିଲାମ ଅନୁଷ୍ଠିତ ହୋଇଯାଇଛି। ବିଶ୍ୱ ଚାମ୍ପିୟନ ପି.ଭି. ସିନ୍ଧୁଙ୍କୁ ସର୍ବାଧିକ ୭୭ ଲକ୍ଷ ଟଙ୍କା ବିନିମୟରେ ହାଇଦ୍ରାବାଦ ହଣ୍ଟର୍ସ କ୍ରୟ କରିଛି। ସେହିପରି ବିଶ୍ୱର ୧ ନମ୍ବର ମହିଳା ଖେଳାଳି ଚାଇନିଜ୍ ତାଇପେଇର ତାଇ ଜୁ ୟିଙ୍ଗ୍ ମଧ୍ୟ ୭୭ ଲକ୍ଷ ଟଙ୍କାରେ ବିକ୍ରି ହୋଇଛନ୍ତି। ତାଙ୍କୁ ଗତ ସଂସ୍କରଣର ଚାମ୍ପିୟନ ବେଙ୍ଗାଲୁରୁ ରାପ୍ଟର୍ସ କ୍ରୟ କରିଛି। ତାଇକୁ କ୍ରୟ କରିବା ପାଇଁ ବେଙ୍ଗାଲୁରୁକୁ ପୁଣେ ୭ ଆସେସ୍ ସହ କଡ଼ା ପ୍ରତିଦ୍ୱନ୍ଦ୍ୱିତା କରିବାକୁ ପଡିଥିଲା।
ସେହିପରି ଅନ୍ୟତମ ଭାରତୀୟ ତାରକା ବି. ସାଇ ପ୍ରଣୀତଙ୍କୁ ୩୨ ଲକ୍ଷ ଟଙ୍କା ବିନିମୟରେ ବେଙ୍ଗାଲୁରୁ ବଜାୟ ରଖିଛି। ସେହିପରି ବି. ସୁମୀତ ରେଡ୍ଡୀ ୧୧ ଲକ୍ଷ ଟଙ୍କା ବିନିମୟରେ ଚେନ୍ନାଇ ସୁପରଷ୍ଟାରଜ୍ ଦଳରେ ସ୍ଥାନ ବଜାୟ ରଖିଛନ୍ତି। ସେହିପରି ଚିରାଗ ଶେଟ୍ଟୀ ୧୫.୫୦ ଲକ୍ଷ ଟଙ୍କା ବିନିମୟରେ ପୁଣେ ୭ ଆସେସ୍ ଦଳରେ ପୂର୍ବପରି ରହିଛନ୍ତି। ବିଶ୍ୱର ୯ ନମ୍ବର ମହିଳା ସିଙ୍ଗିଲ୍ସ ଖେଳାଳି ବେଇଓ୍ବାନ ଝାଙ୍ଗ ୩୯ ଲକ୍ଷ ଟଙ୍କା ବିନିମୟରେ ଅବଧ ଓ୍ବାରିୟର୍ସ ଦଳରେ ସ୍ଥାନ ବଜାୟ ରଖିଛନ୍ତି। ଜାତୀୟ ବ୍ୟାଡମିଣ୍ଟନ କୋଚ୍ ପୁଲେଲା ଗୋପୀଚାନ୍ଦଙ୍କ ଝିଅ ଗାୟତ୍ରୀ ଗୋପିଚାନ୍ଦଙ୍କୁ ଚେନ୍ନାଇ ସୁପରଷ୍ଟାରଜ୍ କ୍ରୟ କରିଛି। ସେହିପରି ଆସାମର ଯୁବ ବ୍ୟାଡମିଣ୍ଟନ ଖେଳାଳି ଅସ୍ମିତା ଚଲିଆଙ୍କୁ ତାଙ୍କ ଘରୋଇ ଦଳ ନର୍ଥ ଇଷ୍ଟର୍ନ ଓ୍ବାରିୟର୍ସ ୩ ଲକ୍ଷ ଟଙ୍କାରେ କ୍ରୟ କରିଛି।
