ଭୁବନେଶ୍ୱର,୧୨ା୩(ବ୍ୟୁରୋ): ପ୍ରେମିକଙ୍କ ଧୋକା ସହି ନ ପାରି ନୂଆପଲ୍ଲୀ ଥାନା ସମ୍ମୁଖରେ ଜଣେ ମହିଳା ଦେହରେ କିରୋସିନ ଢାଳି ନିଅଁା ଲଗାଇ ଦେଇଥିଲେ। ମହିଳାଙ୍କ ଘର ଜଗତସିଂହପୁର ଜିଲା ଝଙ୍କଡ ଅଞ୍ଚଳରେ। ତାଙ୍କୁ ଗୁରୁତର ଅବସ୍ଥାରେ ପ୍ରଥମେ କ୍ୟାପିଟାଲ ହସ୍ପିଟାଲ ପରେ କଟକ ବଡ଼ ମେଡିକାଲରେ ଭର୍ତ୍ତି କରାଯାଇଛି। ଅନ୍ୟପକ୍ଷରେ ଅଭିଯୁକ୍ତ ପ୍ରେମିକଙ୍କୁ ନୂଆପଲ୍ଲୀ ଥାନା ପୋଲିସ ଗିରଫ କରିଛି। ସେ ହେଲେ କେନ୍ଦ୍ରାପଡ଼ା ଜିଲା ଡେରାବିଶ ଅଞ୍ଚଳର ଜିତେନ୍ଦ୍ର ପ୍ରଧାନ।
ସୂଚନା ମୁତାବକ, ଗଞ୍ଜାମ ଜିଲାର ଜଣେ ଯୁବକଙ୍କୁ ୮ ବର୍ଷ ତଳେ ମହିଳା ଜଣକ ବିବାହ କରିଥିଲେ। ଦୁହେଁ ସାଲିଆସାହିରେ ରହୁଥିଲେ। ବର୍ଷେ ତଳେ ଝଗଡ଼ା ହେବାରୁ ସ୍ବାମୀସ୍ତ୍ରୀ ଅଲଗା ହୋଇଯାଇଥିଲେ। ଏହାପରେ ମହିଳା ଜଣକ ସାଲିଆସାହିରେ ରହୁଥିବା ମା’ଙ୍କ ପାଖରେ ରହି ଜୟଦେବ ବିହାରରେ ଥିବା ଏକ ହୋଟେଲରେ କାମ କରୁଥିଲେ। ସେଠାରେ ଅଭିଯୁକ୍ତ ଜିତେନ୍ଦ୍ର ସିକ୍ୟୁରିଟି ଗାର୍ଡ ଥିଲେ। ଜିତେନ୍ଦ୍ର ବିବାହିତ ଏବଂ ତାଙ୍କର ଗୋଟିଏ ପୁଅ ମଧ୍ୟ ଅଛି। କିନ୍ତୁ ମହିଳାଙ୍କ ସହିତ ତାଙ୍କର ପ୍ରେମସମ୍ପର୍କ ଗଢ଼ି ଉଠିଥିଲା। ଜିତେନ୍ଦ୍ର ବିବାହ କରିବାର ପ୍ରତିଶ୍ରୁତି ଦେଇ ମହିଳାଙ୍କ ସହ ଶାରୀରିକ ସମ୍ପର୍କ ରଖିଥିଲେ। ପରବର୍ତ୍ତୀ ସମୟରେ ସେ ଆଉ ବିବାହ କରିବେ ନାହିଁ ବୋଲି କହିବାରୁ ଏହାକୁ ନେଇ ଦୁହିଙ୍କ ମଧ୍ୟରେ ଝଗଡ଼ା ହୋଇଥିଲା। ସୋମବାର ରାତିରେ ଉଭୟେ ଥାନାକୁ ଆସିଥିଲେ। ଥାନା ଅଧିକାରୀ ଅରୁଣ କୁମାର ସ୍ବାଇଁ ମହିଳାଙ୍କ ଅଭିଯୋଗ ଶୁଣିବା ପରେ ଏତଲା ଦେବାକୁ କହିଥିଲେ। ଏତଲା ଲେଖିବା ପାଇଁ ମହିଳା ଜଣକ ଥାନା ବାହାରକୁ ଯାଇଥିବାବେଳେ ଜିତେନ୍ଦ୍ରଙ୍କ କଟୁକଥାରେ ଅତିଷ୍ଠ ହୋଇ ଦେହରେ ନିଅଁା ଲଗାଇ ଦେଇଥିଲେ। ଉପସ୍ଥିତ କର୍ମଚାରୀ ଓ ସ୍ଥାନୀୟ ଲୋକେ ପାଣି ପକାଇ ନିଅଁା ଲିଭାଇ ତୁରନ୍ତ ହସ୍ପିଟାଲ ନେଇଥିଲେ। ମହିଳାଙ୍କ ଶରୀରର ୯୦ ପ୍ରତିଶତ ପୋଡ଼ିଯାଇଛି। ବୁଧବାର ପୋଲିସ ମହିଳାଙ୍କ ମୃତ୍ୟୁକାଳୀନ ଜମାନବନ୍ଦୀ ରେକର୍ଡ କରିଥିଲା। ଜିତେନ୍ଦ୍ର ତାଙ୍କୁ ପ୍ରତାରଣା କରିବାରୁ ସେ ଦେହରେ ନିଆଁ ଲଗାଇଥିବା କହିଥିଲେ। ମହିଳାଙ୍କ ମା’ଙ୍କ ଅଭିଯୋଗ କ୍ରମେ ପୋଲିସ ୧୩୬/୨୦ ନମ୍ବରରେ ଏକ ମାମଲା ରୁଜୁକରି ଜିତେନ୍ଦ୍ରଙ୍କୁ କୋର୍ଟ ଚାଲାଣ କରିଛି।