ବେଙ୍ଗାଲୁରୁ, ୧୯।୬(ପି.ଟି.)-ଗୋସ୍ପୋଟର୍ସ ଫାଉଣ୍ଡେଶନ ପକ୍ଷରୁ ଆରମ୍ଭ କରାଯାଇଥିବା ‘ପ୍ଲେ ଫର୍ ଇଣ୍ଡିଆ’ କାର୍ଯ୍ୟକ୍ରମକୁ ଦେଶର ପ୍ରମୁଖ କ୍ରୀଡ଼ା ବ୍ୟକ୍ତିତ୍ୱମାନେ ସମର୍ଥନ କରିଛନ୍ତି। ସେମାନଙ୍କ ମଧ୍ୟରେ କ୍ରିକେଟର ରୋହିତ ଶର୍ମା, ଯୁବରାଜ ସିଂ, ମୟଙ୍ଗ ଅଗ୍ରଓ୍ବାଲ, ସ୍ମୃତି ମନ୍ଧାନା, ରେସଲର ବଜରଙ୍ଗ ପୁନିଆ, ଅଲିମ୍ପିଆନ ସାକ୍ଷୀ ମଲିକ, ଦୀପା କର୍ମକାର ପ୍ରମୁଖ ରହିଛନ୍ତି। ଟେନିସ ତାରକା ସାନିଆ ମିର୍ଜା, କ୍ରୀଡ଼ା ଶିଳ୍ପସହ ଜଡ଼ିତ ବଲିଉଡ ସେଲିବ୍ରିଟି ଅଭିଷେକ ବଚ୍ଚନ ଓ ସୁନୀଲ ସେଟ୍ଟୀ ମଧ୍ୟ ଏଥିରେ ଯୋଡ଼ି ହୋଇଛନ୍ତି। କୋଭିଡ୍-୧୯ ସଂକ୍ରମଣରେ ପ୍ରଭାବିତ କ୍ରୀଡ଼ା ସହିତ ସମ୍ପୃକ୍ତ ବ୍ୟକ୍ତିଙ୍କୁ ସହାୟତା କରିବା ପାଇଁ ଏପରି ଏକ ଭିଡିଓ କାର୍ଯ୍ୟକ୍ରମର ମୁଖ୍ୟ ଲକ୍ଷ୍ୟ। ଭାରତର କ୍ରୀଡ଼ା ସମୁଦାୟ, ପ୍ରଶଂସକ ଏବଂ ଆଥଲେଟ୍ଙ୍କୁ ଏକତ୍ରିତ କରି ଖେଳ ପ୍ରତି ଅବଦାନ ଥାଇ ଲୋକଲୋଚନକୁ ଆସିପାରି ନ ଥିବା ବ୍ୟକ୍ତିଙ୍କୁ ସହଯୋଗ କରିବା ଏହାର ଉଦ୍ଦେଶ୍ୟ। କୋଭିଡ-୧୯ ପାଇଁ କାର୍ଯ୍ୟ ନ ପାଇ ନିୟମିତ ଅର୍ଥ ଉପାର୍ଜନ କରିପାରୁ ନ ଥିବା କ୍ଲିନର, ଗାର୍ଡନର, କୋଚ୍, ଅମ୍ପାୟର, ରେଫରି ଓ ଅନ୍ୟ ସପୋର୍ଟ ଷ୍ଟାଫ୍ ପ୍ରମୁଖ ଏମାନଙ୍କ ମଧ୍ୟରେ ସାମିଲ।