ଏଥର ପିବିଏଲ୍ ପଞ୍ଚମ ସଂସ୍କରଣରେ ଅଲିମ୍ପିକ୍ସ ବ୍ରୋଞ୍ଜ୍ ପଦକ ବିଜୟିନୀ ସାଇନା ନେହ୍ବାଲ ଓ କିଡାମ୍ବୀ ଶ୍ରୀକାନ୍ତଙ୍କୁ ଖେଳୁଥିବାର ଦେଖିବାକୁ ମିଳିବ ନାହିଁ। ଅନ୍ତର୍ଜାତୀୟ କ୍ୟାରିୟରକୁ ଆଗକୁ ବଢ଼ାଇବା ପାଇଁ ଏହି ଦୁଇ ତାରକା ଏଥର ପିବିଏଲ୍ରୁ ଓହରିଯାଇଛନ୍ତି। ସାଇ ପ୍ରଣୀତ, ଲକ୍ଷ୍ୟ ସେନ ଓ ପୁରୁଷ ଡବଲ୍ସ ଯୋଡି ସାତ୍ତ୍ୱିକ ସାଇରାଜ ରାଙ୍କିରେଡ୍ଡୀ ଓ ଚିରାଗ ଶେଟ୍ଟୀ ଏହି ନିଲାମରେ ସମିଲ ହୋଇଥିଲେ। ଜାନୁୟାରୀ ୨୦ରୁ ଫେବୃୟାରୀ ୯ ତାରିଖ ମଧ୍ୟରେ ଆୟୋଜନ ହେବାକୁ ଥିବା ଏହି ଲିଗ୍ରେ ମୋଟ ୭୪ ଜଣ ଭାରତୀୟ ଖେଳାଳି ସାମିଲ ରହିଛନ୍ତି। ୨୧ ଦିନଧରି ଚାଲିବାକୁ ଥିବା ଏହି ଲିଗ୍ର ମ୍ୟାଚ୍ଗୁଡିକ ବେଙ୍ଗାଲୁରୁ, ଚେନ୍ନାଇ, ହାଇଦ୍ରାବାଦ ଓ ଲକ୍ଷ୍ନୌରେ ଖେଳାଯିବ।
ପ୍ରତ୍ୟେକ ଫ୍ରାଞ୍ଚାଇଜ୍ ୨ କୋଟି ଟଙ୍କା ଖର୍ଚ୍ଚ କରିପାରିବେ। ତେବେ ଜଣେ ଖେଳାଳିଙ୍କ ପାଇଁ ଦଳଗୁଡିକ ୭୭ ଲକ୍ଷ ଟଙ୍କାରୁ ଊର୍ଦ୍ଧ୍ୱ ଖର୍ଚ୍ଚ କରିପାରିବେ ନାହିଁ। ପ୍ରତ୍ୟେକ ଦଳରେ ସର୍ବାଧିକ ୬ଜଣ ବିଦେଶୀ ଓ ଅତିକମ୍ରେ ୩ଜଣ ମହିଳା ଖେଳାଳି ସାମିଲ ରହିପାରିବେ। ପ୍ରତ୍ୟେକ ଦଳରେ ୧୧ରୁ ଅଧିକ ଖେଳାଳି ସାମିଲ ହୋଇପାରିବେ ନାହଁ। ଲିଗ୍ର ଫର୍ମାଟରେ କୌଣସି ପରିବର୍ତ୍ତନ ହେବ ନାହିଁ। ପ୍ରତ୍ୟେକ ଟାଇ ୫ଟି ମ୍ୟାଚ୍ ସାମିଲ ହେବ। ଦୁଇଟି ପୁରୁଷ ସିଙ୍ଗଲ୍ସ, ଗୋଟିଏ ମହିଳା ସିଙ୍ଗଲ୍ସ, ଗୋଟିଏ ପୁରୁଷ ଡବଲ୍ସ ଓ ଗୋଟିଏ ମିକ୍ସଡ୍ ଡବଲ୍ସ ମ୍ୟାଚ୍ ଖେଳାଯିବ।
ଫ୍ରାଞ୍ଚାଇଜ୍ ସଂଖ୍ୟା ୭: ଅବୋଧ ଓ୍ବାରିୟର୍ସ (ଲକ୍ଷ୍ନୌ), ବେଙ୍ଗାଲୁରୁ ରାପ୍ଟର୍ସ (ବେଙ୍ଗାଲୁରୁ), ମୁମ୍ବାଇ ରକେଟର୍ସ (ମୁମ୍ବାଇ), ହାଇଦ୍ରାବାଦ ହଣ୍ଟର୍ସ (ହାଇଦ୍ରାବାଦ), ଚେନ୍ନାଇ ସୁପରଷ୍ଟାରଜ (ଚେନ୍ନାଇ), ନର୍ଥ ଇଷ୍ଟର୍ନ ଓ୍ବାରିୟର୍ସ (ନର୍ଥ ଇଷ୍ଟ) ଓ ପୁଣେ ୭ ଏସେସ୍ (ପୁଣେ)।