ବଣାଇ, ୨୭।୧୨ (ସ୍ବ.ପ୍ର.): ସୁନ୍ଦରଗଡ଼ ଜିଲା ବଣାଇ ଥାନା ଅନ୍ତର୍ଗତ କେନ୍ଦ୍ରୀକଳା ନିକଟରେ ସଂଘଟିତ ହତ୍ୟାକାଣ୍ଡର ପର୍ଦ୍ଦାଫାଶ କରିଛି ପୋଲିସ। ଗତ ୧୯ ତାରିଖରେ ବଣାଇ ଅଞ୍ଚଳର ଅନିଲ ମୁଣ୍ଡାଙ୍କୁ କେନ୍ଦ୍ରୀକଳା ଜଙ୍ଗଲରେ ତଣ୍ଟି କାଟିବା ପରେ ପଥରରେ ଛେଚି ହତ୍ୟା କରାଯାଇଥିଲା। ଏହା ଏକ ସୁପରିକଳ୍ପିତ ହତ୍ୟାକାଣ୍ଡ। ଏପରିକି ଅନିଲଙ୍କ ସ୍ତ୍ରୀ ସୀମା ପ୍ରେମିକଙ୍କ ସହ ମିଶି ଏହି କାଣ୍ଡ ଭିଆଇଥିବା ଶୁକ୍ରବାର ଆୟୋଜିତ ଖବରଦାତା ସମ୍ମିଳନୀରେ ପୋଲିସ ସୂଚନା ଦେଇଛି। ଘଟଣାରେ ପୋଲିସ ସୀମା ଓ ଗୁରୁଣ୍ଡିଆ ଥାନା ଅନ୍ତର୍ଗତ କୁଣ୍ଢେଇଡ଼ିହା ଗ୍ରାମର ପ୍ରେମିକ ନାମଯାନ ମୁଣ୍ଡା, ସୁପାରିକିଲର ରାଜଗାଙ୍ଗପୁର ଥାନା ଅନ୍ତର୍ଗତ ମାଣ୍ଡିଆକୁଦର ଗ୍ରାମର ସୂରଯ ନାଏକ, ଗଣେଶ ନାଏକ ପ୍ରମୁଖ ଚାରି ଜଣଙ୍କୁ ଗିରଫ କରିଥିବା ଜଣାପଡିଛି l
ଖବରଦାତା ସମ୍ମିଳନୀରେ ବଣାଇ ଉପଖଣ୍ଡ ପୋଲିସ ଅଧିକାରୀ ଅବକାଶ ରାଉତରାୟ ଏ ସମ୍ପର୍କରେ ସୂଚନା ଦେଇ କହିଛନ୍ତି, ନାମଯାନଙ୍କ ସହ ସୀମା ମିଶି ଅନିଲଙ୍କୁ ହତ୍ୟା କରିଛନ୍ତି। ଏକ ଲକ୍ଷ ଟଙ୍କା ବିନିମୟରେ ହତ୍ୟା କରିବା ପାଇଁ ସୁପାରିକିଲର ରାଜି ହୋଇଥିବା ବେଳେ ୪ହଜାର ଟଙ୍କା ଅଗ୍ରିମ ନେଇ ଏଭଳି ହତ୍ୟା କରିଥିବା ପ୍ରକାଶ କରିଛନ୍ତ। ଏ ସଂକ୍ରାନ୍ତରେ ବଣାଇ ଥାନାରେ ଏକ ମାମଲା(ନଂ.୧୫୫ /୨୦୧୯) ରୁଜୁ ହୋଇଥିବା ବେଳେ ଅଭିଯୁକ୍ତମାନଙ୍କ ବିରୋଧରେ ଭାରତୀୟ ପିଙ୍ଗଳ କୋଡ୍ ୧୨୦(ବି )/୩୦୨/୩୪ ଲାଗୁ କରାଯାଇ ସେମାନଙ୍କୁ କୋର୍ଟ ଚାଲାଣ କରାଯିବ ବୋଲି ରାଉତରାୟ କହିଛନ୍ତି।
