ଅଭିନେତା ରୁଦ୍ର ପାଣିଗ୍ରାହୀ ଏବେ ପ୍ରେମରେ ପଡ଼ିଯାଇଛନ୍ତି। ପୁଣି କାହା ସହ ରୋମାନ୍ସ ଚାଲିଛି ଜାଣନ୍ତି ? ବଙ୍ଗୀୟ ଅଭିନେତ୍ରୀ ସୋଲାଙ୍କି ଭୌମିକଙ୍କ ସହ। ହେଲେ ଆରମ୍ଭରୁ ଏହା ପଛରେ ଥିବା ସତ କଥା ବିଷୟରେ ସୂଚନା ଦେଇଦେବା ହିଁ ଭଲ। ଏପରି ରୋମାନ୍ସ ଦର୍ଶକ ବଡ଼ ପରଦା ଉପରେ ଦେଖିବାକୁ ପାଇବେ। ଅର୍ଥାତ୍, ଏକ ତ୍ରିକୋଣୀୟ ପ୍ରେମ କାହାଣୀକୁ ଆଧାର କରି ନିର୍ମିତ ହୋଇଥିବା ଓଡ଼ିଆ ସିନେମା ‘ମତେ ଇସ୍କ ହେଲାରେ’ର ମୁଖ୍ୟ ଭୂମିକାରେ ରୁଦ୍ର ଏବଂ ସୋଲାଙ୍କି ଅଭିନୟ କରିଛନ୍ତି। ବିଟେକ୍ରେ ଡିଗ୍ରୀ ହାସଲ କରିଥିବା ସୋଲାଙ୍କି ମଧ୍ୟ ମଡେଲିଂ ସହ ଜଡିତ। ସ୍ନେହା ଫିଲ୍ମସ ବ୍ୟାନରରେ ନିର୍ମିତ ଏହି ଚିତ୍ରର ପ୍ରଯୋଜନା କରିଛନ୍ତି ଅୟସକାନ୍ତ ମହାନ୍ତି। ନିର୍ଦ୍ଦେଶନା ଦେଇଛନ୍ତି ବାବୁ ଦା’। ସୁନୀଲ ସଂଳାପ ରଚନା କରିଥିବା ବେଳେ ଗୀତଗୁଡିକୁ ସ୍ବର ଦେଇଛନ୍ତି ବିକାଶ ଶୁକ୍ଳା। ଏଥିରେ ଅନ୍ୟତମ ନାୟିକା ଭାବରେ ପ୍ରିୟଙ୍କା ଅଭିନୟ କରିଥିବା ବେଳେ ମନୀଷ ପୁରୋହିତ, ଜୀବନ ପଣ୍ଡା, ମନୀଷା ମିଶ୍ର, ରୋନିଙ୍କୁ ମଧ୍ୟ ଦେଖିବାକୁ ମିଳିବ। ଫିଲ୍ମଟି ଚଳିତ ମାସ ଶେଷ ସପ୍ତାହରେ ରିଲିଜ ହେବ ବୋଲି ପ୍ରଯୋଜନା ସଂସ୍ଥା ପକ୍ଷରୁ ସୂଚନା ଦିଆଯାଇଛି। ଏହାପୂର୍ବରୁ ଏହି ବ୍ୟାନରରେ ନିର୍ମିତ ‘ପ୍ରେମ ଦିଓ୍ବାନା’ରେ ରୁଦ୍ର-ସୋଲାଙ୍କି ଆକ୍ଟିଂ କରିସାରିଛନ୍ତି।