ପ୍ୟାରିସ, ୩୧।୧୦ (ଏଏଫ୍ପି)- ଦୁଇ କିମ୍ବଦନ୍ତୀ ଟେନିସ ଖେଳାଳି ନୋଭାକ ଜୋକୋଭିଚ୍ ଓ ରାଫାଲ ନାଡାଲ ଏଠାରେ ଚାଲିଥିବା ପ୍ୟାରିସ ମାଷ୍ଟର୍ସର ପ୍ରି-କ୍ୱାର୍ଟର ଫାଇନାଲରେ ପ୍ରବେଶ କରିଛନ୍ତି। ରାଉଣ୍ଡ-୩୨ର ଏକ ମ୍ୟାଚ୍ରେ ଟପ୍ ସିଡ୍ ସର୍ବିୟାର ଜୋକୋଭିଚ୍ ୭-୬ (୭/୨), ୬-୪ ସେଟ୍ରେ ଫ୍ରାନ୍ସର କୋରେଣ୍ଟିନ ମାଉଟେଙ୍କୁ ପରାସ୍ତ କରିଛନ୍ତି। ପ୍ରି-କ୍ୱାର୍ଟର ଫାଇନାଲରେ ଜୋକୋଭିଚ୍ଙ୍କ ମୁକାବିଲା ବ୍ରିଟେନର କାଏଲ୍ ଏଡ୍ମୁଣ୍ଡଙ୍କ ସହ ହେବ। ଯଦି ଏଠାରେ ଜୋକୋଭିଚ୍ ଚାମ୍ପିୟନ ହୁଅନ୍ତି ତେବେ ରେକର୍ଡ ୫ମ ଥର ପାଇଁ ଏଠାରେ ଟାଇଟଲ୍ ଜିତିବାର ସୌଭାଗ୍ୟ ଲାଭ କରିବେ। ଅପରପକ୍ଷରେ ରାଉଣ୍ଡ-୩୨’ର ଅନ୍ୟ ଏକ ମ୍ୟାଚ୍ରେ ସ୍ପାନିଶ ଟେନିସ ତାରକା ନାଡାଲ ୭-୫, ୬-୪ ସେଟ୍ରେ ଘରୋଇ ଖେଳାଳି ଆଡ୍ରିଆନ ମାନାରିନୋଙ୍କୁ ହରାଇଛନ୍ତି। କ୍ୱାର୍ଟର ଫାଇନାଲ ଟିକେଟ୍ ପାଇଁ ନାଡାଲଙ୍କୁ ୩ଥର ଗ୍ରାଣ୍ଡସ୍ଲାମ ବିଜେତା ଷ୍ଟାନ୍ ଓ୍ବାରିଙ୍କାଙ୍କ ସହ ମ୍ୟାଚ୍ ଖେଳିବାକୁ ପଡ଼ିବ।