ନୂଆଦିଲ୍ଲୀ,୩୦ା୯(ପି.ଟି.): ସ୍ବଚ୍ଛ ଭାରତ ଅଭିଯାନ, ଫିଟ୍ ଇଣ୍ଡିଆ ମୁଭ୍ମେଣ୍ଟ ପରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ରବିବାର ଭାରତରେ ପ୍ଲଗିଙ୍ଗ୍ ଅଭିଯାନ ଆରମ୍ଭ କରିବା ଲାଗି ତାଙ୍କର ମାସିକ ରେଡିଓ କାର୍ଯ୍ୟକ୍ରମ ‘ମନ୍ କୀ ବାତ୍’ରେ କହିଛନ୍ତି। ଭାରତର ପ୍ରଥମ ପ୍ଲଗର ରିପୁଦମନ ବେଲ୍ଭି ଏହି ପ୍ଲଗିଙ୍ଗ୍ କ୍ୟାମ୍ପେନ୍ର ଶୁଭାରମ୍ଭ କରିଥିବାରୁ ପ୍ରଧାନମନ୍ତ୍ରୀ ତାଙ୍କର ପ୍ରଶଂସା କରିଛନ୍ତି। ପ୍ଲଗିଙ୍ଗ୍ ହେଉଛି ରାସ୍ତାରେ ଜଗିଙ୍ଗ୍ କରିବା ସହିତ ଅଳିଆ ଉଠାଇବା। ଏହା ଆମକୁ ଫିଟ୍ ରଖିବା ସହ ପ୍ରଦୂଷଣ ରୋକିବାରେ ସହାୟକ ହୋଇପାରିବ। ୨୦୧୬ରେ ସ୍ବିଡେନ୍ରେ ପ୍ରଥମେ ଏଭଳି ଏକ କାର୍ଯ୍ୟକ୍ରମ ଆରମ୍ଭ ହୋଇଥିଲା। ଅକ୍ଟୋବର ୨ ଗାନ୍ଧୀ ଜୟନ୍ତୀରୁ ଗୋଟିଏ ଥର ବ୍ୟବହୃତ ପ୍ଲାଷ୍ଟିକ ନିଷିଦ୍ଧ ଅଭିଯାନ ହେଉଥିବାବେଳେ ଏଥିରୁ ମୁକ୍ତି ପାଇଁ ୧୩୦ କୋଟି ଦେଶବାସୀଙ୍କୁ ଶପଥ ନେବାକୁ ହେବ। ଅକ୍ଟୋବର ୨ରେ କ୍ରୀଡା ମନ୍ତ୍ରଣାଳୟ ‘ଫିଟ୍ ଇଣ୍ଡିଆ ପ୍ଲଗିଙ୍ଗ୍ ରନ୍’ ଆୟୋଜନ କରିବ। ଏଥିରେ ସାରା ଦେଶରୁ ଲୋକେ ଭାଗ ନେଇ ୨ କିଲୋମିଟର ଦୌଡିବା ସହ ଅଳିଆ ସଂଗ୍ରହ କରିବେ।
ତମାଖୁ ବର୍ଜନ ପାଇଁ ପ୍ରଧାନମନ୍ତ୍ରୀ ଆହ୍ବାନ ଦେବା ସହ ଇ-ସିଗାରେଟ ନିଷିଦ୍ଧ କରାଯାଇଥିବାରୁ ଏହା ଯୁବସମାଜକୁ ନୂଆ ବଦଭ୍ୟାସରେ ପଡିବାରୁ ରୋକିପାରିବ ବୋଲି କହିଛନ୍ତି। କ୍ୟାନସର, ମଧୁମେହ ଓ ରକ୍ତଚାପ ଭଳି ତମାଖୁ ସେବନ ଅତ୍ୟନ୍ତ ହାନିକାରକ। ଇ-ସିଗାରେଟ ମଧ୍ୟ ଅନୁରୂପ କ୍ଷତିକାରକ ହୋଇଥିବାରୁ ଏହାର ଉତ୍ପାଦନ ଓ ବିକ୍ରିକୁ ବନ୍ଦ କରିବା ଲାଗି ସରକାର ଅଧ୍ୟାଦେଶ ଆଣିଛନ୍ତି। ଆଗାମୀ ପାର୍ଲାମେଣ୍ଟ ଅଧିବେଶନରେ ଏହି ଅଧ୍ୟାଦେଶ ଆଇନରେ ପରିଣତ ହେବାକୁ ଯାଉଛି।
ପାର୍ବଣ ଋତୁ ଆରମ୍ଭ ହେବାକୁ ଯାଉଥିବାବେଳେ ଜନସାଧାରଣ ପରସ୍ପର ମଧ୍ୟରେ ଆନନ୍ଦ ବାଣ୍ଟିବା ପାଇଁ ପ୍ରଧାନମନ୍ତ୍ରୀ ଆହ୍ବାନ ଦେଇଛନ୍ତି। ନବରାତ୍ର ଉତ୍ସବ ଆରମ୍ଭ ହୋଇଥିତ୍ବାବେଳେ ଏହା ଲୋକଙ୍କ ମଧ୍ୟରେ ନୂତନ ଉତ୍ସାହ ଭରିଦେବ। ଏଥର ଦିଓ୍ବାଲି ପାଳନ ବେଳେ ରାଷ୍ଟ୍ର ନାରୀଶକ୍ତିର ଦକ୍ଷତା ଓ ସାମର୍ଥ୍ୟର ପାଳନ କରିବାକୁ ପ୍ରଧାନମନ୍ତ୍ରୀ ଆହ୍ବାନ ଦେଇଛନ୍ତି। ଝିଅମାନଙ୍କୁ ସମ୍ବର୍ଦ୍ଧିତ କରିବା ଲାଗି ଏକ ସ୍ବତନ୍ତ୍ର କାର୍ଯ୍ୟକ୍ରମ ଆୟୋଜନ କରିବା ନିମନ୍ତେ ସେ ପରାମର୍ଶ ଦେଇଛନ୍ତି।
କ୍ରୀଡା ଓ ଖେଳଓ୍ବାଡ ମନୋଭାବ ସମ୍ପର୍କରେ କହିବା ବେଳେ ୟୁଏସ୍ ଓପନ୍ ଟେନିସ୍ ଟୁର୍ନାମେଣ୍ଟ ତାଙ୍କୁ ପ୍ରଭାବିତ କରିଥିବା ସୂଚନା ଦେଇଥିଲେ। ଖେଳଓ୍ବାଡ ମନୋଭାବ ରଖି ଲୋକଙ୍କ ହୃଦୟ ଜିଣିବାକୁ ସେ ପରାମର୍ଶ ଦେଇଥିଲେ। ଅକ୍ଟୋବର ୩୧ ସର୍ଦ୍ଦାର ବଲ୍ଲଭଭାଇ ପଟେଲଙ୍କ ଜନ୍ମବାର୍ଷିକୀ। ‘ଏକ ଭାରତ ଶ୍ରେଷ୍ଠ ଭାରତ’ ଆମର ଲକ୍ଷ୍ୟ ହୋଇଥିବାରୁ ଏହି ଦିନ ବହୁସଂଖ୍ୟାରେ ‘ଏକତା ପାଇଁ ଦୌଡ଼’ କାର୍ଯ୍ୟକ୍ରମରେ ସାମିଲ ହେବା ଲାଗି ପ୍ରଧାନମନ୍ତ୍ରୀ ଆହ୍ବାନ ଦେଇଛନ୍ତି। ପାର୍ବଣ ଋତୁରେ ଭାରତ ଭ୍ରମଣ ଲାଗି ସେ ଜନସାଧାରଣଙ୍କୁ ଅନୁରୋଧ କରିଛନ୍ତି।