ପ୍ରେମିକଙ୍କ ସହ ଯିବାକୁ ଜିଦ୍‌ ଧରିଲେ ମହିଳା; ବଜାର ଉପରେ ସ୍ବାମୀ ହଟହଟା
7:50 amJune 14, 2019June 10, 2020 / 21

ଅନୁଗୋଳ ଅଫିସ, ୧୪।୬- ରଜ ପାଇଁ ସ୍ବାମୀଙ୍କ ସହ ଅନୁଗୋଳ ବଜାରକୁ କିଣାକିଣି କରିବାକୁ ଆସିଥିବା ଜଣେ ମହିଳା ପ୍ରେମିକଙ୍କ ସହ ଯିବାକୁ ଜିଦ୍‌ ଧରିବା ଘଟଣା ଗୁରୁବାର ସହରରେ ଚର୍ଚ୍ଚାର ବିଷୟ ପାଲଟିଛି। ଏଥିଯୋଗୁ ଅନୁଗୋଳ ବସ୍‌ଷ୍ଟାଣ୍ଡରେ ସମ୍ପୃକ୍ତ ସ୍ବାମୀଙ୍କୁ ହଟହଟା ହେବାକୁ ପଡିଛି। ସ୍ଥାନୀୟ ଲୋକଙ୍କ ହସ୍ତକ୍ଷେପ ସତ୍ତ୍ୱେ ଘଟଣା ସମାଧାନ ନ ହେବାରୁ ଥାନାର ଦ୍ୱାରସ୍ଥ ହୋଇଛନ୍ତି ଉଭୟ ସ୍ବାମୀ ସ୍ତ୍ରୀ ଓ ସମ୍ପୃକ୍ତ ପ୍ରେମିକ।
ସୂଚନା ମୁତାବକ, ପୂର୍ବରୁ ବିବାହ କରିଥିବା ଯୁବକ ଜଣକ ପ୍ରାୟ ସାଢେ ୩ ବର୍ଷ ପୂର୍ବେ ସମ୍ପୃକ୍ତ ମହିଳାଙ୍କୁ ଦ୍ୱିତୀୟ ବିବାହ କରିଥିଲେ। ଗୁରୁବାର ସ୍ବାମୀ ସ୍ତ୍ରୀ ରଜ ପାଇଁ ବିଭିନ୍ନ ଜିନିଷ ଓ ପୋଷାକ ପତ୍ର କିଣିବାକୁ ଅନୁଗୋଳ ବଜାରକୁ ଆସିଥିଲେ। ସେଠାରେ ପୂର୍ବ ପ୍ରେମିକଙ୍କ ସହ ସମ୍ପୃକ୍ତ ମହିଳାଙ୍କ ଦେଖା ହୋଇଥିଲା। ଏହା ପରେ ମହିଳା ଜଣକ ପ୍ରେମିକଙ୍କ ସହ ଯିବେ ବୋଲି ଜିଦ୍‌ ଧରିଥିଲେ। ଫଳରେ ସ୍ବାମୀ କିଛି ଉପାୟ ନ ପାଇ ସ୍ଥାନୀୟ ଲୋକଙ୍କ ସହାୟତା ମାଗିଥିଲେ। ଅନୁଗୋଳ ବସ୍‌ଷ୍ଟାଣ୍ଡରେ ଏଥିଯୋଗୁ ଗହଳି ଜମିଥିଲା। ବୁଝାଶୁଝା ସତ୍ତ୍ୱେ ମହିଳା ଜଣକ ନ ମାନିବାରୁ ସମସ୍ତଙ୍କୁ ନେଇ ଲୋକେ ବସ୍‌ଷ୍ଟାଣ୍ଡରେ ଥିବା ଫାଣ୍ଡିକୁ ଯାଇଥିଲେ। ସେଠାରେ ମଧ୍ୟ ମହିଳା ଜଣକ ଜିଦ୍‌ରେ ଅଟଳ ରହିଥିଲେ।