ଅକ୍ଲାଣ୍ଡ,୧୬।୩- କରୋନା ଭାଇରସର ଭୟବହତା ଯୋଗୁ ବହୁ ଅନ୍ତର୍ଜାତୀୟ କ୍ରୀଡ଼ା ଇଭେଣ୍ଟ ବାତିଲ କିମ୍ବା ସ୍ଥଗିତ ହୋଇସାରିଛି। ଏହି ଧାରାରେ ଯୋଡ଼ି ହୋଇଛି ନ୍ୟୁଜିଲାଣ୍ଡର ପ୍ରଥମ ଶ୍ରେଣୀ କ୍ରିକେଟ ଟୁର୍ନାମେଣ୍ଟ ପ୍ଲଙ୍କେଟ ଶିଲ୍ଡ। ଇଭେଣ୍ଟର ଅନ୍ତିମ ଦୁଇ ରାଉଣ୍ଡ ମ୍ୟାଚ ବାତିଲ କରିଦିଆଯାଇଛି। ଏଥିସହ ଓ୍ବେଲିଂଟନ ଦଳକୁ ୨୦୧୯-୨୦ ସିଜନର ଚାମ୍ପିୟନ ଘୋଷଣା କରାଯାଇଛି। ନ୍ୟୁଜିଲାଣ୍ଡ କ୍ରିକେଟ (ଏନ୍ଜେଡ୍ସି) କାର୍ଯ୍ୟକାରୀ ମୁଖ୍ୟ ଭେଡିଡ ହ୍ବାଇଟ୍ ମେଡିକାଲ ଦଳର ପରାମର୍ଶ କ୍ରମେ ଏହି ନିଷ୍ପତ୍ତି ନିଆଯାଇଛି। ଓ୍ବେଲିଂଟନ ଦଳ ପଏଣ୍ଟ ତାଲିକାରେ ଦ୍ୱିତୀୟ ସ୍ଥାନରେ ଥିବା ଦଳଠାରୁ ୨୬ ପଏଣ୍ଟ ଆଗରେ ଥିଲା। ଏଣୁ ଦଳକୁ ଚାମ୍ପିୟନ ଘୋଷଣା କରାଯାଇଛି। ନ୍ୟୁଜିଲାଣ୍ଡ କ୍ରିକେଟ ପରିବାର ଓ ଜନସାଧାରଣଙ୍କ ସ୍ବାସ୍ଥ୍ୟ ଜନିତ ସୁରକ୍ଷା ଲାଗି ଇଭେଣ୍ଟର ବଳକା ମ୍ୟାଚ୍ ବାତିଲ କରାଯାଇଛି। ଏହି ଭାଇରସକୁ ଗୁରୁତର ସହ ନେବାକୁ ମେଡିକାଲ ଟିମ୍ ପରାମର୍ଶ ଦେଇଛି ବୋଲି ହ୍ବାଇଟ୍ କହିଛନ୍ତି। ଏନ୍ଜେଡ୍ସି ନ୍ୟୁଜିଲାଣ୍ଡ କ୍ରିକେଟ ଆଓ୍ବଡର୍ସକୁ ମଧ୍ୟ ସ୍ଥଗିତ ରଖିଛି। ଏହି ଇଭେଣ୍ଟ ଆସନ୍ତା ୩୦ ତାରିଖରେ ହେବାର ଥିଲା।