” ବିଶେଷ ଜଣାଶୁଣା ନ ଥିବା ଏବଂ ସ୍ବୀକୃତି ପାଇ ନ ଥିବା ଅନେକ ବ୍ୟକ୍ତିଙ୍କ କାର୍ଯ୍ୟ ପାଇଁ ଖେଳ ଆମକୁ ଖୁସି ଦେଇଥାଏ। ଭାରତୀୟ କ୍ରୀଡ଼ା ପ୍ରତି କିନ୍ତୁ ସେମାନଙ୍କର ଗୁରୁତ୍ୱପୂର୍ଣ୍ଣ ଅବଦାନ ରହିଥାଏ। ଭାରତୀୟ କ୍ରୀଡ଼ାର ମେରୁଦଣ୍ଡ କୁହାଯାଉଥିବା ଏହି ବ୍ୟକ୍ତିମାନଙ୍କୁ ଆର୍ଥିକ ଏବଂ ଅଣଆର୍ଥିକ ସହାୟତା କରିବା ‘ପ୍ଲେ ଫର୍ ଇଣ୍ଡିଆ’ କାର୍ଯ୍ୟକ୍ରମର ଲକ୍ଷ୍ୟ“ ବୋଲି ପୂର୍ବତନ ଭାରତୀୟ ଅଲରାଉଣ୍ଡର ଯୁବରାଜ ସିଂ ପ୍ରକାଶ କରିଛନ୍ତି। ପ୍ରୋ କବାଡ଼ି ଲିଗ୍ ଏବଂ ଇଣ୍ଡିଆନ ସୁପର ଲିଗ୍ର ମାଲିକ ଅଭିଷେକ କହିଛନ୍ତି ଯେ, ”ସାମ୍ପ୍ରତିକ ସମୟରେ ଏହି କର୍ମଚାରୀମାନେ ଆମ ନିକଟରୁ ସମସ୍ତ ପ୍ରକାର ସହାୟତା ଆବଶ୍ୟକ କରୁଛନ୍ତି। ତେଣୁ ସମସ୍ତେ ଏକତ୍ରିତ ହୋଇ ଏହି କାର୍ଯ୍ୟକ୍ରମରେ ସାମିଲ ହେବାର ସମୟ ଆସିଛି“। ଗୋସ୍ପୋଟର୍ସ ଫାଉଣ୍ଡେଶନ କାର୍ଯ୍ୟନିର୍ବାହୀ ନିର୍ଦ୍ଦେଶକ ଦୀପ୍ତି ବୋପାଲା ମଧ୍ୟ ସମାନ ମତବ୍ୟକ୍ତ କରିଛନ୍ତି। ”କୋଭିଡ୍-୧୯ ଭାରତୀୟ କ୍ରୀଡ଼ା ଉପରେ ଗୁରୁତର ପ୍ରଭାବ ପକାଇଛି। କ୍ରୀଡ଼ା ଉପରେ ନିର୍ଭର କରୁଥିବା ସେମାନଙ୍କ ଜୀବନଶୈଳୀ ଅସ୍ତବ୍ୟସ୍ତ ହୋଇଯାଇଛି। କଷ୍ଟ ସମୟ ଦେଇ ଗତି କରୁଥିବା ବ୍ୟକ୍ତିମାନଙ୍କୁ ଆମ କାର୍ଯ୍ୟକ୍ରମ କିଛି ପରିମାଣରେ ସାହାଯ୍ୟ କରିବା ନେଇ ଆଶା ରହିଛି“ ବୋଲି ସେ କହିଛନ୍ତି। ”ଆମେ ମିଳିମିଶି କାର୍ଯ୍ୟକଲେ କ’ଣ ହାସଲ କରିପାରିବୁ ‘ପ୍ଲେ ଫର୍ ଇଣ୍ଡିଆ’ ତା’ର ଏକ ବଡ଼ ଉଦାହରଣ। ଏହି କାର୍ଯ୍ୟକ୍ରମକୁ ସମର୍ଥନ କରୁଥିବା ସମସ୍ତଙ୍କୁ ମୁଁ ଧନ୍ୟବାଦ ଜଣାଉଛି“ ବୋଲି ‘ଲାଇଫ୍ ଇଜ୍ ଏ ବଲ୍’ର ପ୍ରତିଷ୍ଠାତା ତଥା ପୂର୍ବତନ ଟେଭିସ କପ୍ ଟେନିସ ତାରକା ସୋମଦେବ ଦେବବର୍ମନ ପ୍ରକାଶ କରିଛନ୍ତି।