ନୂଆଦିଲ୍ଲୀ, ୮ା୨: ଉତ୍ତର-ପଶ୍ଚିମ ଦିଲ୍ଲୀରେ ଜଣେ ମହିଳା ପୋଲିସ ଅଧିକାରୀଙ୍କୁ ଗୁଳିକରି ହତ୍ୟା କରାଯାଇଛି। ପୋଲିସ ଏସ୍ଆଇ ପ୍ରୀତି ଅହଲାଓ୍ବତ୍(୨୬) ମେଟ୍ରୋ ଷ୍ଟେଶନର ପୋଲିସ ଏକାଡେମୀରୁ କାମସାରି ଘରକୁ ଫେରୁଥିବାବେଳେ ଅନ୍ୟ ଜଣେ ପୋଲିସ ଅଧିକାରୀ ତାଙ୍କୁ ୩ ରାଉଣ୍ଡ ଗୁଳିକରି ହତ୍ୟା କରିଥିବା ଅଭିଯୋଗ ହୋଇଛି। ପ୍ରେମ ବିବାହକୁ ନେଇ ଏଭଳି ଗୁଳିକାଣ୍ଡ ହୋଇଥିବା ପ୍ରାଥମିକ ରିପୋର୍ଟରୁ ଜଣାପଡ଼ିଛି। ଘଟଣାଟି ରୋହିଣି ଅଞ୍ଚଳରେ ଶୁକ୍ରବାର ରାତି ୯.୩୦ରେ ଘଟିଥିଲା। ପ୍ରୀତିଙ୍କ ମୁଣ୍ଡରେ ଗୁଳିମାଡ଼ ହେବାରୁ ସେ ଘଟଣାସ୍ଥଳରେ ପ୍ରାଣ ହରାଇଥିଲେ। ପ୍ରୀତିଙ୍କୁ ଗୁଳିକରି ମାରିବା ପରେ ୨୦୧୮ ବ୍ୟାଚ୍ର ଏସ୍.ଆଇ. ଦୀପାଂଶୁ ରାଠି ହରିୟାନାର ସୋନିପଥରେ ଆତ୍ମହତ୍ୟା କରିଛନ୍ତି। ପୋଲିସ ଏହି ଘଟଣାର ତଦନ୍ତ ଆରମ୍ଭ କରିଥିବାବେଳେ ସିସିଟିଭି ଫୁଟେଜ୍ ଓ ଶବ ବ୍ୟବଚ୍ଛେଦ ରିପୋର୍ଟ ଯାଞ୍ଚ କରୁଛି। ଘଟଣାସ୍ଥଳରୁ ୩ଟି କାଟ୍ରିଜ୍ ପୋଲିସ ଜବତ କରିଥିବା ବରିଷ୍ଠ ପୋଲିସ ଅଧିକାରୀ ଏସ୍.ଡି. ମିଶ୍ର ପ୍ରକାଶ କରିଛନ୍ତି। ସୋନିପଥରୁ ଏକ କାର୍ ଭିତରୁ ଦୀପାଂଶୁଙ୍କ ମୃତଦେହକୁ ମଧ୍ୟ ଜବତ କରାଯାଇଛି।
ସୋନିପଥ ନିବାସୀ ପ୍ରୀତି ପ୍ରତାପଗଞ୍ଜ ଶିଳ୍ପାଞ୍ଚଳ ପୋଲିସ ଷ୍ଟେଶନରେ ନିଯୁକ୍ତି ପାଇଥିବାବେଳେ ରୋହିଣିରେ ସେ ଭଡ଼ାଘର ନେଇ ରହୁଥିଲେ। ଦୀପାଂଶୂ ପ୍ରୀତିଙ୍କୁ ଭଲ ପାଉଥିବାବେଳେ ବିବାହ କରିବାକୁ ଚାହୁଁଥିଲେ। ହେଲେ ପ୍ରୀତି ଏହାକୁ ପ୍ରତ୍ୟାଖ୍ୟାନ କରିବାରୁ ବିବାଦ ଦେଖାଦେଇଥିଲା। ଦିଲ୍ଲୀ ବିଧାନସଭା ନିର୍ବାଚନ ପୂର୍ବରୁ ଏଭଳି ଗୁଳିକାଣ୍ଡ ଘଟଣା ସମସ୍ତଙ୍କୁ ସ୍ତବ୍ଧ କରିଦେଇଛି।